Different Upanishads 82

Different Upaniṣads 82

Language: Sanskrit

82.6 — 1 part

82.1

mano brahmetyupāsītetyadhyātmam| athādhidaivatamākāśo
brahmetyubhayamādiṣṭaṃ bhavatyadhyātmaṃ cādhidaivataṃ ca

manaḥpratīkaṃ brahmetyupāsīta | tatropalabhyamānatvāditi darśanamadhyātmamātmānamadhikṛtya pravartamānam | athānantaramadhidaivataṃ devatāviṣayamidamupāsanamākāśo brahmeti sūkṣmatvādisādharmyādityubhayam ādiṣṭamupadiṣṭaṃ bhavatyadhyātmaṃ cādhidaivataṃ ca

82.2

tadetaccatuṣpād brahma | vāk pādaḥ prāṇaḥ pādaścakṣuḥ pādaḥ
śrotraṃ pāda ityadhyātmam | athādhidaivatamagniḥ pādo
vāyuḥ pāda ādityaḥ pādo diśaḥ pāda ityubhayamevādiṣṭaṃ bhavatyadhyātmaṃ caivādhidaivataṃ ca

82.3

vāgeva brahmaṇaścaturthaḥ pādaḥ | so'gninā jyotiṣā bhāti
ca tapati ca | bhāti ca tapati ca kīrtyā yaśasā
brahmavarcasena ya evaṃ veda

82.4

prāṇa eva brahmaṇaścaturthaḥ pādaḥ | sa vāyunā jyotiṣā bhāti ca
tapati ca | bhāti ca tapati ca kīrtyā yaśasā brahmavarcasena ya
evaṃ veda

82.5

cakṣureva brahmaṇaścaturthaḥ pādaḥ | sa ādityena
jyotiṣā bhāti ca tapati ca | bhāti ca tapati ca kīrtyā
yaśasā brahmavarcasena ya evaṃ veda

82.6

śrotrameva brahmaṇaścaturthaḥ
pādaḥ | sa digbhirjyotiṣā bhāti ca tapati ca | bhāti ca tapati
ca kīrtyā yaśasā brahmavarcasena ya evaṃ veda

82.6.p1

iti pañcame aṣṭādaśaḥ khaṇḍaḥ || 18