Different Upanishads 99
Different Upaniṣads 99
- Language
- Sanskrit
99.1
śvetaketurhāruṇeyaḥ pañcālānāṃ samitimeyāya| ta ha pravāhaṇo
jaibaliruvāca ca kumārānu tvāśiṣat pitetyanu hi bhagava iti
99.1-2
śvetaketurnāmato ha aruṇasyāpatyamāruṇiḥ, tasyāpatyamāruṇeyaḥ pañcā
lānāṃ janapadānāṃ samitiṃ sabhāmeyāya jagāma | tamāgataṃ śvetaketuṃ ha
pravāhaṇo nāmato jībalasyāpatyaṃ jaivaliruvāca | kim ? he kumāra tvā tvāṃ
pitā anvaśiṣat anuśiṣṭavānityevamuktaḥ kumāra āha—anu hīti
anuśiṣṭo'smi he bhagava iti
99.2
vettha yadito'dhi prajāḥ prayantīti | na bhagava iti | vettha yathā
punarāvartanta 3 iti | na bhagava iti | vettha pathordevayānasya
pitṛyāṇasya ca vyāvartanā 3 iti | na bhagava iti
99.3
caturthaṃ pṛcchati—
vettha yathāsau loko na saṃpūryata 3 iti | na bhagava
iti | vettha yathā pañcamyāmāhutāvāpaḥ puruṣavacaso
bhavantīti | naiva bhagava iti
99.4
rājā''ha—
athānu kimanuśiṣṭo'vocathā yo hyetāni na vidyāt kathaṃ so'nuśiṣṭo bruvīteti | sa hāyastaḥ piturardhameyāya | tam̐ hovācānanuśiṣya vāva kila mā bhagavānabravīdanu tvāśiṣamiti
99.5
pañca mā rājanyabandhuḥ praśnānaprākṣīt | teṣāṃ naikaścanāśakaṃ vivaktumiti | sa hovāca yathā mā tvaṃ tadaitānavado yathāhameṣāṃ naikaścana
veda yadyahamimānavediṣyaṃ kathaṃ te nāvakṣyamiti
99.6
sa ha gautamo rājño'dhameyāya | tasmai ha prāśāyāhāṃ cakāra | sa ha
prātaḥ sabhāga udeyāya | tam̐ hovāca mānuṣyasya bhagavan gautama
vittasya varaṃ vṛṇīthā iti | sa hovāca tavaiva rājan mānuṣaṃ vittaṃ
yāmeva kumārasyānte vācamabhāṣathāstāmeva me brūhīti
99.6-2
tamāgataṃ gautamaṃ rājā ha uvāca | kiñca—he gautama bhagavan pūjāvaṃstvaṃ mānuṣasya manuṣyasambandhino vittasya varaṃ varaṇīyaṃ kāmaṃ vṛṇīthāḥ prārtha- yethāḥ | sa evamukto gautama uvāca | kim ? rājan mānuṣaṃ vittaṃ tavaiva tiṣṭhatu, kintu yāmeva vācaṃ praśnalakṣṇāṃ mama kumārasya tvamabhāṣathāḥ tāmeva vācaṃ me mahyaṃ brūhi upadiśa
99.7
sa ha kṛcchrī babhūva | taṃ ha ciraṃ vasetyājñāpayāñcakāra | taṃ hovāca yathā mā tvaṃ gautamāvado yatheyaṃ na prāk tvattaḥ purā vidyā brāhmaṇān gacchati tasmādu sarveṣu lokeṣu kṣatrasyaiva praśāsanamabhūditi tasmai hovāca
Linked texts (11)
- Chāndogyopaniṣad — Sanskrit
- Īśādiviṃśottaraśatopaniṣadaḥ — Sanskrit
- Chāndogyadīpikā — Sanskrit
- Aṣṭottaraśatopaniṣadaḥ — Sanskrit
- Sāmavedabrāhmaṇānyaṣṭau — Sanskrit
- Upaniṣads — Sanskrit
- Aṣṭāviṃśatyupaniṣad — Sanskrit
- Īśādyupaniṣadaḥ — Sanskrit
- Chāndogyopaniṣatkhaṇḍārtha — Sanskrit
- Chāndogyopaniṣad C — Rāmānuja Yatirāj, Sanskrit
- Īśādidvādaśopaniṣadaḥ — Sanskrit