Ashtottarashatopanishad 72
Aṣṭottaraśatopaniṣad 72
- Language
- Sanskrit
Contents
- 72.24 — 2 parts
72.1
tṛtīyo'dhyāyaḥ
ahamasmi paraścāsmi brahyāsmi prabhavo'smyaham
sarvalokaguruścāsmi sarvaloke'smi so'smyaham
72.2
ahamevāsmi siddho'smi śuddho'smi paramo'smyaham
ahamasmi sadā so'smi nityo'smi vimalo'smyaham
72.3
vijñāno'smi viśeṣo'smi somo'smi sakalo'smyaham
śubho'smi śokahīno'smi caitanyo'smi samo'smyaham
72.4
mānāvamānahīno'smi nirguṇo'smi śivo'smyaham
dvaitādvaitavihīno'smi dvandvahīno'smi so'smyaham
72.5
bhāvābhāvavihīno'smi bhāsāhīno'smi bhāsmyaham
śūnyāśūnyaprabhāvo'smi śobhanāśobhano'smyaham
72.6
tulyātulyavihīno'smi nityaḥ śuddhaḥ sadāśivaḥ
sarvāsarvavihīno'smi sāttviko'smi sadāsmyaham
72.7
ekasaṃkhyāvihīno'smi dvisaṃkhyāvānahaṃ na ca
sadasadbhedahīno'smi saṃkalparahito'smyaham
72.8
nānātmabhedahīno'smi hyakhaṇḍānandavigrahaḥ
nāhamasmi na cānyo'smi dehādirahito'smyaham
72.9
āśrayāśrayahīno'smi ādhārarahito'smyaham
bandhamokṣādihīno'smi śuddhabrahmāsmi so'smyaham
72.10
cittādisarvahīno'smi paramo'smi parātparaḥ
sadā vicārarūpo'smi nirvicāro'smi so'smyaham
72.11
akārokārarūpo'smi makāro'smi sanātanaḥ
dhyātṛdhyānavihīno'smi dhyeyahīno'smi so'smyaham
72.12
sarvapūrṇasvarūpo'smi saccidānandalakṣaṇaḥ
sarvatīrthasvarūpo'smi paramātmā'smyahaṃ śivaḥ
72.13
lakṣyālakṣyavihīno'smi layahīnaraso'smyaham
mātṛmānavihīno'smi meyahīnaḥ śivo'smyaham
72.14
na jagatsarvadraṣṭā'smi netrādirahito'smyaham
pravṛddho'smi prabuddho'smi prasanno'smi paro'smyaham
72.15
sarvendriyavihīno'smi sarvakarmakṛdapyaham
sarvavedāntatṛpto'smi sarvadā sulabho'smyaham
72.16
muditāmuditākhyo'smi sarvamaunaphalo'smyaham
nityacinmātrarūpo'smi sadā saccinmayo'smyaham
72.17
yatkiñcidapi hīno'smi svalpamapyati nāsmyaham
hṛdayagranthihīno'smi hṛdayāmbhojamadhyagaḥ
72.18
ṣaḍvikāravihīno'smi ṣaṭkośarahito'smyaham
ariṣaḍvargamukto'smi antarādantaro'smyaham
72.19
deśakālavimukto'smi digambarasukho'smyaham
nāsti nāsti vimukto'smi nakārasahito'smyaham
72.20
akhaṇḍākāśarūpo'smi akhaṇḍākāramasmyaham
prapañcayuktacitto'smi prapañcarahito'smyaham
72.21
sarvaprakāśarūpo'smi cinmātrajyotirasmyaham
kālatrayavimukto'smi kāmādirahito'smyaham
72.22
kāyikādivimukto'smi nirguṇaḥ kevalo'smyaham
muktihīno'smi mukto'smi mokṣahīno'smyahaṃ sadā
72.23
satyāsatyavihīno'smi sanmātrānnāsmyahaṃ sadā
gantavyadeśahīno'smi gamanādivivarjitaḥ
72.24
sarvadā samarūpo'smi śānto'smi puruṣottamaḥ
evaṃ svānubhavo yasya so'hamasmi na saṃśayaḥ
yaḥ śṛṇoti sakṛd vāpi brahmaiva bhavati svayam
72.24.p1
ityupaniṣat
72.24.p2
iti tṛtīyo'dhyāyaḥ
Commentaries (2)
- Aṣṭottaraśatopaniṣadvivaraṇa — Upaniṣadbrahmayogin, Sanskrit
- Vivaraṇa of Upaniṣadbrahmendrayogin — Upaniṣadbrahmendrayogin, Sanskrit
Linked texts (6)
- Īśādiviṃśottaraśatopaniṣadaḥ — Sanskrit
- Maitreyopaniṣad — Sanskrit
- Maitreyyupaniṣad — Sanskrit
- Aṣṭottaraśatopaniṣadaḥ — Sanskrit
- Maitreyopaniṣad Southern Recension — Sanskrit
- Mahāvākyaratnāvalī — Upaniṣadbrahmayogin 1715, Sanskrit