Baudhayanagrihyasutra 1.12: atha prathamapraśne dvādaśo 'dhyāyaḥ
Baudhāyanagṛhyasūtra 1.12
- Language
- Sanskrit
atha prathamapraśne dvādaśo 'dhyāyaḥ
1.12.1
athopanītasyāvratyāni bhavanti \1\
1.12.2
nānyasyocchiṣṭaṃ bhuñjītānyatra pitṛjyeṣṭhābhyām \2\
1.12.3
na striyā saha bhuñjīta \3\
1.12.4
madhumāṃsaśrāddhasūtakānnamanirdaśāhaṃ sandhinīkṣīraṃ chatrākaniryāsau vilayanaṃ gaṇānnaṃ gaṇikānnamityeteṣu punassaṃskāraḥ \4\
1.12.5
pratiṣiddhadeśagamanamityekeṣām \5\
1.12.6
athāpyudāharanti saurāṣṭraṃ sindhusauvīramavantīṃ dakṣiṇāpatham \ etāni brāhmaṇo gatvā punassaṃskāramarhati \ iti \6\
1.12.7
atha punassaṃskārān vyākhyāsyāmaḥ \7\
1.12.8
atha devayajanollekhanaprabhṛtyā 'gnimukhāt kṛtvā pālāśīṃ samidhamājyenāktvā 'bhyādhāpayan vācayti punastvā ' 'dityā rudrā vasavassamindhatāṃ punarbrahmāṇo vasunītha yajñaiḥ \ ghṛtena tvaṃ tanuvo vardhayasva satyāssantu yajamānasya kāmāssvāhā iti \8\
1.12.9
athāvratyaprāyaścitte juhoti yanma ātmano mindā 'bhūt punaragniścakṣuradāt iti dvābhyām \9\
1.12.10
atha pakvājjuhoti sapta te agne samidhassapta jihvāḥ iti \10\
1.12.11
athājyāhutīrupajuhoti yena devāḥ pavitreṇa iti tisṛbhiranucchandasam \11\
1.12.12
sviṣṭakṛtprabhṛti siddhamādhenuvarapradānāt \12\
1.12.13
athāparaḥ āparidhānātkṛtvā pālāśīṃ samidhamādhāyāvratyaprāyaścitte juhoti \13\
1.12.14
atha vyāhyatibhirjuhoti \14\
1.12.15
athāparaḥ brāhmaṇavacanādeva sāvitryā śatakṛtvo ghṛtamabhimantrya prāśya kṛtaprāyaścitto bhavati \15\
1.12.16
gurorvocchiṣṭaṃ bhuñjīta \16\
1.12.17
athāpyudāharanti vapanaṃ dakṣiṇādānaṃ mekhalādaṇḍamajinaṃ bhaikṣācaryā vratāni caitaāni nivartante punassaṃskārakarmaṇīti \17\
1.12.18
ete punassaṃskārā vyākhyātāḥ \18\
iti bodhāyanīye gṛhyaparibhāṣāsūtre prathamapraśne dvādaśo 'dhyāyaḥ