Upanishads 1
Upaniṣads 1
- Language
- Sanskrit
1.1
oṃ pūrṇamadaḥ pūrṇamidaṃ pūrṇātpūrṇamudacyate || pūrṇasya pūrṇamādāya pūrṇamevāvaśiṣyate || oṃ śāntiḥ śāntiḥ śāntiḥ
oṃ īśāvāsyamidam̐ sarvaṃ yatkiṃca jagatyāṃ jagat || tena
tyaktena bhuñjīthā mā gṛdhaḥ kasya sviddhanam
1.2
kurvanneveha karmāṇi jijīviṣecchatam̐ samāḥ || evaṃ tvayi
nānyatheto'sti na karma lipyate nare
1.3
asuryā nāma
te lokā andhena tamasāvṛtāḥ || tām̐ste pretyābhigacchanti
ye ke cātmahano janāḥ
1.4
anejadekaṃ manaso javīyo
nainadevā āpnuvanpūrvamarṣat || taddhāvato'nyānatyeti tiṣṭhattasminnapo mātariśvā dadhāti
1.5
tadejati tannaijati
taddūre tadvantike || tadantarasya sarvasya tadu sarvasyāsya
bāhyataḥ
1.6
yastu sarvāṇi bhūtānyātmanyevānupaśyati
sarvabhūteṣu cātmānaṃ tato na vijugupsate
1.7
yasminsarvāṇi bhūtānyātmaivābhūdvijānataḥ | tatra ko mohaḥ kaḥ
śoka ekatvamanupaśyataḥ
1.8
sa paryagācchukramakāyamavraṇamasnāviram̐śuddhamapāpaviddham || kavirmanīṣī paribhūḥ
svayaṃbhūryāthātathyato'rthānvyadadhācchāśvatībhyaḥ samābhyaḥ
1.9
andhaṃ tamaḥ praviśanti ye'vidyāmupāsate || tato
bhūya iva te tamo ya u vidyāyām̐ ratāḥ
1.10
anyadevāhurvidyayānyadāhuravidyayā || iti śuśruma dhīrāṇāṃ
ye nastadvicacakṣire
1.11
vidyāṃ cāvidyāṃ ca yastadvedobhayam̐ sa ha | avidyayā mṛtyuṃ tīrtvā vidyayāmṛtamaśnute
1.12
andhaṃ tamaḥ praviśanti ye'saṃbhūtimupāsate || tato bhūya iva te tamo ya u saṃbhūtyām̐ ratāḥ
1.13
anyadevāhuḥ saṃbhavādanyadāhurasaṃbhavāt || iti
śuśruma dhīrāṇāṃ ye nastadvicacakṣire
1.14
saṃbhūtiṃ ca
vināśaṃ ca yastadvedobhayam̐ saha || vināśena mṛtyuṃ tīrtvā
saṃbhūtyāmṛtamaśnute
1.15
hiraṇmayena pātreṇa satyasyāpihitaṃ mukham || tattvaṃ pūṣannapāvṛṇu satyadharmāya dṛṣṭaye
1.16
pūṣannekarṣe yama sūryaprājāpatyavyūha raśmīnsamūha || tejo yatte rūpaṃ kalyāṇatamaṃ tatte paśyāmi yo'sāvasau puruṣaḥ so'hamasmi
1.17
vāyuranilamamṛtamathedaṃ
bhasmāntaraṃ śarīram || oṃ krato smara krataṃ smara krato
smara krataṃ smara
1.18
agne naya supathā rāye asmānviśvāni deva vayunāni vidvān || yuyodhyasmajjuhurāṇameno bhūyiṣṭhāṃ te namauktiṃ vidhema