<!-- Pramāṇa, a library of Indian primary sources · https://indike.org/pramana/in.veda.upanisad.mukhya.brhadaranyaka.madhukanda.7 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Upaniṣads](https://indike.org/pramana/in.veda.upanisad) › [Principal (early) Upaniṣads](https://indike.org/pramana/in.veda.upanisad.mukhya) › [Bṛhadāraṇyakopaniṣad](https://indike.org/pramana/in.veda.upanisad.mukhya.brhadaranyaka) › [Madhukanda](https://indike.org/pramana/in.veda.upanisad.mukhya.brhadaranyaka.madhukanda) › 7

# Madhukanda 7

Madhukāṇḍa 7

- **Language:** Sanskrit

## Contents

- [7.20](https://indike.org/pramana/in.veda.upanisad.mukhya.brhadaranyaka.madhukanda.7.20) — 1 part

### [7.1](https://indike.org/pramana/in.veda.upanisad.mukhya.brhadaranyaka.madhukanda.7.1)

oṃ || dṛptabālākirhānūcāno gārgya āsa sa hovācājātaśatruṃ kāśyaṃ brahma te bravāṇīti sa hovācājātaśatruḥ  
sahasrametasyāṃ vāci dadmo janako janaka iti vai janā  
dhāvantīti

### [7.2](https://indike.org/pramana/in.veda.upanisad.mukhya.brhadaranyaka.madhukanda.7.2)

sa hovāca gārgyo ya evāsāvāditye puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā atiṣṭhāḥ sarveṣāṃ bhūtānāṃ mūrdhā rājeti vā  
ahametamupāsa iti sa ya etamevamupāste'tiṣṭhāḥ sarveṣāṃ  
bhūtānāṃ mūrdhā rājā bhavati

### [7.3](https://indike.org/pramana/in.veda.upanisad.mukhya.brhadaranyaka.madhukanda.7.3)

sa hovāca gārgyo ya evāsau candre puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā  
bṛhanpāṇḍaravāsāḥ somo rājeti vā ahametamupāsa  
iti sa ya etamevamupāste'haraharha sutaḥ prasuto bhavati  
nāsyānnaṃ kṣīyate

### [7.4](https://indike.org/pramana/in.veda.upanisad.mukhya.brhadaranyaka.madhukanda.7.4)

sa hovāca gārgyo ya evāsau vidyuti puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhāstejasvīti vā ahametamupāsa iti sa ya etamevamupāste tejasvī ha bhavati tejasvinī hāsya prajā  
bhavati

### [7.5](https://indike.org/pramana/in.veda.upanisad.mukhya.brhadaranyaka.madhukanda.7.5)

sa hovāca gārgyo ya evāyamākāśe puruṣa etamevāhaṃ  
brahmopāsa iti sa hovācājātaśatrurmā maitasminsaṃvādiṣṭhāḥ pūrṇamapravartīti vā ahametamupāsa iti sa ya  
etamevamupāste pūryate prajayā paśubhirnāsyāsmāllokātprajodvartate

### [7.6](https://indike.org/pramana/in.veda.upanisad.mukhya.brhadaranyaka.madhukanda.7.6)

sa hovāca gārgyo ya evāyaṃ vāyau puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā  
indro vaikuṇṭho'parājitā seneti vā ahametamupāsa  
iti sa ya etamevamupāste jiṣṇurhāparājiṣṇurbhavatyanyatastyajāyī

### [7.7](https://indike.org/pramana/in.veda.upanisad.mukhya.brhadaranyaka.madhukanda.7.7)

sa hovāca gārgyo ya evāyamagnau puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā viṣāsahiriti vā ahametamupāsa iti sa ya  
etamevamupāste viṣāsahirha bhavati viṣāsahirhāsya  
prajā bhavati

### [7.8](https://indike.org/pramana/in.veda.upanisad.mukhya.brhadaranyaka.madhukanda.7.8)

sa hovāca gārgyo ya evāyamapsu puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhāḥ pratirūpa iti vā ahametamupāsa iti sa ya  
etamevamupāste pratirūpam̐ haivainamupagacchati nāpratirūpamatho pratirūpo'smājjāyate

### [7.9](https://indike.org/pramana/in.veda.upanisad.mukhya.brhadaranyaka.madhukanda.7.9)

sa hovāca gārgyo ya evāyamādarśe puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā  
rociṣṇuriti vā ahametamupāsa iti sa ya etamevamupāste rociṣṇurha bhavati rociṣṇurhāsya prajā bhavatyatho  
yaiḥ saṃnigacchati sarvām̐stānatirocate

### [7.10](https://indike.org/pramana/in.veda.upanisad.mukhya.brhadaranyaka.madhukanda.7.10)

sa hovāca gārgyo ya evāyaṃ yantaṃ paścācchabdo'nūdetyetamevāhaṃ brahmopāsa iti sa hovācājātaśatrurmā maitasminsaṃvadiṣṭhā asuriti vā ahametamupāsa iti sa ya  
etamevamupāste sarvam̐ haivāsmim̐lloka āyureti nainaṃ purā  
kālātprāṇo jahāti

### [7.19](https://indike.org/pramana/in.veda.upanisad.mukhya.brhadaranyaka.madhukanda.7.19)

sa hovāca gārgyo ya evāyaṃ dikṣu puruṣa etamevāhaṃ brahmopāsa iti sa hovācājātaśatrurmā maitasminsaṃvadiṣṭhā  
dvitīyo'napaga iti vā ahametamupāsa iti sa ya etamevamupāste dvitīyavānha bhavati nāsmādgaṇaśchidyate

### [7.12](https://indike.org/pramana/in.veda.upanisad.mukhya.brhadaranyaka.madhukanda.7.12)

sa hovāca gārgyo ya evāyaṃ chāyāmayaḥ puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā mṛtyuriti vā ahametamupāsa iti sa ya etamevamupāste sarvaṃ haivāsmim̐lloka āyureti nainaṃ purā  
kālānmṛtyurrāgacchati

### [7.13](https://indike.org/pramana/in.veda.upanisad.mukhya.brhadaranyaka.madhukanda.7.13)

sa hovāca gārgyo ya evāyamātmani puruṣa etamevāhaṃ  
brahmopāsa iti sa hovācājātaśatrurmā maitasminsaṃvadiṣṭhā ātmanvīti vā ahametamupāsa  
iti sa ya etamevamupāsta ātmanvī ha bhavatyātmanvinī hāsya prajā bhavati sa ha tūṣṇīmāsa  
gārgyaḥ

### [7.14](https://indike.org/pramana/in.veda.upanisad.mukhya.brhadaranyaka.madhukanda.7.14)

sa hovācājātaśatruretāvannū3 ityetāvaddhīti naitāvatā  
viditaṃ bhavatīti sa hovāca gārgya upa tvā  
yānīti

### [7.15](https://indike.org/pramana/in.veda.upanisad.mukhya.brhadaranyaka.madhukanda.7.15)

sa hovācājātaśatruḥ pratilomaṃ caitadyadbrāhmaṇaḥ kṣatriyamupeyādbrahma me vakṣyatīti vyeva tvā jñapayiṣyāmīti  
taṃ pāṇāvādāyottasthau tau ha puruṣa suptamājagmatustametairnāmabhirānmaṃtrayāṃcakre bṛhanpāṇḍaravāsaḥ soma  
rājanniti sa nottasthau taṃ pāṇinā''peṣaṃ bodhayāṃcakāra sa hottasthau

### [7.16](https://indike.org/pramana/in.veda.upanisad.mukhya.brhadaranyaka.madhukanda.7.16)

sa hovācājātaśatruryatraiṣa etatsupto'bhūdya eṣa  
vijñānamayaḥ puruṣaḥ kvaiṣa tadā'bhūtkuta etadāgāditi  
tadu ha na mene gārgyaḥ

### [7.17](https://indike.org/pramana/in.veda.upanisad.mukhya.brhadaranyaka.madhukanda.7.17)

sa hovācājātaśatruryatraiṣa etatsupto'bhūdya eṣa  
vijñānamayaḥ puruṣastadeṣāṃ prāṇānāṃ vijñānena vijñānamādāya ya eṣo'ntarhṛdaya ākāśastasmiñchete tāni  
yadā gṛhṇātyatha haitatpuruṣaḥ svapiti nāma tadgṛhīta eva  
prāṇo bhavati gṛhītā vāggṛhītaṃ cakṣurgṛhīta1 śrotraṃ  
gṛhītaṃ manaḥ

### [7.18](https://indike.org/pramana/in.veda.upanisad.mukhya.brhadaranyaka.madhukanda.7.18)

sa yatraitatsvapnyayā carati te hāsya lokāstaduteva  
mahārājo bhavatyuteva mahābrāhmaṇa utevoccāvacaṃ  
nigacchati sa yathā mahārājo jānapadāngṛhītvā sve  
janapade yathākāmaṃ parivartetaivamevaiṣa etatprāṇāngṛhītvā  
sve śarīre yathākāmaṃ parivartate

### [7.19-2](https://indike.org/pramana/in.veda.upanisad.mukhya.brhadaranyaka.madhukanda.7.19-2)

atha yadā suṣupto bhavati yadā na kasyacana veda hitā  
nāma nāḍyo dvāsaptatiḥ sahasrāṇi hṛdayātpurītatamabhipratiṣṭhante tābhiḥ pratyavasṛpya purītati śete  
sa yathā kumāro vā mahārājo vā mahābrāhmaṇo vā'tighnīmānandasya gatvā śayītaivamevaiṣa etacchete

### [7.8-2](https://indike.org/pramana/in.veda.upanisad.mukhya.brhadaranyaka.madhukanda.7.8-2)

ityaṣṭamāhnikam

### [7.20](https://indike.org/pramana/in.veda.upanisad.mukhya.brhadaranyaka.madhukanda.7.20)

sa yathorṇanābhistantunoccaredyathā'gneḥ kṣudrā visphuliṅgā  
vyuccarantyevamevāsmādātmanaḥ sarve prāṇāḥ sarve lokāḥ  
sarve devāḥ sarvāṇi bhūtāni vyuccaranti tasyopaniṣa -  
tsatyasya satyamiti prāṇā vai satyaṃ teṣāmeṣa satyam

### [7.20.p1](https://indike.org/pramana/in.veda.upanisad.mukhya.brhadaranyaka.madhukanda.7.20.p1)

iti bṛhadāraṇyakopaniṣadi dvitīyādhyāyasya ajātaśatrunāmaprathamaṃ brāhmaṇam ||1

## Linked texts (7)

- [Mādhyandina](https://indike.org/pramana/in.veda.brahmana.satapatha*madhyandina.14.5.1.5) — Sanskrit
- [Īśādiviṃśottaraśatopaniṣadaḥ](https://indike.org/pramana/in.veda.upanisad.isadivimsottarasatopanisadah.1.34_1347) — Sanskrit
- [Mantrapuṣpa](https://indike.org/pramana/in.veda.svadhyaya.santi.mantrapuspa.12.5) — Sanskrit
- [Īśādidvādaśopaniṣadaḥ](https://indike.org/pramana/in.veda.upanisad.mukhya.isadidvadasopanisadah.141.5) — Sanskrit
- [Bṛhadāraṇyakopaniṣadbhāṣyavārttikasāra](https://indike.org/pramana/in.darsana.advaita.prakarana.early.vidyaranya.brhadaranyakopanisadbhasyavarttikasara.23.15-2) — Mādhava, Sanskrit
- [Īśādyupaniṣadaḥ](https://indike.org/pramana/in.veda.upanisad.mukhya.isadyupanisadah.194.5) — Sanskrit
- [Śatapathabrāhmaṇa or Bṛhadāraṇyakabrāhmaṇa](https://indike.org/pramana/in.veda.brahmana.satapatha.satapathabrahmanaorbrhadaranyakabrahmana.11.19) — Sanskrit

---
Source: [https://indike.org/pramana/in.veda.upanisad.mukhya.brhadaranyaka.madhukanda.7](https://indike.org/pramana/in.veda.upanisad.mukhya.brhadaranyaka.madhukanda.7) · Pramāṇa
