Pramāṇa · Search · About · API

Baudhayanagrihyasutra 1.1: atha prathamapraśne prathamo 'dhyāyaḥ

Baudhāyanagṛhyasūtra 1.1

Language
Sanskrit

atha prathamapraśne prathamo 'dhyāyaḥ

1.1.1

yatho etaddhutaḥ prahuta āhutaśśūlagavo baliharaṇaṃ pratyavarohaṇamaṣṭakāhoma iti sapta pākayajñasaṃsthā iti \1\

1.1.2

tā anu vyākhyāsyāmaḥ \2\

1.1.3

tatra yaddhūyate sa huto yathaitadvivāhassīmantonnayanaṃ ceti \3\

1.1.4

tatra hi hūyata eva \4\

1.1.5

atha yaddhutvā dīyate sa prahuto yathaitajjātakarma caulaṃ ceti \5\

1.1.6

tatra hi hutvā dīyata eva \6\

1.1.7

atha yuddhutvā datvā cādīyate sa āhutaḥ yathaitadupanayanaṃ samāvartanaṃ ceti \7\

1.1.8

tatra hi hutvā datvā cādīyate \8\

1.1.9

atha yacchūleṣūpanīya gavyāni śrapayanti sa śūlagavaḥ \9\

1.1.10

atha yat gṛhyābhyo devatābhyo 'nnaṃ sanprakriranti tat baliharaṇam \10\

1.1.11

atha yadṛto ṛtuṃ pratyavarohanti tat pratyavarohaṇam \11\

1.1.12

atha yadekāṣṭakāyāmannaṃ kriyate so 'ṣṭakāhoma iti \12\

1.1.13

vivāhaṃ vyākhyāsyāmaḥ \13\

1.1.14

udagayana āpūryamāṇapakṣe puṇye nakṣatre yugmān brāhmaṇān varān prahiṇoti prasugmantā dhiyasānasya sakṣaṇi varebhirvarām̐ abhiṣuprasīdata \ asmākamindra ubhayaṃ jujoṣati yatsaumyasyāndhaso bubodhati iti \14\

1.1.15

yato 'numantrayate anṛkṣarā ṛjavassantu panthā yebhissakhāyo yanti no vareyam \ samaryamā sambhago no ninīyātsañjāspatyam̐ suyamamastu devāḥ iti \15\

1.1.16

atha yadi dakṣiṇābhissaha dattā syānnātra varān prahiṇuyāt \16\

1.1.17

tāṃ pratigṛhṇīyāt prajāpatistriyāṃ yaśaḥ ityetābhiṣṣaḍbhiranucchandasam \17\

1.1.18

sarve māsā vivāhasya \18\

1.1.19

śucitapastapasyavarjamityeke \19\

1.1.20

rohiṇī mṛgaśīrṣamuttare phalgaunī svātīti vivāhasya nakṣatrāṇi \20\

1.1.21

punarvasū tiṣyo hastaśśroṇā revatītyanyeṣāṃ bhūtikarmaṇām \21\

1.1.22

yāni cānyāni puṇyoktāni nakṣatrāṇi teṣu pūrvedyurevarddhipūrteṣu yugmān brāhmaṇān bhojayet \22\

1.1.23

pradakṣiṇamupacāraḥ \23\

1.1.24

puṣpaphalākṣatamiśrairyavaistilārthamupaliṣyāṃ dadhyodanaṃ samprakīrya dakṣiṇaṃ jānuṃ bhūmau nidhāya savyamuddhṛtya iḍā devahūḥ iti japitvā nāndīmukhāḥ pitaraḥ priyantām iti vācayitvā adya vivāhaḥ iti brāhmaṇānannena pariviṣya puṇyāhaṃ svasti ṛddhim ityoṅkārapūrvaṃ tristrirekaikāmāśiṣo vācayitvā snāto 'hatavāso ganghānuliptassragvī bhuktavān pratodapāṇirapadātirgatvā vadhūjñātibhiratithivadarcitassnātāmahatavāsasāṃ gandhānuliptāṃ sragviṇīṃ bhuktavatīmiṣuhastāṃ dattāṃ vadhūṃ samīkṣate abhrātṛghnīṃ varuṇāpatighnīṃ bṛhaspate \ indrāputraghnīṃ lakṣmyaṃ tāmasyai savitassuva iti \24\

1.1.25

tayekṣyamāṇo japati aghoracakṣurapatighnyedhi śivā patibhyassumanāssuvarcāḥ \ jīvasūrdevakāmā syonā śaṃ no bhava dvipade śaṃ catuṣpade iti \25\

1.1.26

athaināmantareṇa bhrumukhe darbheṇa sammārṣṭi idamahaṃ yā tvayi patighnyalakṣmistāṃ nirdiśāmi iti \26\

1.1.27

darbhaṃ nirasyāpa upaspṛśyāthaināṃ dakṣiṇe haste gṛhṇāti mitro 'si iti \27\

1.1.28

athaināṃ devayajanamudānayati ekamiṣe viṣṇustvā 'nvetu \ dve ūrje viṣṇustvā 'nvetu \ trīṇi vratāya viṣṇustvā 'nvetu \ catvāri māyobhavāya viṣṇustvā 'nvetu \ pañca paśubhyo viṣṇustvā 'nvetu \ ṣaḍāyaspoṃṣāya viṣṇustvā 'nvetu \ saptabhyo hotrābhyo viṣṇustvā 'nvetu iti \28\

1.1.29

saptamaṃ padamupasaṅgṛhya japati sakhāyassaptapadā ubhūma sakhyaṃ te gameyaṃ sakhyātte mā yoṣaṃ sakhyānme mā yoṣṭhāḥ iti
iti bodhāyanīyagṛhyasūtre prathamapraśne prathamo 'dhyāyaḥ

Linked texts (2)