Different Upanishads 19
Different Upaniṣads 19
- Language
- Sanskrit
19.1
atha prathamamuṇḍake dvitīyaḥ khaṇḍaḥ:
tadetatsatyaṃ mantreṣu karmāṇi kavayo yānyapaśyaṃstāni tretāyāṃ bahudhā santatāni | tānyācaratha
niyataṃ satyakāmā eṣa vaḥ panthāḥ sukṛtasya loke
19.2
yadā lelāyate hyarciḥ samiddhe havyavāhane
tadājyabhāgāvantareṇāhutīḥ pratipādayet
19.3
yasyāgnihotramadarśamapaurṇamāsamacāturmāsyamanāgrayaṇamatithivarjitaṃ ca ahutamavaiśvadevamavidhinā
hutamaśraddhayā hutamāsaptamāṃstasya lokānhinasti
19.4
kālī karaালī ca manojavā ca sulohitā yā
ca sudhūmravarṇā | visphuliṅginī viśvarucī ca
devī lelāyamānā iti saptajihvāḥ
19.5
eteṣu yaścarate bhrājamāneṣu yathākālaṃ cāhutayo
hyādaḍhāyan | taṃ nayantyetāḥ sūryasya raśmayo yatra
devānāṃ patireko'dhivāsaḥ
19.6
ehyehīti tamāhutayaḥ suvarcasaḥ sūryasya raśmibhiryajamānaṃ vahanti| priyāṃ vācamabhivadantyo'rcayantya
eṣa vaḥ puṇyaḥ sukṛto brahmalokaḥ
19.7
plavā hyete adṛḍhā yajñarūpā aṣṭādaśoktamavaraṃ yeṣu
karma| etacchreyo ye'bhinandanti mūḍhā jarāmṛtyuṃ
te punarevāpi yanti
19.8
avidyāyāmantare vartamānāḥ svayaṃdhīrāḥ paṇḍitaṃ
manyamānāḥ| jaṃghanyamānāḥ pariyanti mūḍhā andhenaiva
nīyamānā yathāndhāḥ
19.9
avidyāyāṃ bahudhā vartamānā vayaṃ kṛtārthā ityabhimanyanti bālāḥ| yatkarmiṇo na pravedayanti rāgāttenāturāḥ kṣīṇalokāścyavante
19.10
iṣṭāpūrtaṃ manyamānā variṣṭhaṃ nānyacchreyo vedayante pramūḍhāḥ
nākasya pṛṣṭhe te sukṛte'nubhūtvemaṃ lokaṃ hīnataraṃ vā viśanti
19.11
tapaḥśraddhe ye hyupavasantyaraṇye śāntā vidvāṃso bhaikṣacaryāṃ
carantaḥ | sūryadvāreṇa te virajāḥ prayānti yatrāmṛtaḥ sa
puruṣo hyavyayātmā
19.12
parīkṣya lokānkarmacitān brāhmaṇo nirvedamāyānnāstyakṛtaḥ kṛtena | tadvijñānārthaṃ sa gurumevābhigacchet samitpāṇiḥ śrotriyaṃ brahmaniṣṭham
19.13
tasmai sa vidvānupasannāya samyak praśāntacittāya
śamānvitāya| yenākṣaraṃ puruṣaṃ veda satyaṃ provāca
tāṃ tattvato brahmavidyām
Linked texts (3)
- Mantrapuṣpa — Sanskrit
- Īśādyupaniṣadaḥ — Sanskrit
- Daśopaniṣad — Sanskrit