Pramāṇa · Search · About · API

Baudhayanagrihyasutra 1.6: atha prathamapraśne ṣaṣṭho 'dhyāyaḥ

Baudhāyanagṛhyasūtra 1.6

Language
Sanskrit

atha prathamapraśne ṣaṣṭho 'dhyāyaḥ

1.6.1

ānayantyetamagnim \1\

1.6.2

atha devayajanollekhanaprabhṛtyāpraṇītābhyaḥ kṛtvā padyāmodanaṃ pāyasaṃ vā yācati \2\

1.6.3

tamabhyukṣyāgnāvadhiśrayatiṃ \3\

1.6.4

ājyaṃ nirvapati \4\

1.6.5

athājyamadhiśrayati \5\

1.6.6

ubhayaṃ paryagni kṛtvā mekṣaṇaṃ struvaṃ ca saṃmārṣṭi \6\

1.6.7

athaitaṃ caruṃ śrapayitvā 'bhidhāryodañcamudvāsya pratiṣṭhitamabhighārayati \7\

1.6.8

paridhānaprabhṛtyāgnimukhāt kṛtvā pakvājjuhoti \8\

1.6.9

sa evameva sarveṣāṃ sthālīpākānāṃ carukalpaḥ \9\

1.6.10

yastvā hṛdā kīriṇā manyamānaḥ iti puronuvākyāmanūcya yasmai tvaṃ sukṛte jātavedaḥ iti yājyayā juhoti \10\

1.6.11

athājyāhutīrupajuhoti \11\

1.6.12

agne prāyaścitte tvaṃ devānāṃ prāyaścittirasi brāhmaṇastvā nāthakāmaḥ prapadye yā 'syāṃ patighnī tanūḥ prajāghnī paśughnī lakṣmighnī jāraghnīmasyai tāṃ kṛṇomi svāhā \12\

1.6.13

vāyo prāyaścitte tvaṃ devānāṃ prāyaścittirasi brāhmaṇastvā nāthakāmaḥ prapadye yā 'syāṃ patighnī tanūḥ prajāghnī paśughnī lakṣmighnī jāraghnīmasyai tāṃ kṛṇomi svāhā \13\

1.6.14

āditya prāyaścite tvaṃ devānāṃ prāyaścittirasi brāhmaṇastvā nāthakāmaḥ prapadye yā 'syāṃ patighnī tanūḥ prajāghnī paśughnī lakṣmighnī jāraghnīmasyai tāṃ kṛṇomi svāhā \14\

1.6.15

prajāpate prāyaścitte tvaṃ devānāṃ prāyaścittirasi brāhmaṇastvā nāthakāmaḥ prapadye yā 'syāṃ patighnī tanūḥ prajāghnī paśughnī lakṣmighnī jāraghnīmasyai tāṃ kṛṇomi svāhā iti \15\

1.6.16

pakvādeva sviṣṭavatībhyāṃ sauviṣṭakṛtam \16\

1.6.17

lājairitaratra \17\

1.6.18

havyavāhamabhimātiṣāhaṃ rakṣohaṇaṃ pṛtanāsu jiṣṇum \ jyotiṣmantaṃ dīdyataṃ purandhimagniṃ sviṣṭakṛtamāhuvemom \ sviṣṭamagne abhi tat pṛṇāhi viśvādeva pṛtanā abhiṣya \ uruṃ naḥ panthāṃ pradiśan vibhāhi jyotiṣmaddhehyajaraṃ na āyussvāhā iti \18\

1.6.19

jayaprabhṛti siddhamādhenuvarapradānāt \19\

1.6.20

athājyaśeṣeṇa hiraṇyamantardhāya mūrdhni saṃsrāvaṃ juhotibhūssvāhā bhuvassvāhā suvassvāhā bhūrbhuvassuvassvāhā iti \20\

1.6.21

athaināṃ pradakṣiṇamagniṃ paryāṇayati aryamṇo agniṃ pariyantu kṣipraṃ pratīkṣantāṃ śvaśruvo devarāśca iti \21\

1.6.22

atha śrīmantamagāraṃ sammṛṣṭopaliptaṃ gandhavantaṃ puṣpavantaṃ dhūpavantaṃ dīpavantaṃ talpavantaṃ sādhivāsaṃ dikṣu sarpissūtrendhanapradyotitamudakumbhādarśocchirasaṃ prapādya tasminnenāṃ saṃveśya tasyā antike japati \22\

1.6.23

udīrṣvāto viśvāvaso namaseḍāmahe tvā \ anyāmiccha prapharvyaṃ saṃ jāyāṃ patyā sṛja \ udīrṣvātaḥ pativatī hyeṣā viśvāvasuṃ namasā gīrbhirīṭṭe \ anyāmiccha pitṛṣadaṃ vyaktāṃ sa te bhāgo januṣā tasya viddhi iti \23\

1.6.24

athaināmupasaṃveśayati prajāpatisstriyāṃ yaśaḥ ityetayā \24\

1.6.25

athāsyāsatokotiṃ vivṛṇoti prajāyai tvā iti \25\

1.6.26

sā yadyaśru kuryāttāmanumantrayate jīvāṃ rudantī vimayanto adhvare dīrghāmanuprasitiṃ dīdhiyurnaraḥ \ vāmaṃ pitṛbhyo ya idaṃ samerire mayaḥ patibhyo janayaḥ pariṣvaje iti \26\
iti bodhāyanīye gṛhyasūtre prathamapraśne ṣaṣṭho 'dhyāyaḥ

Linked texts (3)