Pramāṇa · Search · About · API

Different Upanishads 7

Different Upaniṣads 7

Language
Sanskrit

Contents

7.1

ṛtaṃ pibantau sukṛtasya loke guhāṃ praviṣṭau parame parādhe
chāyātapau brahmavido vadanti pañcāgnayo ye ca triṇāciketāḥ

7.2

yaḥ seturījānānāmakṣaraṃ brahma yatparam | abhayaṃ
titīrṣatāṃ pāraṃ nāciketam̐ śakemahi

7.3

ātmānaṃ rathinaṃ viddhi śarīraṃ rathameva tu
buddhiṃ tu sārathiṃ viddhi manaḥ pragrahameva ca

7.4

indriyāṇi hayānāhurviṣayāṃsteṣu gocarān
ātmendriyamanoyuktaṃ bhoktetyāhurmanīṣiṇaḥ

7.5

yastvavijñānavānbhantyayuktena manasā sadā
tasyendriyāṇyavaśyāni duṣṭāśvā iva sāratheḥ

7.6

yastu vijñānavānbhavati yuktena manasā sadā
tasyendriyāṇi vaśyāni sadaśvā iva sāratheḥ

7.7

evamuktabuddhisārathidvaividhyena rathinā ātmanaḥ pratijñātaṃ gatidvaividhyamāha dvābhyām—
yastvavijñānavānbhavatyamanaskaḥ sadā'śuciḥ
na sa tatpadamāpnoti saṃsāraṃ cādhigacchati

7.8

kiñca—
yastu vijñānavān bhavati samanaskaḥ sadā śuciḥ
sa tu tatpadamāpnoti yasmādbhūyo na jāyate

7.8-2

ya ātmākhyo rathī eva vijñānavān śikṣitabuddhyākhyasārathiyuktaḥ
samanaskaḥ nigṛhītamanasahitaḥ sadā sarvadā śuciḥ śuddhacitto bhavati
sa tu sa coktaviśeṣaṇo rathā tatpadaṃ brahmarūpapadam āpnoti yāti yasmādbrahmasvarūpātpadādapracyutaḥ san bhūyaḥ punaḥ na jāyate notpadyate

7.9

vijñānasārathiryastu manaḥpragrahavānnaraḥ
so'dhvanaḥ pāramāpnoti tadviṣṇoḥ paramaṃ padam

7.10

indriyebhyaḥ parā hyarthā arthebhyaśca paraṃ manaḥ
manasastu parā buddhirbuddherātmā mahānparaḥ

7.11

mahataḥ paramavyaktamavyaktātpuruṣaḥ paraḥ
puruṣānna paraṃ kiṃcitsā kāṣṭhā sā parā gatiḥ

7.12

eṣa sarveṣu bhūteṣu gūḍhotmā na prakāśate
dṛśyate tvagrayā buddhyā sūkṣmayā sūkṣmadarśibhiḥ

7.13

yacchedvāṅmanasī prājñaḥ tadyacchejjñāna ātmani
jñānamātmani mahati niyacchettadyacchecchānta ātmani

7.14

uttiṣṭhata jāgrata prāpya varānnibodhata| kṣurasya dhārā
niśitā duratyayā durgaṃ pathastatkavayo vadanti

7.15

aśabdamasparśamarūpamavyayaṃ tathā'rasaṃ nityamagandhavacca yat| anādyanantaṃ mahataḥ paraṃ dhruvaṃ nicāyya taṃ mṛtyumukhātpramucyate

7.16

nāciketamupākhyānaṃ mṛtyuproktaṃ sanātanam
uktvā śrutvā ca medhāvī brahmaloke mahīyate

7.17

ya imaṃ paramaṃ guhyaṃ śrāvayedbrahmasaṃsadi
prayataḥ śrāddhakāle vā tadānantyāya kalpate

7.17.p1

iti tṛtīyā vallī ||3

Linked texts (9)