Upanishads 252
Upaniṣads 252
- Language
- Sanskrit
Contents
- 252.23 — 1 part
252.1
svabhāvameke kavayo vadanti kālaṃ tathānye parimuhyamānāḥ | devasyaiṣa mahimā tu loke yenedaṃ bhrāmyate brahmacakram
252.2
yenāvṛtaṃ nityamidaṃ hi sarvaṃ jñaḥ kālakālo
guṇī sarvavidyaḥ | teneśitaṃ karma vivartateha pṛthvyapyatejo'nilakhāni cintyam
252.3
tatkarma kṛtvā vinivartya bhūyastattvasya tattvena sametya yogam | ekena dvābhyāṃ
tribhiraṣṭabhirvā kālena caivātmaguṇaiśca sūkṣmaiḥ
252.4
ārabhya karmāṇi guṇānvitāni bhāvāṃśca sarvānviniyojayedyaḥ | teṣāmabhāve kṛtakarmanāśaḥ karmakṣaye yāti sa p
tattvato'nyaḥ
252.5
ādiḥ sa saṃyoganimittahetuḥ pariṣvakālādakalo'pi dṛṣṭaḥ| taṃ viśvarūpaṃ bhavabhūtamīḍyaṃ devaṃ svacittasthamupāsya pūrvam
252.6
sa vṛkṣakālākṛtibhiḥ paro'nyo
yasmātprapañcaḥ parivartate yam| dharmāvahaṃ pāpanudaṃ bhageśaṃ jñātvātmasthamamṛtaṃ viśvadhāma
252.7
tamīśvarāṇāṃ paramaṃ maheśvaraṃ taṃ devatānāṃ paramaṃ ca daivatam| patiṃ patīnāṃ paramaṃ
parastādvidāma devaṃ bhuvaneśamīḍyam
252.8
na tasya
kāryaṃ karaṇaṃ ca vidyate na tatsamaścābhyadhikaśca dṛśyate
parāsya śaktirvividhaiva śrūyate svābhāvikī jñānabalakriyā
ca
252.9
na tasya kaścidpatirasti loke na ceśitā
naiva ca tasya liṅgam| sa kāraṇaṃ karaṇādhipādhipo na cāsya
kaścijjanitā na cādhipaḥ
252.10
yastūrṇanābha iva tantubhiḥ pradhānajaiḥ svabhāvataḥ| deva ekaḥ svamāvṛṇoti sa
no dadhātu brahmāpyayam
252.11
eko devaḥ sarvabhūteṣu gūḍhaḥ
sarvavyāpī sarvabhūtāntarātmā| karmādhyakṣaḥ sarvabhūtādhivāsaḥ sākṣī cetā kevalo nirguṇaśca
252.12
eko vaśī
niṣkriyāṇāṃ bahūnāmekaṃ bījaṃ bahudhā yaḥ karoti
tamātmasthaṃ ye'nupaśyanti dhīrāsteṣāṃ sukhaṃ śāśvataṃ netareṣām
252.13
nityo nityānāṃ cetanaścetanānāmeko
bahūnāṃ yo vidadhāti kāmān| tatkāraṇaṃ sāṃkhyayogādhigamyaṃ jñātvā devaṃ mucyate sarvapāśaiḥ
252.14
na tatra
sūryo bhāti na candratārakaṃ nemā vidyuto bhānti kuto'yamagniḥ | tameva bhāntamanubhāti sarvaṃ tasya bhāsā sarvamidaṃ vibhāti
252.15
eko haṃso bhuvanasyāsya madhye sa evāgniḥ salile saṃniviṣṭaḥ | tameva viditvātimṛtyumeti nānyaḥ panthā vidyate'yanāya
252.16
sa viśvakṛdviśvavidātmayonirjñaḥ kālakālo guṇī sarvavid yaḥ | pradhānakṣetrajñapatirguṇeśaḥ saṃsāramokṣasthitibandhahetuḥ
252.17
sa tanmayo hyamṛta īśasaṃstho jñaḥ sarvago bhuvanasyāsya goptā | ya īśe'sya jagato nityameva nānyo heturvidyata īśanāya
252.18
yo brahmāṇaṃ vidadhāti pūrvaṃ yo vai vedāṃśca prahiṇoti tasmai | taṃ ha devamātmabuddhiprakāśaṃ mumukṣurvai śaraṇamahaṃ prapadye
252.19
niṣkalaṃ niṣkriyaṃ śāntaṃ niravadyaṃ nirañjanam | amṛtasya paraṃ setuṃ dagdhendhanamivānalam
252.20
yadā carmavadākāśaṃ veṣṭayiṣyanti mānavāḥ | tadā devamavijñāya duḥkhasyānto bhaviṣyati
252.21
tapaḥprabhāvāddevaprasādācca brahma ha śvetāśvataro'tha vidvān | atyāśramibhyaḥ paramaṃ pavitraṃ provāca samyagṛṣisaṅghajuṣṭam
252.22
vedānte paramaṃ guhyaṃ purākalpe pracoditam | nāpraśāntāya dātavyaṃ nāputrāyāśiṣyāya vā punaḥ
252.23
yasya deve parā bhaktiryathā deve tathā gurau | tasyaite kathitā hyarthāḥ prakāśante mahātmanaḥ | prakāśante mahātmana iti
252.23.p1
iti śvetāśvataropaniṣatsu ṣaṣṭho'dhyāyaḥ
Linked texts (5)
- Śvetāśvataropaniṣad (Gita Press / Śrutiratnamālā e-text) — Sanskrit
- Aṣṭottaraśatopaniṣadaḥ — Sanskrit
- Aṣṭāviṃśatyupaniṣad — Sanskrit
- Īśādidvādaśopaniṣadaḥ — Sanskrit
- Aṣṭottaraśatopaniṣad — Sanskrit