Baudhayanagrihyasutra 2.19: atha dvitīyapraśne ekonaviṃśo 'dhyāyaḥ
Baudhāyanagṛhyasūtra 2.19
- Language
- Sanskrit
atha dvitīyapraśne ekonaviṃśo 'dhyāyaḥ
2.19.1
athātaḥ punaḥpratiṣṭhākalpaṃ vyākhyāsyāmaḥ pūrvokteṣu nakṣatreṣu yāni cānyāni śubhanakṣatrāṇi śuklapakṣa udagayane vasantādikāle pūrvaṃ pratiṣṭhitasyāpi buddhipūrvakamekarātraṃ dvirātramekamāsaṃ dvimāsaṃ vā 'rcanāvicchede śūdrarajasvalāpatitādyupaplave vā pūrvedyureva yugmān brāhmaṇānannena pariviṣya puṇyāhaṃ svasti ṛddhim iti vācayitvā samāgatāyāṃ niśāyāṃ jalādhivāsa kṛtvā śvobhūta utthāya dvau kalaśau sthāpayedekaṃ pañcagavyena pūrayitvā 'paraṃ śuddhodakena saha ratnena snāpayet \1\
2.19.2
aṣṭasahasramaṣṭaśatamaṣṭāviṃśatiṃ vā mūlamantreṇa rudragāyatryā snāpayitvā puṣpāṇi dadyādyathālābhamarcayitvā guḍodanaṃ nivedayet \2\
2.19.3
evaṃkṛte 'sya śāntirbhavati \3\
2.19.4
buddhipūrveṇārcanāvicchede snāpanaṃ kartavyam \4\
2.19.5
evaṃ kurvāṇaḥ svasti ṛddhimāpnotītyācakṣate \5\
2.19.6
evaṃ punaḥ pratiṣṭhāmantreṇa pratiṣṭhāpayedityāha bhagavān bodhāyanaḥ \6\
iti bodhāyanīye gṛhyaśeṣasūtre dvitīyapraśne ekonaviṃśo 'dhyāyaḥ