Upanishads 1

yogarājaṃ pravakṣyāmi yogināṃ yogasiddhaye
mantrayogo layaścaiva rājayogo haṭhastathā

yogaścaturvidhaḥ prokto yogibhistattvadarśibhiḥ
āsanaṃ prāṇasaṃrodho dhyānaṃ caiva samādhikaḥ

etaccatuṣṭayaṃ viddhi sarvayogeṣu sammatam
brahmaviṣṇuśivādīnāṃ mantraṃ jāpyaṃ viśāradaiḥ

sādhyate mantrayogastu vatsarājādibhiryathā
kṛṣṇadvaipāyanādyaistu sādhito layasaṃjñitaḥ

navasveva hi cakreṣu layaṃ kṛtvā mahātmabhiḥ
prathamaṃ brahmacakraṃ syāt trirāvṛttaṃ bhagākṛti

apāne mūlakandāsyaṃ kāmarūpaṃ ca tajjaguḥ
tadeva vahnikuṇḍaṃ syāt tattvakuṇḍalinī tathā

tāṃ jīvarūpiṇīṃ dhyāyejjyotiṣṭhaṃ muktihetave
svādhiṣṭhānaṃ dvitīyaṃ syāccakraṃ tanmadhyagaṃ viduḥ

paścimābhimukhaṃ liṅgaṃ pravālāṅkurasannibham
tatroddīyāṇapīṭheṣu taṃ dhyātvākarṣayejjagat

tṛtīyaṃ nābhicakraṃ syāttanmadhye tu jagat sthitam
pañcāvarto madhyaśaktiṃ cintayedvidyudākṛti

tāṃ dhyātvā sarvasiddhīnāṃ bhājanaṃ jāyate budhaḥ
caturthaṃ hṛdaye cakraṃ vijñeyaṃ tadadhomukham

jyotīrūpaṃ ca tanmadhye haṃsaṃ dhyāyet prayatnataḥ
taṃ dhyāyato jagat sarvaṃ vaśyaṃ syānnātra saṃśayaḥ

pañcamaṃ kaṇṭhacakraṃ syāt tatra vāme iḍā bhavet
dakṣiṇe piṅgalā jñeyā suṣumnā madhyataḥ sthitā

tatra dhyātvā śuci jyotiḥ siddhīnāṃ bhājanaṃ bhavet
ṣaṣṭhaṃ ca tālukācakraṃ ghaṇṭikāsthānamucyate

daśamadvāramārge tadrājadantaṃ ca tajjñuḥ
tala śūnye layaṃ kṛtvā mukto bhavati niścitam

bhrūcakraṃ saptamaṃ vidyādvindusthānaṃ ca tadviduḥ
bhruvormadhye vartulaṃ ca dhyātvā jyotiḥ pramucyate

aṣṭamaṃ brahmarandhraṃ syāt paraṃ nirvāṇasūcakam
taṃ dhyātvā sūtikāgrāmaṃ dhūmākāraṃ vimucyate

tacca jālandharaṃ jñeyaṃ mokṣadaṃ nīlacetasam
navamaṃ vyomacakraṃ syādaśaiḥ ṣoḍaśabhiryutam

saṃviddhyūyācca tanmadhye śaktiruddhā sthitā parā
tatra pūrṇo girau pīṭhe śaktiṃ dhyātvā vimucyate

eteṣāṃ navacakrāṇāmekaikaṃ dhyāyato muneḥ
siddhayo muktisahitāḥ karasthāḥ sudine dine

eko daṇḍadvayaṃ madhye paśyati jñānacakṣuṣā
kadambagolakākāraṃ brahmalokaṃ vrajanti te

ūrdhvaśaktinipātena adhaḥśakternikuñcanāt
madhyaśaktiprabodhena jāyate paramaṃ sukhaṃ
jāyate paramaṃ sukham | iti

Linked texts (3)