Bharadvajagrihyasutra 2.10

2.10.1

athāparāṇi dvārapopaspṛśa dvārapāya svāhā dvārapyupaspṛśa dvārapyai svāheti catvāryatha parṇapuṭaṃ kṛtvā tasminnupastīrṇābhighāritamodanapiṇḍaṃ samavadāya parogoṣṭhe vṛkṣa āsajati niṣaṅgiṇa upaspṛśata niṣaṅgibhyaḥ svāhetyathopatiṣṭhate namo niṣaṅgiṇa iṣudhimata ityapratīkṣametyāthānvāsāribhyo juhotyanvāsāriṇa upaspṛśatānvāsāribhyaḥ svāheti dve palāśe athopatiṣṭhate namaste rudra manyava ityetairekādaśabhiranuvākaiḥ prathamottamābhyāṃ vābhita etamagniṃ gā sthāpayati yathā dhūmamājighreyurityājyaśeṣamodanaśeṣamudakumbhaśeṣamityekadhā samavanīyodumbaraśākhayā pradakṣiṇaṃ gāstriḥ prokṣati śivaṃ gobhyaḥ śivaṃ gopataya ityṛṣabhasya pṛṣṭhe śeṣaṃ ninayatyetaṃ yuvānamityetābhiḥ pañcabhirathātaḥ kṣaitrapatyasya gavāṃ mārge 'nagnau kṣetrasya patiṃ yajate kṣetrasya pataye svāheti caturṣu saptasu vā palāśeṣu taṃ tathāvāhayati yathā śūlagavaṃ tūrṇaṃ yajate pāko deva upatiṣṭhate kṣetrasya patinā vayamiti dvābhyāmathainaṃ kṣaitrapatyaṃ ye sanābhayo bhavanti te prāśnanti yathā vaiṣāṃ kuladharmo bhavati \10\