Ashtottarashatopanishad 147
Aṣṭottaraśatopaniṣad 147
- Language
- Sanskrit
Contents
- 147.14 — 1 part
147.1
oṃ tatastasmānnirviśeṣamatinirmalaṃ bhavati| avidyāpādamatiśuddhaṃ
bhavati| śuddhabodhānandalakṣaṇakaivalyaṃ bhavati| brahmaṇaḥ pādacatuṣṭayaṃ
nirviśeṣaṃ bhavati| akhaṇḍalakṣaṇākhaṇḍaparipūrṇasaccidānandasvaprakāśaṃ
bhavati| advitīyamanīśvaraṃ bhavati| akhilakāryakāraṇasvarūpamakhaṇḍacidghanānandasvarūpamatidivyamaṅgalākāraṃ niratiśayānandatejorāśiviśeṣaṃ
sarvaparipūrṇānantacinmayastambhākāraṃ śuddhabodhānandaviśeṣākāramanantacidvilāsavibhūtisamaṣṭyākāramadbhutānandāścaryavibhūtiviśeṣākāramanantaparipūrṇānandivyasaudāminīnicayākāram| evamākāramadvitīyākhaṇḍānandabrahmasvarūpaṃ nirūpitam
147.2
atha chātro vadati| bhagavan pādabhedādikaṃ kathaṃ kathamadvaitasvarūpamiti
nirūpitam
147.3
deśikaḥ pariharati| virodho na vidyate| brahmādvitīyameva satyam
tathaivoktaṃ ca| brahmabhedo na kathito brahmavyatiriktaṃ na kiñcidasti
pādabhedādikathanaṃ tu brahmasvarūpakathanameva| tadevocyate| pādacatuṣṭayātmakaṃ brahma tatraikamavidyāpādaṃ pādatrayamamṛtaṃ bhavati| śākhā'ntaropaniṣatsvarūpameva nirūpitam
147.4
tamasastu paraṃ jyotiḥ paramānandalakṣaṇam
pādatrayātmakaṃ brahma kaivalyaṃ śāśvataṃ param
147.5
vedāhametaṃ puruṣaṃ mahāntamādityavarṇaṃ tamasaḥ parastāt
tamevaṃ vidvānamṛta iha bhavati nānyaḥ panthā vidyate'yanāya
147.6
sarveṣāṃ jyotiṣāṃ jyotistamasaḥ paramucyate
sarvasya dhātāramacintyarūpamādityavarṇaṃ paraṃjyotistamasa upari
vibhāti
147.7
yadekamavyaktamanantarūpaṃ viśvaṃ purāṇaṃ tamasaḥ parastāt
tadevartaṃ tadu satyamāhustadeva satyaṃ tadeva brahma paramaṃ viśuddham
147.8
kathyate tamaśśabdenāvidyā
147.9
pādo'sya viśvā bhūtāni tripādasyāmṛtaṃ divi
tripādūrdhva udait puruṣaḥ pādo'syehābhavāt punaḥ
tato viṣvaṅ vyakrāmat sāśanānaśane abhi
147.10
vidyā''nandaturīyākhyapādatrayamamṛtaṃ bhavati
avaśiṣṭamavidyāśrayamiti
147.11
ātmārāmasyādinārāyaṇasya kīdṛśāvunmeṣanimeṣau tayoḥ svarūpaṃ
kathamiti
147.12
īśvarasya mahāmāyā tadājñāvaśavartinī
147.13
tatsaṅkalpānusāriṇī vividhānantamahāmāyāśaktisusevitā anantamahāmāyājālajananamandirā mahāviṣṇoḥ krīḍāśarīrarūpiṇī brahmādīnāmagocarā| etāṃ mahāmāyāṃ tarantyeva ye viṣṇumeva bhajanti| nānye taranti
kadācana vividhopāyairapi
147.14
avidyākāryāṇyantaḥkaraṇānyatītya kālānyanantāni jāyante| brahmacaitanyaṃ teṣu pratibimbitaṃ bhavati| pratibimbā eva jīvā iti kathyante
antaḥkaraṇopādhikāḥ sarve jīvā ityevaṃ vadanti| mahābhūtotthasūkṣmāṅgopādhikāḥ sarve jīvā ityeke vadanti| buddhipratibimbitacaitanyaṃ jīvā
ityapare manyante| eteṣāmupādhīnāmatyantabhedo na vidyate| sarvaparipūrṇo
nārāyaṇastvanayā nijayā krīḍati svecchayā sadā| tadvadavidyamānaphaluviṣayasukhāśayāḥ sarve jīvāḥ pradhāvantyasārasaṃsāracakre| evamanādiparamparā vartate'nādisaṃsāraviparītabhramādityupaniṣat
147.14.p1
ityātharvaṇamahānārāyaṇopaniṣadi mahāmāyā'tītākhaṇḍādvaitaparamānandalakṣaṇaparabrahmaṇaḥ paramatattvasvanirūpaṇaṃ nāma caturtho'dhyāyaḥ
Commentaries (2)
- Aṣṭottaraśatopaniṣadvivaraṇa — Upaniṣadbrahmayogin, Sanskrit
- Vivaraṇa of Upaniṣadbrahmendrayogin — Upaniṣadbrahmendrayogin, Sanskrit
Linked texts (2)
- Vaiṣṇavopaniṣad — Sanskrit
- Aṣṭottaraśatopaniṣadaḥ — Sanskrit