Upanishads 23

Upaniṣads 23

Language: Sanskrit

23.1

oṃ bhadraṃ karṇebhiḥ śṛṇuyāma devāḥ || bhadraṃ paśyemākṣabhiryajatrāḥ || sthirairaṅgaistuṣṭuvām̐sastanūbhiḥ || vyaśema
devahitaṃ yadāyuḥ || svasti na indro vṛddhaśravāḥ || svasti
naḥ pūṣā viśvavedāḥ || svasti nastākryo ariṣṭanemiḥ
svasti no bṛhaspatirdadhātu || oṃ śāntiḥ śāntiḥ śāntiḥ
omityetadakṣaramidam̐ sarvaṃ tasyopavyākhyānabhūtaṃ bhavadbhaviṣyaditi sarvamoṃkāra eva || yaccānyattrikālātītaṃ tadapyoṃkāra eva

23.2

sarvaṃ hyetadbrahyāyamātmā brahma
so'yamātmā catuṣpāt

23.3

jāgaritasthāno bahiḥprajñaḥ
saptāṅga ekonaviṃśatimukhaḥ sthūlabhugvaiśvānaraḥ prathamaḥ pādaḥ

23.4

svapnasthāno'ntaḥprajñaḥ saptāṅga ekonaviṃśatimukhaḥ
praviviktabhuk taijaso dvitīyaḥ pādaḥ

23.5

yatra supto na
kaṃcana kāmaṃ kāmayate na kaṃcana svapnaṃ paśyati tatsuṣuptam
suṣuptasthāna ekībhūtaḥ prajñānaghana evānandamayo hyānandabhuk cetomukhaḥ prājñastṛtīyaḥ pādaḥ

23.6

eṣa sarveśvara
eṣa sarvajña eṣo'ntaryāmyeṣa yoniḥ sarvasya prabhavāpyayau hi
bhūtānām

23.7

nāntaḥprajñaṃ na bahiḥprajñaṃ nobhayataḥprajñaṃ na
prajñānaghanaṃ na prajñaṃ nāprajñam || adṛṣṭamavyavahāryamagrāhyamalakṣaṇamacintyamavyapadeśyamekātmapratyayasāraṃ prapañcopaśamaṃ
śāntaṃ śivamadvaitaṃ caturthaṃ manyante sa ātmā sa vijñeyaḥ

23.8

so'yamātmā'dhyakṣaramoṅkāro'dhimātraṃ pādā mātrā mātrāśca
pādā akāra ukāro makāra iti

23.9

jāgaritasthāno
vaiśvānaro'kāraḥ prathamā mātrā''pterādimattvādvā''pnoti ha vai
sarvānkāmānādiśca bhavati ya evaṃ veda

23.10

svapnasthānastaijasa ukāro dvitīyā mātrotkarṣādubhayatvādvotkarṣati
ha vai jñānasaṃtatiṃ samānaśca bhavati nāsyābrahmavitkule
bhavati ya evaṃ veda

23.11

suṣuptasthānaḥ prājño makārastṛtīyā mātrā miterapītervā minoti ha vā idaṃ sarvamapītiśca bhavati ya evaṃ veda

23.12

amātraścaturtho'vyavahāryaḥ
prapañcopaśamaḥ śivo'dvaita evamoṅkāra ātmaiva saṃviśatyātmanātmānaṃ ya evaṃ veda ( ya evaṃ veda )

23.6-2

iti māṇḍūkyopaniṣat saṃpūrṇā
oṃ bhadraṃ karṇebhiḥ śṛṇuyāma devāḥ || bhadraṃ paśyemākṣabhiryajatrāḥ || sthirairaṅgaistuṣṭuvām̐sastanūbhiḥ || vyaśema
devahitaṃ yadāyuḥ || svasti na indro vṛddhaśravāḥ || svasti
naḥ pūṣā viśvavedāḥ || svasti nastākṣryo ariṣṭanemiḥ
svasti no bṛhaspatirdadhātu ||oṃ śāṃtiḥ śāṃtiḥ śāṃtiḥ
iti māṇḍūkyopaniṣatsamāptā

Upanishads 23

Linked texts (9)