Upanishads 220

Upaniṣads 220

Language: Sanskrit

220.38 — 1 part

220.1

janakañca ha vaidehaṃ yājñavalkyo jagāma sa mene na
vadiṣya ityatha ha yajjanakaśca vaideho yājñavalkyaścāgnihotre
samūdāte tasmai ha yājñavalkyo varaṃ dadau sa ha kāmapraśnameva
vavre tasmaihāsmai dadau tarha samrāḍeva pūrvaṃ papraccha

220.2

yājñavalkya kiṃjyotirayaṃ puruṣa iti ādityajyotiḥ
samrāḍiti hovācādityenaivāyaṃ jyotiṣāste palyayate karma
kurute vipalyetītyevamevaitadyājñavalkya

220.3

astamita āditye yājñavalkya kiṃjyotirevāyaṃ puruṣa iti candramā evāsya jyotirbhavatīti candramasaivāyaṃ jyotiṣāste palyayate
karma kurute vipalyetītyevamevaitadyājñavalkya

220.4

astamita
āditye yājñavalkya candramasyastamite kiṃjyotirevāyaṃ
puruṣa ityagnirevāsya jyotirbhavatītyagninaivāyaṃ jyotiṣāste
palyayate karma kurute vipalyetītyevamevaitadyājñavalkya

220.5

astamita āditye yājñavalkya candramasyastamite śānte'gnau kiṃjyotirevāyaṃ puruṣa iti vāgevāsya jyotirbhavatīti vācaivāyaṃ jyotiṣāste palyayate karma kurute vipajyetīti tasmādvai samrāḍapi yatra svaḥ pāṇiṃ vinirjyāyate'tha yatra vāguccaratyupaiva tatra nyetītyevamevaitadyājñavalkya

220.6

astamita āditye yājñavalkya candramasyastamite śānte'gnau śāntāyāṃ vāci kiṃjyotirevāyaṃ
puruṣa ityātmaivāsya jyotirbhavatītyātmainavāyaṃ jyotiṣāste palyayate karma kurute vipalyetīti

220.7

katamaātmeti yo'yaṃ vijñānamayaḥ prāṇeṣu hṛdyantarjyotiḥ
puruṣaḥ sa samānaḥ sannubhau lokāvanusaṃcarati dhyāyatīva
lelāyaṃtīva sa hi svapno bhūtvemaṃ lokamatikrāmati mṛtyo
rūpāṇi

220.8

sa vā ayaṃ puruṣo jāyamānaḥ śarīramabhisaṃpadyamānaḥ pāpmabhiḥ saṃsṛjyate sa utkrāman mriyaḥmāṇaḥ pāpmano vijahāti

220.9

tasya vā etasya
puruṣasya dve eva sthāne bhavata idaṃ ca paralokasthānaṃ ca
saṃndhyaṃ tṛtīyaḥ svapnasthānaṃ tasminsandhye sthāne tiṣṭhannete
ubhe sthāne paśyatīdaṃ ca paralokasthānaṃ ca atha yathākramo'yaṃ paralokasthāne bhavati tamākramākramyobhayān pāpmana
ānandām̐śca paśyati sa yatra prasvapityasya lokasya
sarvāvato mātrāmupādāya svayaṃ vihatya svayaṃ nirmāya
svena bhāsā svena jyotiṣā prasvapityatrāyaṃ puruṣaḥ svayaṃjyotirbhavati

220.10

na tatra rathā na rathayogā na panthāno
bhavantyatha rathānrathayogānpathaḥ sṛjate na tatrānandā
mudaḥ pramudo bhavantyathānandān mudaḥ pramudaḥ sṛjate
na tatra veśāntāḥ puṣkariṇyaḥ sravantyo bhavantyatha
veśantān puṣkariṇīḥ sravantīḥ sṛjate sa hi kartā

220.11

tadete ślokā bhavanti || svapnena śārīramabhiprahatyāsuptaḥ suptānabhicākaśīti || śukramādāya punareti
sthānam hiraṇmayaḥ puruṣa ekahaṃsaḥ

220.12

prāṇena
rakṣannavaraṃ kulāyaṃ bahiṣkulāyādamṛtaścaritvā || sa īyate'mṛto yatra kāmam hiraṇmayaḥ puruṣaḥ ekahaṃsaḥ

220.13

svapnānta uccāvacamīyamāno rūpāṇi devaḥ kurute bahūni
uteva strībhiḥ saha modamāno jakṣadutevāpi bhayāni
paśyan

220.14

ārāmasya paśyanti na taṃ paśyati
kaścaneti tannāyataṃ bodhayedityāhuḥ || durbhiṣajyam hāsmai
bhavati yameṣa na pratipadyate'tho khalvāhurjāgaritadeśa
evāsyaiṣa iti yāni hyeva jāgratpaśyati tāni supta ityatrāyaṃ puruṣaḥ svayaṃjyotirbhavati so'haṃ bhagavate sahasraṃ
dadāmyata ūrdhvaṃ vimokṣāya brūhīti

220.15

sa vā eṣa
etasmin saṃprasāde ratvā caritvā dṛṣṭvaiva puṇyaṃ ca pāpaṃ ca
punaḥ pratinyāyaṃ pratiyonyā dravati svapnāyaiva sa yattatra
kiṃcitpaśyatyananvāgatastena bhavatyasaṅgo hyayaṃ puruṣa ityevamevaitadyājñavalkya so'haṃ bhagavate sahasraṃ dadāmyata
ūrdhvaṃ vimokṣāyaiva brūhīti

220.16

sa vā eṣa etasmin
svapne ratvā caritvā dṛṣṭvaiva puṇyaṃ ca pāpaṃ ca punaḥ pratinyāyaṃ pratiyonyā dravati buddhāntāyaiva sa yattatra kiṃcieṣo'paśyatyananvāgatastena bhavatyasaṅgo hyayaṃ puruṣa ityevamevaivatadyājñavalkya so'haṃ bhagavate sahasraṃ dadāmyata ūrdhvaṃ
vimokṣāyaiva brūhīti

220.17

sa vā eṣa etasminbuddhānte ratvā caritvā dṛṣṭvaiva puṇyaṃ ca pāpaṃ ca punaḥ
pratinyāyaṃ pratiyonyādravati svapnāntāyaiva

220.18

tadyathā mahāmatsya ubhe kūle'nusaṃcarati pūrvaṃ cāparaṃ caivamevāyaṃ puruṣa etāvubhāvantāvanusaṃcarati svapnāntaṃ ca buddhāntaṃ
ca

220.19

tadyathā'sminnākāśe śyeno vā suparṇo vā
viparipatya śrāntaḥ saṃhatya pakṣau sallayāyaiva dhriyata
evamevāyaṃ puruṣa etasmā antāya dhāvati yatra supto
na kaṃcana kāmaṃ kāmayate na kaṃcana svapnaṃ paśyati

220.20

tā vā asyaitā hitā nāma nāḍyo yathā
keśaḥ sahasradhā bhinnastāvatāṇimnā tiṣṭhanti śuklasya
nīlasya piṅgalasya haritasya lohitasya pūrṇā atha yatrainaṃ
ghnantīva jinantīva hastīva vicchāyayati gartamiva patati
yadeva jāgradvayaṃ paśyati tadamrāvidyayā manyate'tha yatra
deva iva rājevāhamevedaṃ sarvo'smīti manyate so'sya
paramo lokaḥ

220.21

tadvā asyaitadaticchandā apahatapāpmā'bhayaṃ rūpaṃ tadyathā priyayā striyā saṃpariṣvakko na
bāhyaṃ kiṃcana veda nāntaramevamevāyaṃ puruṣaḥ prājñenātmanā
saṃpariṣvakko na bāhyaṃ kiṃcana veda nāntaraṃ tadvā asyaitadāptakāmamātmakāmamakāmaṃ rūpaṃ śokāntaram

220.22

atra pitā'pitā bhavati mātā'mātā lokā alokā
devā adevā vedā avedā atra steno'steno bhavati bhrūṇahā'bhrūṇahā cāṇḍālo'cāṇḍālaḥ paulkaso'paulkasaḥ śramaṇo
'śramaṇastāpaso'tāpasonanvāgataṃ puṇyenānanvāgataṃ pāpena
tīrṇo hi tadā sarvānchokānhṛdayasya bhavati

220.23

yadvaitanna paśyati paśyanvai tanna paśyati na hi draṣṭurdṛṣṭerviparilopo
vidyate'vināśitvānna tu taddvitīyamasti tato'nyaddvibhaktaṃ
yatpaśyet

220.24

yadvai tanna jighrati jighranvai tanna
jighrati na hi ghrāturghrāterviparilopo vidyate'vināśitvānna
tu taddvitīyamasti tato'nyaddvibhaktaṃ yajighret

220.25

yadvai tanna rasayate rasayanvai tanna rasayate nahi rasayitū
rasayaterviparilopo vidyate'vināśitvānna tu taddvitīyamasti tato'nyaddvibhaktaṃ yadrasayet

220.26

yadvai tanna vadati
vadanvai tanna vadati na hi vakturvakterviparilopo vidyate'vināśitvānna tu taddvitīyamasti tato'nyaddvibhaktaṃ yadvadet

220.27

yadvai tanna śṛṇoti śṛṇvanvai tanna śrṛṇoti na
hi śrotuḥ śruterviparilopo vidyate'vināśitvānna tu tadvitīyamasti tato'nyaddvibhaktaṃ yacchṛṇuyāt

220.28

yadvai
tanna manute manvāno vai tanna manute na hi manturmaterviparilopo vidyate'vināśitvānna tu tadvitīyamasti tato'nyaddvibhaktaṃ yanmanvīta

220.29

yadvai tanna spṛśāti
spṛśanvai tanna spṛśāti nahi spṛṣṭuḥ spṛṣṭerviparilopo
vidyate'vināśitvānna tu taddvitīyamasti tato'nyadvibhaktaṃ
yatspṛśet

220.30

yadvai tanna vijānāti vijānanvai tanna
vijānāti na hi vijñāturvijñāterviparilopo vidyate'vināśitvānna tu taddvitīyamasti tato'nyadvibhaktaṃ yadvijānīyāt

220.31

yatra vānyadiva syāttatrānyo'nyatpaśyedanyo'nyajighredanyo'nyadrasayedanyo'nyadvadedanyo'nyacchṛṇuyādanyo'nyanmanvītānyo'nyatspṛśedanyo'nyadvijānīyāt

220.32

salila eko draṣṭā'dvaito bhavatyeṣa brahmalokaḥ samrāḍiti
hainamanuśaśāsa yājñavalkya eṣāsya paramā gatireṣāsya
paramā saṃpadeṣo'sya paramo loka eṣo'sya parama ānanda
etasyaivānandasyānyāni bhūtāni mātrāmupajīvanti

220.33

sa yo manuṣyāṇām̐ rāddhaḥ samṛddho bhavatyanyeṣāmadhipatiḥ
sarvairmānuṣyakairbhogaiḥ saṃpannatamaḥ sa manuṣyāṇāṃ parama ānando'tha ye śataṃ manuṣyāṇāmānandāḥ sa ekaḥ pitṛṇāṃ
jitalokānāmānando'tha ye śataṃ pitṛṇāṃ jitalokānāmānandāḥ sa eko gandharvaloka ānando'tha ye śataṃ gandharvaloka ānandāḥ sa ekaḥ karmadevānāmānando yo karmaṇā
devatvamabhisaṃpadyante'tha ye śataṃ karma devānāmānandāḥ sa
eka ājānadevānāmānando yaśca śrotriyo'vṛjino'kāmahato'tha ye śatamājānadevānāmānandāḥ sa ekaḥ prajāpatiloka ānando yaśca śrotriyo'vṛjino'kāmahato'tha
ye śataṃ prajāpatiloka ānandāḥ sa eko brahmaloka
ānando yaśca śrotriyo'vṛjino'kāmahato'thaiṣa eva parama
ānanda eṣa brahmalokaḥ samrāḍiti hovāca yājñavalkyaḥ
so'haṃ bhagavate sahasraṃ dadāmyata ūrdhvaṃ vimokṣāyaiva
brūhītyatra ha yājñavalkyo bibhayāṃcakāra medhāvī rājā
sarvebhyo māntebhya udarautsīditi

Linked texts (9)

Īśādiviṃśottaraśatopaniṣadaḥ — Sanskrit
Kāṇva — Sanskrit
Aṣṭāviṃśatyupaniṣad — Sanskrit
Aṣṭottaraśatopaniṣadaḥ — Sanskrit
Bṛhadāraṇyakopaniṣadbhāṣyavārttikasāra — Mādhava, Sanskrit
Vājasaneyi bṛhadāraṇyaka — Sanskrit
Īśādyupaniṣadaḥ — Sanskrit
Īśādidvādaśopaniṣadaḥ — Sanskrit
Śatapathabrāhmaṇa or Bṛhadāraṇyakabrāhmaṇa — Sanskrit

Upanishads 220

Contents

Linked texts (9)