[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Ekagnikanda](https://indike.org/pramana/in.vedanga.kalpa.grhya.ekagnikanda) › 2.20701 # Ekagnikanda 2.20701 Ekāgnikāṇḍa 2.20701 - **Language:** Sanskrit ### [2.20701](https://indike.org/pramana/in.vedanga.kalpa.grhya.ekagnikanda.2.20701) i̱ma stoma̱marha̍te jā̱tave̍dase̱ ratha̍miva̱ saṃma̍hemā manī̱ṣayā̎ | bha̱drā hi na̱ḥ prama̍tirasya sa̱m̱̐sadyagre̍ sa̱khye̍ māri̍ṣāmā va̱yaṃ tava̍ | tryā̱yu̱ṣaṃ ja̱mada̍greḥ ka̱śyapa̍sya tryāyu̱ṣam | yadde̱vānā̎ṃ tryāyu̱ṣantanme̍ astu tryāyu̱ṣam | śi̱vo nāmā̍si̱ svadhi̍tiste pi̱tā nama̍ste astu̱ mā mā̍ him̐sīḥ | u̱ṣṇena̍ vāyavuda̱kenetye̱ṣaḥ | i̱dama̱hama̱muṣyā̍muṣyāya̱ṇasya̍ pā̱pmāna̱mupa̍gūhā̱myutta̍ro̱'sau dvi̱ṣa̍ḥ | āpo̱ hi ṣṭhā ma̍yo̱bhuva̱ iti̍ ti̱sro hira̍ṇyavarṇā̱śśuca̍yaḥ pāva̱kā iti̍ ti̱sraḥ | a̱nnādyā̍ya̱ vyū̍haṃ dīrghā̱yura̱hama̍nnā̱do bhū̍yāsam | somo̱ rājā̱'yamāga̍ma̱thsa me̱ mukha̱ṃ prave̎kṣyati̱ bhage̍na sa̱havarca̍sā | soma̍sya ta̱nūra̍si ta̱nuva̍ṃ me pāhi̱ svāmā̍ ta̱nūrāvi̍śa | namo̎ gra̱hāya̍ cābhigra̱hāya̍ ca | nama̍śśākajā̱bhābhyā̎m | nama̱stābhyo̍ de̱vatā̎bhyo̱ yā a̍bhigrā̱hiṇī̎ḥ | a̱phsa̱rassu̱ yo ga̱ndho ga̍ndha̱rveṣu̍ ca̱ yadyaśa̍ḥ | daivo̱ yo mā̍nu̱ṣo ga̱ndhassa mā̍ ga̱ndhassu̍ra̱bhirju̍ṣatām | i̱yamoṣa̍dhe̱ trāya̍māṇā̱ saha̍mānā̱ saha̍svatī | sā mā̱ hira̍ṇyavarcasaṃ brahmavarca̱sina̍ṃ mā karotu | apā̍śo̱'syuro̍ me̱ mā sam̐śā̍rīḥ | śi̱vo mopa̍tiṣṭhasva dīrghāyu̱tvāya̍ śa̱taśā̍radāya | śa̱tam̐ śa̱ra̱ āyu̍ṣe̱ varca̍se jī̱vātvai puṇyā̍ya | re̱vatī̎stvā̱ vya̍kṣṇa̱nnitye̱tāḥ || (7) - [Previous: 2.60600](https://indike.org/pramana/in.vedanga.kalpa.grhya.ekagnikanda.2.60600) - [Next: 2.20700](https://indike.org/pramana/in.vedanga.kalpa.grhya.ekagnikanda.2.20700) - [Up: 2](https://indike.org/pramana/in.vedanga.kalpa.grhya.ekagnikanda.2) ## Linked texts (3) - [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.12.6.p1) — Sanskrit - [Hiraṇyakeśigṛhyasūtra](https://indike.org/pramana/in.vedanga.kalpa.grhya.hiranyakesi.1.3.11.3) — Hiraṇyakeśin, Sanskrit - [Kalpaḥ](https://indike.org/pramana/in.jaina.post.vidhi.mantra.kalpah.2.6.19.69_83) — Sanskrit --- Source: [https://indike.org/pramana/in.vedanga.kalpa.grhya.ekagnikanda.2.20701](https://indike.org/pramana/in.vedanga.kalpa.grhya.ekagnikanda.2.20701) · Pramāṇa