Chandogyadipika 35
Chāndogyadīpikā 35
- Language
- Sanskrit
35.p1
tasya ha vā etasyaivaṃ paśyata evaṃ manvānasyaivaṃ vijānata ātmataḥ prāṇa ātmata āśā''tmataḥ smara ātmata ākāśa ātmatasteja ātmata āpa ātmata āvirbhāvatirobhāvādātmato'nnamātmato balamātmato vijñānamātmato dhyānamātmataścittamātmataḥ saṃkalpa ātmato mana ātmato vāgātmato nāmā''tmato mantrā ātmataḥ karmāṇyātmata evedam̐ sarvamiti ||[1]
35.p2
tasmai mṛditakaṣāya tamasaspāraṃ darśayati bhagavān sanatkumāraḥ
35.p3
taṃ skanda ityācakṣate taṃ skanda ityācakṣate || [2]
35.p4
vedārthasya prakāśena tamohādaṃ nivārayan | pumarthāṃścaturo deyādvidyātīrthamaheśvaraḥ
35.p5
yasya niḥśvasitaṃ vedā yo vedebhyo'khilaṃ jagat | nirmame tamahaṃ vande vidyātīrthamaheśvaram
35.p6
atha yadidamasmin brahmapure daharaṃ puṇḍarīkaṃ veśma daharo'sminnantarākāśaḥ
35.p7
tasmin yadantastadanveṣṭavyaṃ tadvāva vijijñāsitavya miti ||[1]
35.p8
taṃ ced brūyuryadidamasminbrahmapure daharaṃ puṇḍarīkaṃ veśma daharo'sminnantarākāśaḥ kiṃ tatra vidyate yadanveṣṭavyaṃ yadvāva vijijñāsitavyamiti
35.p9
sa yad brūyāt ||[2] yāvānvā ayamākāśastāvāneṣo'ntarhṛdaya ākāśaḥ | ubhe asmin dyāvāpṛthivī antareva samāhite | ubhāvagniśca vāyuśca sūryācandramasāvubhau vidyunnakṣatrāṇi yaccāsyehāsti yacca nāsti sarvaṃ tadasmin samāhitamiti ||[3]
35.p10
taṃ ced brūyurasmiṃścedaṃ brahmapure sarvaṃ samāhitam̐ sarvāṇi ca bhūtāni sarve ca kāmā yadaitajjarā vā''pnoti pradhvam̐sate vā kiṃ tato'tiśiṣyata iti || [4]
35.p11
sa brūyānnāsya jarayaitajjīryati na vadhenāsya hanyate| etatsatyaṃ brahmapuramasmin kāmāḥ samāhitāḥ| eṣa ātmāpahatapāpmā virajo vimṛtyurviśoko vijighitso'pipāsaḥ satyakāmaḥ satyasaṃkalpaḥ
35.p12
yathā hyeveha prajā anvāviśanti yathānuśāsanaṃ yaṃ yamantamabhikāmā bhavanti ya janapadaṃ kṣetrabhāgaṃ taṃ tamevopajīvanti ||[5] tadyatheha karmajito lokaḥ kṣīyata evamevāmutra puṇyajito lokaḥ kṣīyate
35.p13
tadya ihā''tmānamanuvidya vrajantyetāśca satyān kāmāṃsteṣāṃ sarveṣu lokeṣu kāmacāro bhavati
35.p14
atha ha ihā''tmānamanuvidya vrajantyetāśca satyān kāmāṃsteṣāṃ sarveṣu lokeṣu kāmacāro bhavati || [6]
35.p15
ityaṣṭamādhyāyasya prathamaḥ khaṇḍaḥ