Mahaitareya 8

Language: Sanskrit

8.p1

vaiśvadevyastato hyāpo varuṇaśca manobhavaḥ| prāṇināṃ pūrtapuṇyeṣu śraddhārūpamano'dhipaḥ|| evaṃ sarvā devatā hi viṣṇavaṅgebhyaḥ prajajñire| svotpattyaṅgaṃ ca te viṣṇoḥ śuśrūṣante pṛthakpṛthak|| viṣṇorviṣayadharmeṣu jñānādiṣu caturmukhaḥ| śraddhāṃ dadāti bhūtānāṃ vaidikaśravaṇe vipaḥ|| tāntrike śeṣarudrau ca śakro yajñādikarmaṇi| vāyurgandhavahaścāsya bhaktijñānapradastathā|| bhūtānāṃ tasya viṣaye tvantarikṣaṃ ca karmaṇaḥ| tadīyasyaiva bhogārthaṃ jīvānāṃ śruticāradam|| antarikṣaṃ ca vighneśaḥ sūryastatkarmasiddhaye| bhūtānāṃ jyotiṣo dātā dyaurapyannādyadāyinī

8.p2

vivecanīyam| 'vāyurasmai puṇyaṃ gandham' ityetad vyācaṣṭe- vāyuriti || bhūtavāyurasya gandhavahaḥ 'vāyurgandhānivāśrayād' ityādeḥ | mukhyavāyuḥ bhūtānāṃ tasya viṣaye bhakti-jñānaprada ityarthaḥ | 'antarikṣaṃ vā'nucaranti' ityādi vyācaṣṭe- antarikṣaṃ ceti || antarikṣaṃ ca tadīyasya pūjārūpasya karmaṇaḥ pradamityeko'rthaḥ | karma kimarthaṃ jīvānāṃ sukhabhogārthamityarthaḥ | etenāntarikṣamanusṛtya caranti bhakṣayanti | sukhamanubhavanti | cara gatibhakṣaṇayoriti dhātorityarthāntaramuktaṃ bhavati | prakārāntareṇa vyācaṣṭe- śruticāradamiti || dhvanyutpādanadvārā vedapravṛttipradamityarthaḥ | 'antarikṣamanuśrṛṇvanti' ityetad vyācaṣṭe- śruticāradamiti || śrutiḥ śrotrendriyaṃ tasya cāro vyāpāraḥ śravaṇam | yadvā, śrutiḥ śravaṇaṃ tadeva cāro vyāpārastatpradamityarthaḥ | 'ādityo'sya jyotiḥ prakāśam' ityetad vyācaṣṭe- sūrya iti || 'dyaurhāsmai vṛṣṭimannādyam' ityasyārthaḥ- dyauriti || apipadena vṛṣṭidāyinīti samuccinoti || 7

8.p3

iti saptamaṃ brāhmaṇam