<!-- Pramāṇa, a library of Indian primary sources · https://indike.org/pramana/in.veda.upanisad.mukhya.differentupanisads.10 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Upaniṣads](https://indike.org/pramana/in.veda.upanisad) › [Principal (early) Upaniṣads](https://indike.org/pramana/in.veda.upanisad.mukhya) › [Different Upanishads](https://indike.org/pramana/in.veda.upanisad.mukhya.differentupanisads) › 10

# Different Upanishads 10: atha ṣaṣṭhī vallī

Different Upaniṣads 10

- **Language:** Sanskrit

### atha ṣaṣṭhī vallī

### [10.1](https://indike.org/pramana/in.veda.upanisad.mukhya.differentupanisads.10.1)

oṃ ūrdhvamūlo'vākśākha eṣo'śvatthaḥ sanātanaḥ  
tadeva śukraṃ tadbrahma tadevāmṛtamucyate

### [10.2](https://indike.org/pramana/in.veda.upanisad.mukhya.differentupanisads.10.2)

tasmim̐llokāḥ śritāḥ sarve tadu nātyeti kaścana| etadvai tat

### [10.3](https://indike.org/pramana/in.veda.upanisad.mukhya.differentupanisads.10.3)

yadidaṃ kiñca jagatsarvaṃ prāṇa ejati niḥsṛtam  
mahadbhayaṃ vajramudyataṃ ya etadviduramṛtāste bhavanti

### [10.4](https://indike.org/pramana/in.veda.upanisad.mukhya.differentupanisads.10.4)

bhayādasyāgnistapati bhayāttapati sūryaḥ  
bhayādindraśca vāyuśca mṛtyurdhāvati pañcamaḥ

### [10.5](https://indike.org/pramana/in.veda.upanisad.mukhya.differentupanisads.10.5)

iha cedaśakadboddhuṃ prāk śarīrasya visrasaḥ  
tataḥ sargeṣu lokeṣu śarīratvāya kalpate

### [10.6](https://indike.org/pramana/in.veda.upanisad.mukhya.differentupanisads.10.6)

yathā''darśe tathā''tmani yathā svapne tathā pitṛloke  
yathāpsu parīva dṛdṛśe tathā gandharvaloke chāyā''tapayoriva brahmaloke

### [10.7](https://indike.org/pramana/in.veda.upanisad.mukhya.differentupanisads.10.7)

indriyāṇāṃ pṛthagbhāvamudayāstamayau ca yat  
pṛthagutpadyamānānāṃ matvā dhīro na śocati

### [10.8](https://indike.org/pramana/in.veda.upanisad.mukhya.differentupanisads.10.8)

kiñca –  
indriyebhyaḥ paraṃ mano manasaḥ sattvamuttamam  
sattvādadhi mahānātmā mahato'vyaktamuttamam

### [10.6-2](https://indike.org/pramana/in.veda.upanisad.mukhya.differentupanisads.10.6-2)

avyaktāttu paraḥ puruṣo vyāpako'liṅga eva ca  
yajjñātvā mucyate janturamṛtatvaṃ ca gacchati

### [10.10](https://indike.org/pramana/in.veda.upanisad.mukhya.differentupanisads.10.10)

kathaṃ tarhi tasyāliṅgasya darśanaṃ syādityata āha—  
na saṃdṛśe tiṣṭhati rūpamasya na cakṣuṣā paśyati kaścanainam  
hṛdā manīṣā manasābhiklṛpto ya etadviduramṛtāste bhavanti

### [10.11](https://indike.org/pramana/in.veda.upanisad.mukhya.differentupanisads.10.11)

yadā pañcāvatiṣṭhante jñānāni manasā saha  
buddhiśca na viceṣṭate tamāhuḥ paramāṃ gatim

### [10.12](https://indike.org/pramana/in.veda.upanisad.mukhya.differentupanisads.10.12)

tāṃ yogamiti manyante sthirāmindriyadhāraṇām  
apramattastadā bhavati yogo hi prabhavāpyayau

### [10.13](https://indike.org/pramana/in.veda.upanisad.mukhya.differentupanisads.10.13)

naiva vācā na manasā prāptuṃ śakyo na cakṣuṣā  
astīti bruvato'nyatra kathaṃ tadupalabhyate

### [10.14](https://indike.org/pramana/in.veda.upanisad.mukhya.differentupanisads.10.14)

astītyevopalabdhavyastattvabhāvena cobhayoḥ  
astītyevopalabdhasya tattvabhāvaḥ prasīdati

### [10.15](https://indike.org/pramana/in.veda.upanisad.mukhya.differentupanisads.10.15)

yadā sarve pramucyante kāmā ye'sya hṛdi śritāḥ  
atha martyo'mṛto bhavatyatra brahma samaśnute

### [10.16](https://indike.org/pramana/in.veda.upanisad.mukhya.differentupanisads.10.16)

yadā sarve prabhidyante hṛdayasyeha granthayaḥ  
atha martyo'mṛto bhavatyetāvadanuśāsanam

### [10.17](https://indike.org/pramana/in.veda.upanisad.mukhya.differentupanisads.10.17)

śataṃ caikā hṛdayasya nāḍyastāsāṃ mūrdhānamabhiniḥsṛtaikā  
tayordhvamāyannamṛtatvameti viṣvaganyā utkramaṇe bhavanti

### [10.18](https://indike.org/pramana/in.veda.upanisad.mukhya.differentupanisads.10.18)

aṅguṣṭhamātraḥ puruṣo'ntarātmā sadā janānāṃ  
hṛdaye sanniviṣṭaḥ | taṃ svāccharīrātpravṛhenmuñjādiveṣīkāṃ dhairyeṇa taṃ vidyācchukramamṛtaṃ  
taṃ vidyācchukramamṛtamiti

### [10.16-2](https://indike.org/pramana/in.veda.upanisad.mukhya.differentupanisads.10.16-2)

mṛtyuproktāṃ naciketo'tha labdhvā vidyāmetāṃ  
yogavidhiṃ ca kṛtsnām| brahmaprāpto virajo'bhūdvimṛtyuranyo'pyevaṃ yo vidadhyātmameva

### [10.6-3](https://indike.org/pramana/in.veda.upanisad.mukhya.differentupanisads.10.6-3)

iti kaṭhopaniṣadi dvitīyādhyāye ṣaṣṭhī vallī samāptā

---
Source: [https://indike.org/pramana/in.veda.upanisad.mukhya.differentupanisads.10](https://indike.org/pramana/in.veda.upanisad.mukhya.differentupanisads.10) · Pramāṇa
