Vrittamanjari 33
Vṛttamañjarī 33
- Language
- Sanskrit
33.1
ṣaṣṭhaḥ stavakaḥ
gaṇakusumam
gaṇa ekakalo nirūpyate dvikalaśca trikalaścatuṣkalaḥ
api pañcakalo'tha ṣaṭkalaḥ ṣaḍime jātyupayoginaḥ priye
33.2
astatandre śaraccandrapratidvandvimukhāmbuje
ekena laghunaivaiko gaṇa ekakalo mataḥ
33.3
guruṇaikena vā dvābhyāṃ laghubhyāṃ dvikalau gaṇau
dvāveva kathitau kānte chandaśśāstraviśāradaiḥ
33.4
laghunā guruṇā caiko guruṇā laghunāparaḥ
syustribhirlaghubhiścānyastrikalākhyā gaṇāstrayaḥ
33.5
dvyantamadhyādiguravaścaturlaghurapi priye
ete catuṣkalā nāma gaṇāḥ pañca prakīrttitā
33.6
eka ādilaghurmadhyagururanyo vaśaṃvade
aparo'ntaguruḥ kānte itaro'ntalaghuḥ pare
syurupāntadvitīyādiguravaśca priyaṃvade
syātpañcalaghurityaṣṭau smṛtāḥ pañcakalā gaṇāḥ
33.7
kānte trigururekaḥ syātsāntopāntagurustathā
sāntadvitīyagurukaḥ sādituryyagurustathā
syātpañcamaguruścāpi sādituryyalaghustathā
satṛtīyādigurukaścaturthagurūko'pi ca
sādidvitīyagurukastṛtīyagurureva ca
dvitīyagurukaścādigurukaḥ ṣallaghustathā
iti trayodaśavidhā jñātavyāḥ ṣaṭkalā gaṇāḥ
jñeyāḥ saptakalādyāśca prastārāccetprayojanam
33.8
proktā ekakalādyā ye ṣaṭkalāntā gaṇāstu te
ekadvitricatuḥpañcaṣaṭkalātmāna īritāḥ
33.6-2
tadutthāpanikāṃ bodhalāghavāya vyanajmi te
rekhābhyāmṛjuvakrābhyāṃ nirūḍhābhyāṃ laghau gurau