Pramāṇa · Search · About · API

Ashtottarashatopanishad 150

Aṣṭottaraśatopaniṣad 150

Language
Sanskrit

150.1

tata upāsakaḥ paramānandaṃ prāpa| sāvaraṇaṃ brahmāṇḍaṃ ca bhittvā paritaḥ samavalokya brahmāṇḍasvarūpaṃ nirīkṣya paramārthatastattattvarūpaṃ brahmajñānenāvabudhya samastavedaśāstretihāsapurāṇāni samastavidyājālāni brahmādayaḥ
surāḥ sarve samastāḥ paramarṣayaścāṇḍābhyantaraprapañcaikadeśameva varṇayanti
aṇḍasvarūpaṃ na jānanti | brahmāṇḍādbahiḥ prapañcajñānaṃ na jānantyeva
kuto'ṇḍāntarāntarbahiḥ prapañcajñānaṃ dūrato mokṣaprapañcajñānamavidyāprapañcajñānaṃ
ceti

150.2

kathaṃ brahmāṇḍasvarūpamiti

150.3

kukkuṭāṇḍākāraṃ mahadādisamaṣṭyākāramaṇḍaṃ tapanīyamayaṃ taptajāmbūnadaprabhamudyatkoṭidivākarābhaṃ caturvidhasṛṣṭyupalakṣitaṃ mahābhūtaiḥ pañcabhirāvṛtaṃ
mahadahaṃkṛtitamobhiśca mūlaprakṛtyā pariveṣṭitam

150.4

aṇḍabhittiviśālaṃ sapādakoṭiyojanapramāṇam | ekaikāvaraṇaṃ tathaiva

150.5

aṇḍapramāṇaṃ parito'yutadvayakoṭiyojanapramāṇaṃ mahāmaṇḍūkādyanantaśaktibhiradhiṣṭhitaṃ nārāyaṇakrīḍākantukaṃ paramāṇuvadviṣṇulokasusaṃlagnamadṛṣṭāśrutavividhavicitrānantaviśeṣairupalakṣitam

150.6

asya brahmāṇḍasya samantataḥ sthitānyetādṛśānyanantakoṭibrahmāṇḍāni
sāvaraṇāni jvalanti

150.7

caturmukhapañcamukhaṣaṇmukhasaptamukhāṣṭamukhādisaṃkhyākrameṇa sahasrāvadhimukhāntairnārāyaṇāṃśaiḥ rajoguṇapradhānairekaikasṛṣṭikartṛbhiradhiṣṭhitāni viṣṇumāyākhyairnārāyaṇāṃśaiḥ sattvatamoguṇapradhānairekaikasthitisaṃhārakartṛbhiradhiṣṭhitāni mahājalaughamatsyabudbudānantasaṅghavad bhramanti

150.8

krīḍāsaktajālakaratalāmalakavṛndavanmahāviṣṇoḥ karatale vilasantyanantakoṭibrahmāṇḍāni

150.9

jalayantrasthaghaṭamālikājālavanmahāviṣṇorekaikaromakūpāntareṣvanantakoṭibrahmāṇḍāni sāvaraṇāni bhramanti

150.10

samastabrahmāṇḍāntarbahiḥ prapañcarahasyaṃ brahmajñānenāvabudhya vividhavicitrānantaparamavibhūtisamaṣṭiviśeṣān samavalokyātyāścaryāmṛtasāgare nimajjya
niratiśayānandapārāvāro bhūtvā samastabrahmāṇḍajālāni samullaṅghyāmitāparicchinnānantatamaḥsāgaramuttīrya mūlāvidyāpuraṃ dṛṣṭvā vividhavicitrānantamahāmāyāviśeṣaiḥ pariveṣṭitām anantamahāmāyāśaktisamaṣṭyākārām anantadivyatejojvālājālairalaṃkṛtām anantamahāmāyāvilāsānāṃ paramādhiṣṭhānaviśeṣākārāṃ śaśvadamitānandācalopari vihāriṇīṃ
mūlaprakṛtijananīm avidyālakṣmīmevaṃ dhyātvā vividhopacārairārādhya
samastabrahmāṇḍasamaṣṭijananīṃ vaiṣṇāvīṃ mahāmāyāṃ namaskṛtya tayā
cānujñātaścoparyupari gatvā mahāvirāṭpadaṃ prāpa

150.11

mahāvirāṭsvarūpaṃ kathamiti

150.12

samastāvidyāpādako virāṭ

150.13

viśvataścakṣuruta viśvatomukho viśvatohasta uta viśvataspāt
saṃ bāhubhyāṃ namati saṃ patatrairdyāvāpṛthivī janayan deva ekaḥ

150.14

na sandṛśe tiṣṭhati rūpamasya na cakṣuṣā paśyati kaścanainam
hṛdā manīṣā manasā'bhiklṛpto ya enaṃ viduramṛtāste bhavanti

150.15

manovācāmagocaramādivirāṭsvarūpaṃ dhyātvā vividhopacārairārādhya tadanujñātaścoparyupari gatvā vividhavicitrānantamūlāvidyāvilāsānavalokyopāsakaḥ paramakautukaṃ prāpa

150.16

akhaṇḍaparipūrṇaparamānandalakṣaṇaparabrahmaṇaḥ samastasvarūpavirodhakāriṇī
aparicchinnatiraskariṇyākārā vaiṣṇavī mahāyogamāyā mūrtimaddhiranantamahāmāyājālaviśeṣaiḥ pariṣevitā| tasyāḥ puramatikautukamatyāścaryasāgarānandalakṣaṇamamṛtaṃ bhavati| avidyāsāgarapratibimbitanityavaikuṇṭhaprativaikuṇṭhamiva vibhāti

150.17

upāsakastatpuraṃ prāpya yogalakṣmīmaṅgamāyāṃ dhyātvā vividhopacārairārādhya
tayā sampūjitaścānujñātaścoparyupari gatvā anantayogamāyāvilāsānavalokyopāsakaḥ paramakautukaṃ prāpa

150.18

tata upari pādavibhūtivaikuṇṭhapuramābhāti| atyāścaryānantavibhūtisamaṣṭyākāram ānandarasapravāhairalaṅkṛtam amitataraṅgiṇyāḥ pravāhairatimaṅgalaṃ brahmatejoviśeṣākārairanantabrahmavanairabhitastatam anantanityamuktairabhivyāptam anantacinmayaprāsādajālasaṅkulam anādipādavibhūtivaikuṇṭhamevamābhāti| tanmadhye ca cidānandācalo vibhāti

150.19

tadupari jvalati niratiśayānandivyatejorāśiḥ| tadabhyantare paramānandavimānaṃ vibhāti| tadabhyantarasaṃsthāne cinmayāsanaṃ virājate| tatpadmakarṇikāyāṃ niratiśayadivyatejorāśyantarasamāsīnam ādinārāyaṇaṃ
dhyātvā vividhopacāraistaṃ samārādhya tenābhipūjitastadanujñātaścoparyupari
gatvā sāvaraṇamavidyāṇḍaṃ ca bhittvā'vidyāpādamullaṅghya vidyā'vidyayoḥ sandhau viṣvaksenavaikuṇṭhapuramābhāti

150.20

anantadivyatejojvālājālairabhito'niśaṃ prajvalantam anantabodhānandavyūhairabhitastataṃ śuddhabodhavimānāvalibhirvirājitam anantānandaparvataiḥ
paramakautukamābhāti| tanmadhye ca kalyāṇācalopari śuddhānandavimānaṃ
vibhāti| tadabhyantare divyamaṅgalāsanaṃ virājate| tatpadmakarṇikāyāṃ
brahmatejorāśyabhyantarasamāsīnaṃ bhagavadanantavibhūtividhiniṣedhaparipālakaṃ
sarvapravṛttisarvahetunimittakaṃ niratiśayānandalakṣaṇamahāviṣṇusvarūpam
akhilāpavargaparipālakam amitavikramam evaṃvidhaṃ viṣvaksenaṃ dhyātvā
pradakṣiṇanamaskārān vidhāya vividhopacārairārādhya tadanujñātaścoparyupari
gatvā vidyāvibhūtiṃ prāpya vidyāmayān anantavaikuṇṭhān parito'vasthitān brahmatejomayānavalokyopāsakaḥ paramānandaṃ prāpa

150.21

vidyāmayān anantasamudrān atikramya brahmavidyātaraṅgiṇīmāsādya tatra
snātvā bhagavaddhyānapūrvakaṃ punarnimajya mantramayaśarīramutsṛjya vidyā''nandamayāmṛtadivyaśarīraṃ parigṛhya nārāyaṇasārūpyaṃ prāpya ātmapūjāṃ
vidhāya brahmamayavaikuṇṭhavāsibhiḥ sarvairnityamuktaiḥ supūjitastato brahmavidyāpravāhairānandarasanirbharaiḥ krīḍānantaparvatairanantairabhivyāptaṃ brahmavidyāmayaiḥ sahasraṃ prākārairānandāmṛtamayairdivyagandhasvabhāvaiścinmayairanantabrahmavanairatiśobhitamupāsakastvevaṃvidhaṃ brahmavidyāvaikuṇṭhamāviśya tadabhyantarasthitātyantonnatabodhānandaprāsādāgrasthitapraṇavavimānoparisthitām
apārabrahmavidyāsāmrājyādhidevatām amoghanijamandakaṭākṣeṇā'nādimūlāvidyāpralayakarīm advitīyām ekām anantamokṣasāmrājyalakṣmīmevaṃ
dhyātvā pradakṣiṇanamaskārān vidhāya vividhopacārairārādhya puṣpāñjaliṃ
samarpya stutvā stotraviśeṣaistayā'bhipūjitastadanujñātaścoparyupāre gatvā
brahmavidyātīre gatvā bodhānandamayānanantavaikuṇṭhānavalokya niratiśayānandaṃ prāpya bodhānandamayānanantasamudrānatikramya gatvāgatvā brahmavaneṣu
paramamaṅgalācalaśreṇiṣu tato bodhānandavimānaparamparāsūpāsakaḥ paramānandaṃ
prāpa

Commentaries (2)

Linked texts (4)