Different Upanishads 9: atha pañcamī vallī

Different Upaniṣads 9

Language: Sanskrit

atha pañcamī vallī

9.1

oṃ puramekādaśadvāramajasyāvakracetasaḥ | anuṣṭhāya na śocati vimuktaśca vimucyate | etadvai tat

9.2

haṃsaḥ śuciṣadvasurantarikṣasaddhotā vediṣadatithirduroṇasat | nṛṣadvarasadṛtasadvyomasadabjā gojā ṛtajā adrijā ṛtaṃ bṛhat

9.3

ūrdhvaṃ prāṇamunnayatyapānaṃ pratyagasyati
madhye vāmanamāsīnaṃ viśve devā upāsate

9.4

asya visraṃsamānasya śarīrasthasya dehinaḥ
dehādimucyamānasya kimatra pariśiṣyate| etadvai tat

9.5

na prāṇena nāpānena martyo jīvati kaścana
itareṇa tu jīvanti yasminnetāvupāśritau

9.6

hanta ta idaṃ pravakṣyāmi guhyaṃ brahma sanātanam
yathā ca maraṇaṃ prāpya ātmā bhavati gautama

9.7

yonimanyee prapadyante śarīratvāya dehinaḥ
sthāṇumanye'nusaṃyanti yathākarma yathāśrutam

9.8

ya eṣa supteṣu jāgarti kāmaṃ kāmaṃ puruṣo nirmimāṇaḥ
tadeva śukraṃ tad brahma tadevāmṛtamucyate

9.9

tasmim̐llokāḥ śritāḥ sarve tadu nātyeti kaścana
etadvai tat

9.10

agniryathaiko bhuvanaṃ praviṣṭo rūpaṃ rūpaṃ pratirūpo babhūva
ekastathā sarvabhūtāntarātmā rūpaṃ rūpaṃ pratirūpo bahiśca

9.11

vāyuryathaiko bhuvanaṃ praviṣṭo rūpaṃ rūpaṃ pratirūpo babhūva
ekastathā sarvabhūtāntarātmā rūpaṃ rūpaṃ pratirūpo bahiśca

9.12

sūryo yathā sarvalokasya cakṣurna lipyate cākṣuṣairbāhyadoṣaiḥ
ekastathā sarvabhūtāntarātmā na lipyate lokaduḥkhena bāhyaḥ

9.13

eko vaśī sarvabhūtāntarātmā ekaṃ rūpaṃ bahudhā yaḥ karoti
tamātmasthaṃ ye'nupaśyanti dhīrāsteṣāṃ sukhaṃ śāśvataṃ netareṣām

tamātmasthaṃ buddhyau sthitaṃ ātmānaṃ ye dhīrāḥ vivekinaḥ anupaśyanti
ācāryopadeśānantaraṃ sākṣādanubhavanti teṣāṃ ātmasākṣātkāravatāṃ
śāśvataṃ nityaṃ sukhaṃ ātmānando bhavati netareṣāṃ anātmavidāmuktasukhaṃ
na bhavatītyarthaḥ

9.14

nityo'nityānāṃ cetanaścetanānāṃ eko bahūnāṃ
yo vidadhāti kāmān | tamātmasthaṃ ye'nupaśyanti
dhīrāsteṣāṃ śāntiḥ śāśvatī netareṣām

9.15

tadetaditi manyante'nirdeśyaṃ paramaṃ sukham
kathaṃ nu tadvijānīyāṃ kimu bhāti vibhāti vā

9.16

na tatra sūryo bhāti na candratārakaṃ nemā vidyuto
bhānti kuto'yamagniḥ| tameva bhāntamanubhāti
sarvaṃ tasya bhāsā sarvamidaṃ vibhāti

9.5-2

iti dvitīyādhyāye pañcamī vallī samāptā