Mahaitareya 17
Mahaitareya 17
- Language
- Sanskrit
17.p1
sa īkṣateme nu lokāśca lokapālāścānnamebhyaḥ sṛjā iti || so'po'bhyapatat tābhyo'bhitaptābhyo mūrtirajāyata yā vai sā mūrtirajāyatānnaṃ vai tat tadetat parāṅtyajighāṃsat
17.p2
tad vācā'jighṛkṣat tannāśaknod vācā grahītuṃ sa yadvainad vācā'graiṣyadabhivyāhatya haivānnamatrapsyat tat prāṇenājighṛkṣat tannāśaknot prāṇena grahītuṃ sa yadvainat prāṇenāgraiṣyadabhiprāṇya haivānnamatrapsyat taccakṣuṣā'jighṛkṣat tannāśaknoccakṣuṣā grahītum || sa yadvainaccakṣuṣā'graiṣyad dṛṣṭvā haivānnamatrapsyat tacchrotreṇājighṛkṣat tannāśaknocchrotreṇa grahītum || sa yadvainacchrotreṇāgraiṣyacchutvā haivānnamatrapsyat tat tvacā'jighṛkṣat tannāśaknot tvacā grahītum || sa yadvainat tvacā'graiṣyat spṛṣṭvā haivānnamatrapsyat tanmanasā'jighṛkṣat tannāśaknonmanasā grahītum || sa yadvainanmanasā'grahaiṣyad dhyātvā haivānnamatrapsyat tacchiśnenājighṛkṣat tannāśaknocchiśnena grahītuṃ sa yadvainacchiśnenāgraiṣyad visṛjya haivānnamatrapsyat tadapānenājighṛkṣat tadāvayat saiṣo'nnasya graho yad vāyurannāyurvā eṣa yad vāyurannāyurvā eṣa yad vāyuḥ || upaniṣat-
17.p3
sarveṣāṃ prerako viṣṇuḥ
17.p4
sa īkṣata kathaṃ nvidaṃ madte syāditi īkṣata katareṇa prapadyā iti || sa īkṣata yadi vācābhivyāhṛtaṃ yadi prāṇenābhiprāṇitaṃ yadi cakṣuṣā dṛṣṭaṃ yadi śrotreṇa śrutaṃ yadi tvacā spṛṣṭaṃ yadi manasā dhyātaṃ yadyapānenābhyapānitam || yadi śiśnena visṛṣṭamatha ko'hamiti
17.p5
upaniṣat-
17.p6
jīvātmaśarīre paramātmā
17.p7
sa etameva sīmānaṃ vidāryaitayā dvārā prāpadyata saiṣā vidvatirnāma dvāstadetannāndanaṃ tasya traya āvasathāstrayaḥ svapnāḥ ayamāvasatho'yamāvasatho'yamāvasatha iti
17.p8
dātā'vasthātrayasyāsya jīvasya kramaśo vibhuḥ | suṣumnāyāṃ vāsudevo mūrdhanyeva vyavasthitaḥ | tasyāmeva brahmanāḍyāṃ sthito nārāyaṇaḥ prabhuḥ
17.p9
sa jāto bhūtānyabhivyairakhyat kimihānyaṃ vāvadiṣaditi sa etameva puruṣaṃ brahma tatamamapaśyadidamadarśamitī3 || tasmādindro nāmendro ha vai nāma tamindraṃ santamindra ityācakṣate parokṣeṇa parokṣapriyā iva hi devāḥ parokṣapriyā iva hi devāḥ
17.p10
iti śrīmanmahaitareyopaniṣadi dvitīyapraghaṭṭake caturtho'dhyāyaḥ