Baudhayanagrihyasutra 3.5: atha tṛtīyapraśne pañcamo 'dhyāyaḥ
Baudhāyanagṛhyasūtra 3.5
- Language
- Sanskrit
atha tṛtīyapraśne pañcamo 'dhyāyaḥ
3.5.1
prahutānukṛtirvāstuśamanam \1\
3.5.2
sa yatra daśoṣitvā prayāsyan bhavati daśabhyo vordhvaṃ sadārassāgnihotrikastadvāstoṣpatīyaṃ hutvā prayātīti \2\
3.5.3
sarva evā hitāgnirityeke \3\
3.5.4
yāyāvara ityeke \4\
3.5.5
yaccāgāraṃ kārayitvā prathamamadhyavasyettadvāstoṣpatīyena śamayitvā 'dhyavasyet \5\
3.5.6
tadu haike yajuṣā sthūṇā ucchrāyanti yajuṣā vaṃśān yajuṣā chadīṃṣi yajaṣābbhriṇaṃ yajuṣā talpadeśaṃ yajuṣā vāstumadhyaṃ yajaṣā 'juṣāgninidhānam \6\
3.5.7
sa yaṃdyuhaivaṃ kuryādyathā yajuṣocchriyante sadasyarksāmayajūṃṣyatharvaṇānyāṅgirasāni mithunīsaṃbhavantīti tadyadadhyavasyedyathā mithunīsambhavantāvadhyavasyettādṛktadyadyajuṣkṛtaṃ syāt \7\
3.5.8
ādhayo vyādhayo grahā upasargāścāhanyuḥ \8\
3.5.9
tasmāttūṣṇīmagāraṃ kārayitvā dvāradeśamalaṅkṛtya vāstumadhyaṃ vimāyābbhriṇaṃ pūrayitvā talpadeśaṃ kalpayitvottarapūrvadeśe 'gārasya gṛhyāgnimupasamādhāya samparistīryāgnimukhātkṛtvā pakvājjahoti vāstoṣpate pratijānīhyasmān iti puronuvākyāmanūcya vāstoṣpate śagmayā saṃsadā te iti yājyayā juhoti \9\
3.5.10
athājyāhutīrupajuhoti \10\
3.5.11
vāstoṣpate dhruvā sthūṇāṃ satraṃ somyānām \ drapso bhettā purāṃ śaśvatīnāmindro munīnāṃ sakhā svāhā \11\
3.5.12
gṛhyaṃ bhayaṃ yacceddvipātsu yadu ceccatuṣpātsu bhayaṃ yadasti \ agniryaviṣṭhyaḥ praṇudatu tadbhayaṃ śaṃ naḥ prajābhyaḥ śamu naḥ paśubhyassvāhā \12\
3.5.13
akṣispande 'ṅgacale ca yadbhayaṃ yadvaśite yadu ceddurukte \ agniryaviṣṭhyaḥ praṇudatu tadbhayaṃ śaṃ naḥ prajābhyaḥ śamu naḥ paśubhyassvāhā \13\
3.5.14
dussvapne pāpasvapne ca yadbhayaṃ svapnāśanaṃ yadamedhyadarśane \ agniryaviṣṭhyaḥ praṇudatu tadbhayaṃ śaṃ naḥ prajābhyaḥ śamu naḥ paśubhyassvāhā \14\
3.5.15
vāstoṣpate prataraṇo na edhi gayasphāno gobhiraśvebhirindo \ ajarāsaste sakhye syāma piteva putrān prati no juṣasva svāhā \15\
3.5.16
abhīvahā vāstoṣpate viśvārūpāṇyāviśan \ sakhā suśeva edhi nassvāhā \ iti \16\
3.5.17
sviṣṭakṛtprabhṛti siddhamādhenuvarapradānāt \17\
3.5.18
athāgreṇāgniṃ darbhastambeṣu hutaśeṣaṃ nidadhāti namo rudrāya vāstoṣpaye \ āyane vidrāvaṇe \ udyāne yatparāyaṇe \ āvartane nivartane \ yo gopāyati taṃ huve iti \18\
3.5.19
sthālīsaṃkṣāḷanamājyaśeṣamudakaśeṣaṃ ca pātryāṃ samānīyaudumbaraśākhayā palāśaśākhayā śamīśākhayā darbhamuṣṭinā vā sarvataḥ paryukṣan triḥ pradakṣiṇamagāraṃ paryeti tvaṃ vipraḥ tvaṃ kaviḥ tvaṃ viśvā rūpāṇi dhārayan apa janyaṃ bhayaṃ nuda iti \19\
3.5.20
annaṃ saṃskṛtya brāhmaṇān saṃpūjyāśiṣo vācayitvā śivaṃ vāstu śivaṃ vāstviti \20\
3.5.21
vāstuśamanaṃ vyākhyātam \21\
iti bodhāyanīyagṛhyasūtre tṛtīyapraśne pañcamo 'dhyāyaḥ
Linked texts (1)
- History of Dharmaśāstra (Ancient and Mediaeval Religious and Civil Law in India) — P. V. Kane, English