Bharadvajagrihyasutra 3.15
Bhāradvājagṛhyasūtra 3.15
- Language
- Sanskrit
3.15.1
apareṇa gārhapatyamupaviśyādhīhi bho ityuktvā sāvitrīṃ sahasrakṛtva āvartayecchatakṛtvo vā daśavāraṃ vedādīnjapecchandāṃsi kūśmāṇḍāni cādhiyītāgnimīle purohitamityṛgvedasyeṣe tvorje tveti yajurvedasyāgna āyāhi vītaya iti sāmavedasya śanno devīrabhiṣṭaya ityatharvavedasyāgnirmūrdheti chandāṃsi yaddevā devaheḍanamiti kūśmāṇḍyo yadadhīte sa brahmayajño yajjuhoti sa devayajño yatpitṛbhyaḥ svadhā karoti sa pitṛyajño yadbhūtebhyo baliṃ harati sa bhūtayajño yadatithibhyo 'nnaṃ dadāti sa manuṣyayajña ityete vai pañca mahāyajñāḥ satati suprayuktā nayanti paramāṃ gatim etebhyo yasya pañcabhyo yajña eko 'pi hīyate \
3.15.2
manasvatyāhutistasya prāyaścittaṃ vidhīyate \
3.15.3
dvyahaṃ tryahaṃ vāpi pramādādakṛteṣu tisrastantumatīrhutvā catasro vāruṇīrjapeddaśāhaṃ dvādaśāhaṃ vā vichinneṣu svastyayaneṣu tu sarvaśaścatasro 'bhyāvartinīrhutvā kāryastāntumataścaruḥ
3.15.v-1a
yasya strī vānupeto vā gṛheṣvetānbalīnharet
3.15.v-1b
kūśmāṇḍyastatra hotavyā hutvā yajñasamṛddhaye
3.15.v-2a
pravāsaṃ gacchato yasya gṛhe kartā na vidyate
3.15.v-2b
pañcānāṃ mahatāmeṣāṃ sa yajñaiḥ saha gacchati
3.15.v-3a
pravāse kurute caitānyadannamupapadyate
3.15.v-3b
na cedutpadyate tvannamadbhirenānsamāpayet
3.15.v-4a
aḍbhireva vrataṃ kṛtvā yathālābhamanuvrataḥ
3.15.v-4b
devānāṃ devayajñena dvijā gacchanti sātmatām
3.15.v-5a
pitṝṇāṃ pitṛyajñena bhūtiyajñena bhūtīnām
3.15.v-5b
manormanuṣyayajñena brahmayajñena brahmaṇaḥ
3.15.v-6a
eteṣāṃ sātmatāṃ gatvā devatānāṃ śataṃ samāḥ
3.15.v-6b
ānandaṃ brahma gacchanti dhruvaṃ śāśvatamavyayamiti \15\
Linked texts (1)
- Baudhāyanagṛhyasūtra — Baudhāyana, Sanskrit