Mahaitareya 26
Mahaitareya 26
- Language
- Sanskrit
26.p1
sa brūyād viṣṇuvāyubhyāṃ sandhimicchantameva 'mām | sandhātuṃ nāśako yasmād hāsyatastvāmato hi tau ||' iti ca
26.p2
atha khalvāhurnirbhujavaktrāḥ pūrvamakṣaraṃ pūrvarūpamuttaramuttararūpaṃ yo'vakāśaḥ pūrvarūpottararūpe antareṇa sā saṃhiteti || sa ya evametāṃ saṃhitāṃ veda sandhīyate prajayā paśubhiryaśasā brahmavarcasena svargeṇa lokena sarvamāyuretyatha vayaṃ brūmo nirbhujavaktrā iti ha smā'ha hrasvo māṇḍūkeyaḥ || pūrvamevākṣaraṃ pūrvarūpamuttaramuttararūpaṃ yo'vakāśaḥ pūrvarūpottararūpe antareṇa yena sandhiṃ vivartayati yena svarāsvaraṃ vijānāti yena mātrāmātrāṃ vibhajate sā saṃhiteti || sa ya evametāṃ saṃhitāṃ veda sandhīyate prajayā paśubhiryaśasā brahmavarcasena svargeṇa lokena sarvamāyuretyatha hāsya putra āha madhyamaḥ prātībodhīputro'kṣare khalvime avikarṣannanekīkurvan yathāvarṇamāha || tad yā'sau mātrā pūrvarūpottararūpe antareṇa sandhevijñāpanī sāma tad bhavati sāmaivāhaṃ saṃhitāṃ manya iti
26.p3
tadapyetadṛṣiṇoktaṃ bṛhaspate na paraḥ sāmno viduriti || sa ya evametāṃ saṃhitāṃ veda sandhīyate prajayā paśubhiryaśasā brahmavarcasena svargeṇa lokena sarvamāyuriti
26.p4
iti pañcamaḥ khaṇḍaḥ
Linked texts (4)
- Śāṅkhāyanāraṇyaka — Sanskrit
- Bahvṛcāraṇyabhāṣya — Sanskrit
- Śāṅkhāyanīyopaniṣad — Sanskrit
- Aitareyāraṇyaka (Aitareya Mahīdāsa) — Aitareya Mahīdāsa, Sanskrit