Pramāṇa · Search · About · API

Baudhayanagrihyasutra 2.14: dvitīyapraśne caturdaśo 'dhyāyaḥ

Baudhāyanagṛhyasūtra 2.14

Language
Sanskrit

dvitīyapraśne caturdaśo 'dhyāyaḥ

2.14.1

athāto mahāpuruṣasyāharahaḥ paricaryāvidhiṃ vyākhyāsyāmaḥ \1\

2.14.2

snātaśśuciśśucau same deśe gomayenopalipya devasya pratikṛtiṃ kṛtvākṣatapuṣpairyathālābhamarcayitvā saha puṣpodakena mahāpuruṣamāvāhayet oṃ bhūḥ puruṣamāvāhayāmyoṃ bhuvaḥ puruṣamāvāhayāmyoṃ suvaḥ puruṣamāvāhayāmyoṃ bhūrbhuvassuvaḥ puruṣamāvāhayāmi ityāvāhya āyātu bhagavān mahāpuruṣaḥ iti kuśairāsanaṃ dadyāt bhagavato 'yaṃ kūrco darbhamayastrivṛddharitassuvarṇastaṃ juṣasva iti \2\

2.14.3

atha sāvitryā pātramadbhiḥ prakṣāḷya tiraḥpavitramapa ānīya punastenaivāpo 'bhimantrya sapavitreṇādityaṃ darśayet om ityātamitoḥ \3\

2.14.4

tāsāṃ trīṇi padā vicakrame iti pādyaṃ dadāti \4\

2.14.5

atha vyāhṛtibhirnirvālyaṃ vyohya idaṃ viṣṇuvicakrame ityardhyaṃ dadyāt \5\

2.14.6

divo vā viṣṇo ityācamanīyam \6\

2.14.7

athainaṃ snāpayati āpo hiṣṭhā mayobhuvaḥ iti tisṛbhiḥ hiraṇyavarṇāśśucayaḥ pāvakāḥ iti catasṛbhiḥ pavamānassuvarjanaḥ ityetenānuvākena brahma jajñānam vāmadevyarcā yajuḥ pavitreṇa iti \7\

2.14.8

athādbhistarpayati keśavaṃ tarpayāmi iti dvādaśanāmadheyairvyāhṛtībhiḥ pradakṣiṇamudakaṃ pariṣicya praṇavena vāso dadāti sāvitryā yajñopavītaṃ idaṃ viṣṇurvicakrame ityācamanīyaṃ gandhadvārām iti gandhaṃ irāvatī ityakṣataṃ tadviṣṇoḥ iti puṣpaṃ sāvitryā dhūpaṃ uddīpyasva iti dīpaṃ devasya tvā iti havirnivedanam \8\

2.14.9

athāsmai dvādaśanāmabhiḥ puṣpāṇi dadyāt \ trīṇi padā vicakrame iti pratipadaṃ dadyāt sumṛḍīkā bhavantu naḥ ityantena \9\

2.14.10

athaina vaiṣṇavībhi ṛgyajussāmātharvabhiḥ stutibhistunvanti \10\

2.14.11

vyāhṛtībhiḥ puruṣamudvāsayet oṃ bhūḥ puruṣamudvāsayāmi ityādibhiḥ prayātu bhagavān mahāpuruṣaḥ kṣemāya vijayāya punassaṃdarśanāya ca iti \11\

2.14.12

pratimāsthāneṣvāvāhanodvāsanavarjamaharahastvācakṣata ityāha bhagavān bodhāyanaḥ \12\
iti bodhāyanīye gṛhyaśeṣe dvitīyapraśne caturdaśo 'dhyāyaḥ

Linked texts (3)