[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Ekagnikanda](https://indike.org/pramana/in.vedanga.kalpa.grhya.ekagnikanda) › 2.20601 # Ekagnikanda 2.20601 Ekāgnikāṇḍa 2.20601 - **Language:** Sanskrit ### [2.20601](https://indike.org/pramana/in.vedanga.kalpa.grhya.ekagnikanda.2.20601) pari̍ tvā'gre̱ pari̍mṛjā̱myāyu̍ṣā ca̱ dhane̍na ca | su̱pra̱jāḥ pra̱jayā̍ bhūyāsam̐ su̱vīro̍ vī̱raissu̱varcā̱ varca̍sā su̱poṣa̱ḥ poṣai̎ssu̱gṛho̍ gṛ̱haissu̱pati̱ḥ patyā̍ sume̱dhā me̱dhayā̍ su̱brahmā bra̍hmacā̱ribhi̍ḥ | a̱graye̍ sa̱midha̱māhā̍rṣaṃ bṛha̱te jā̱tave̍dase | yathā̱ tvama̍gre sa̱midhā̍ sami̱ddhyasa̍ e̱vaṃ māmāyu̍ṣā̱ varca̍sā sa̱nyā me̱dhayā̎ pra̱jayā̍ pa̱śubhi̍rbrahmavarca̱senā̱nnādye̍na̱ same̍dhaya̱ svāhā̎ | edho̎'syedhiṣī̱mahi̱ svāhā̎ | sa̱mida̍si samedhiṣī̱mahi̱ svāhā̎ | tejo̍si̱ tejo̱ mayi̍ dhehi̱ svāhā̎ | apo̍ a̱dyānva̍cāriṣa̱m̱̐ rase̍na̱ sama̍sṛkṣmahi | paya̍svām̐ agra̱ āga̍ma̱ntaṃ mā̱ sam̐sṛ̍ja̱ varca̍sā̱ svāhā̎ | saṃ mā̎'gre̱ varca̍sā sṛja pra̱jayā̍ ca̱ dhane̍na ca̱ svāhā̎ | vi̱dyunme̍ asya de̱vā indro̍ vi̱dyāthsa̱harṣi̍bhi̱ḥ svāhā̎ | a̱graye̍ bṛha̱te nākā̍ya̱ svāhā̎ | dyāvā̍pṛthi̱vībhyā̱m̱̐ svāhā̎ | e̱ṣā te̍ agre sa̱mittayā̱ varddha̍sva̱ cāpyā̍yasva ca̱ tayā̱'haṃ vardha̍māno bhūyāsamā̱pyāya̍mānaśca̱ svāhā̎ | yo mā̎'gre bhā̱ginam̐̍ sa̱ntamathā̍bhā̱giākī̍rṣati | abhā̱gama̍gre̱ taṃ ku̍ru̱ māma̍gre bhā̱gina̍ṃ kuru̱ svāhā̎ | sa̱midha̍mā̱dhāyā̎gre̱ sarva̍vrato bhūyāsa̱̱ svāhā̎ | bra̱hma̱cā̱rya̍syapo̍'śāna̱ karma̍ kuru̱ mā suṣu̍pthāḥ | bhi̱kṣā̱ca̱ryā̍rācāryādhī̱no bha̍va | yasya̍ te prathamavā̱syam̐̍ harā̍ma̱staṃ tvā̱ viśve̍ avantu de̱vāḥ | tantvā̱ bhrāta̍rassu̱vṛdho̱ vardha̍māna̱manu̍ jāyantāṃ ba̱hava̱ssujā̍tam || (6) - [Previous: 2.50500](https://indike.org/pramana/in.vedanga.kalpa.grhya.ekagnikanda.2.50500) - [Next: 2.60600](https://indike.org/pramana/in.vedanga.kalpa.grhya.ekagnikanda.2.60600) - [Up: 2](https://indike.org/pramana/in.vedanga.kalpa.grhya.ekagnikanda.2) ## Linked texts (2) - [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.1.3.4.16) — Baudhāyana, Sanskrit - [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.12.5.p2) — Sanskrit --- Source: [https://indike.org/pramana/in.vedanga.kalpa.grhya.ekagnikanda.2.20601](https://indike.org/pramana/in.vedanga.kalpa.grhya.ekagnikanda.2.20601) · Pramāṇa