Baudhayanagrihyasutra 2.17: atha dvitīyapraśne saptadaśo 'dhyāyaḥ
Baudhāyanagṛhyasūtra 2.17
- Language
- Sanskrit
atha dvitīyapraśne saptadaśo 'dhyāyaḥ
2.17.1
athāto mahādevasyāharahaḥ paricaryāvidhiṃ vyākhyāsyāmaḥ snātaśśucissame śucau deśe gomayenopalipya devasya pratikṛtiṃ kṛtvā 'kṣatapuṣpairyathālābhamarcayitvā saha puṣpodakena mahādevamāvāhayet oṃ bhūḥ puruṣamāvāhayāmi ityādi āyātu bhagavān mahādevaḥ iti \1\
2.17.2
yo rudro agnau iti yajuṣā pātramabhimantrya prakṣāḷya tiraḥpavitramapa ānīya punastenaivābhimantrya saha pavitreṇādityaṃ darśayet om ityātamitoḥ \2\
2.17.3
tāsāṃ pādyam iti pādyaṃ dadāti \3\
2.17.4
atha vyāhṛtībhirnirmālyaṃ vyapohyārghyamācamanīyaṃ datvā 'bhiṣiñcati āpo hiṣṭhā mayobhuvaḥ iti tisṛbhiḥ hiraṇyavarṇāśśucayaḥ pāvakāḥ iti catasṛbhiḥ pavamānassuvarjanaḥ ityetenānuvākena brahma jajñānam kadrudāya tvaritarudraṃ vāmadevyaṃ āpo vā idam iti ca \4\
2.17.5
atha vyāhṛtībhiḥ pradakṣiṇamudakaṃ pariṣicya pavitraṃ pādamūle nidhāyādbhistarpayati bhavaṃ devaṃ tarpayāmi ityaṣṭābhiḥ \5\
2.17.6
oṃ namo bhagavate rudrāya tryambakāya iti vastrayajñopavīte dadyāt \6\
2.17.7
bhavāya devāya namaḥ ityaṣṭābhiḥ puṣpāṇi dadyāt \7\
2.17.8
tvaritarudreṇa gandhapuṣpadhūpadīpaṃ dadāti \8\
2.17.9
devasya tvā iti haviṣo nivedayet \9\
2.17.10
tryambakam iti pariṣekaṃ dadyāt \10\
2.17.11
amṛtopastaraṇamasi iti pratipadaṃ kṛtvā haviraviruddhaṃ sarvaṃ svādu vastu kandamūlaphalāni dadyāt \11\
2.17.12
muhūrtamanavekṣamāṇa āsīno havirudvāsayāmi iti nivedyamudvāsya amṛtāpidhānamasi iti pratipadaṃ kṛtvā trayambakam ityācamanīyaṃ dadyāt \12\
2.17.13
sarvopakaraṇairarcayitvā bhavāya devāya namaḥ ityādibhiḥ amuṣmai namo 'muṣmai namaḥ iti gandhādīn dadāti \13\
2.17.14
raudrībhiḥ ṛgyajussāmātharvabhisstutibhisstunvantyārṣaisstotraiśca namaskṛtya prayātu bhagavān mahādevaḥ iti visarjayati \14\
2.17.15
liṅgasthāneṣvāvāhanodvāsanavarjamaharahaḥ svastyayanamityācakṣata ityāha bhagavān bodhāyanaḥ \15\
iti bodhāyanīye gṛhyaśeṣasūtre dvitīyapraśne saptadaśo 'dhyāyaḥ
Linked texts (1)
- Smṛticandrikā — Devaṇṇabhaṭṭa, Sanskrit