[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Ekagnikanda](https://indike.org/pramana/in.vedanga.kalpa.grhya.ekagnikanda) › 2.21701 # Ekagnikanda 2.21701 Ekāgnikāṇḍa 2.21701 - **Language:** Sanskrit ### [2.21701](https://indike.org/pramana/in.vedanga.kalpa.grhya.ekagnikanda.2.21701) indra̍ jahi danda̱śūka̍ṃ pa̱kṣiṇa̱ṃ yassa̍rīsṛ̱paḥ | da̱ṃkṣyantā̍ da̱śantā̱̍ sarvā̱m̱̐ stāni̍ndra jaṃbhaya̱ svāhā̎ | a̱phsujā̍ta̱ sare̍vṛddha de̱vānā̱mapi̍hastya | tvama̍gra indra̱ preṣi̍ta̱ssa no̱ mā him̐̍sī̱ḥ svāhā̎ | trāṇa̍masi pari̱trāṇa̍masi pari̱dhira̍si | anne̍na manu̱ṣyām̐̍ strāyase̱ tṛṇai̎ḥ pa̱śūnga̱rtena̍ sa̱rpān ya̱jñena̍ de̱vānthsva̱dhayā̍ pi̱tṝnthsvāhā̎ | tathsa̱tyaṃ yatte̍'māvā̱syā̍yāā paurṇamā̱syāā̱ viṣa̍ba̱lim̐ hara̍nti̱ sarva̍ udarasa̱rpiṇa̍ḥ | tatte̱ prera̍te̱ tvayi̱ saṃvi̍śanti̱ tvayi̍ nassa̱tastvayi̍ so̱ va̱rṣābhyo̍ na̱ḥ pari̍dehi | namo̍ astu sa̱rpebhya̱ iti̍ ti̱sraḥ | namo̍ astu sa̱rpebhyo̱ ye pārthi̍vā̱ ya ā̎ntari̱kṣyā̍ ye di̱vyā̍ ye di̱śyā̎ḥ | tebhya̍ i̱maṃ ba̱lim̐ ha̍riṣyāmi | tebhya̍ i̱maṃ ba̱lima̍hārṣam | takṣa̍ka̱ vaiśā̍leya dhṛ̱tarā̎ṣṭrairāvata̱ ste jī̍vā̱stvayi̍ nassa̱tastvayi̍ so̱ va̱rṣābhyo̍ na̱ḥ pari̍dehi | dhṛ̱tarā̎ṣṭrairāvata̱ takṣa̍ka̱ste vai̍śāle̱yo jī̍vā̱stvayi̍ nassa̱tastvayi̍ so̱ va̱rṣābhyo̍ na̱ḥ pari̍dehi | a̱hi̱m̱̐sā̱ti̱ba̱laste jī̍vā̱stvayi̍ nassa̱tastvayi̍ so̱ va̱rṣābhyo̍ na̱ḥ pari̍dehi | a̱ti̱ba̱lā̱hi̱m̱̐saste jī̍vā̱stvayi̍ nassa̱tastvayi̍ so̱ va̱rṣābhyo̍ na̱ḥ pari̍dehi | ye da̍nda̱śūkā̱ḥ pārthi̍vā̱stām̐stvami̱taḥ pa̱ro gavyū̍ti̱ṃ nive̍śaya | santi̱ vai na̍śśa̱phina̱ssanti̍ da̱ṇḍina̱ste vo̱ neddhi̱nasā̱nnyedyū̱yama̱smān hi̱nasā̍ta | sa̱mīcī̱ nāmā̍si̱ prācī̱ digghe̱tayo̱ nāma̱ stheti̱ dvāda̍śa paryā̱yāḥ | apa̍śvetapa̱dā ja̍hi̱ pūrve̍ṇa̱ cāpa̍reṇa ca | sa̱pta ca̱ mānu̍ṣīri̱māsti̱sraśca̍ rā̱jaba̍ndhavīḥ | na vai śve̱tasyā̎ddhyācā̱re'hi̍rja̱ghāna̱ kā̱na | śve̱tāya̍ vaida̱rvāya̱ namo̱ nama̍ḥ śve̱tāya̍ vaida̱rvāya̍ ||(17) - [Previous: 2.21600](https://indike.org/pramana/in.vedanga.kalpa.grhya.ekagnikanda.2.21600) - [Next: 2.21700](https://indike.org/pramana/in.vedanga.kalpa.grhya.ekagnikanda.2.21700) - [Up: 2](https://indike.org/pramana/in.vedanga.kalpa.grhya.ekagnikanda.2) ## Linked texts (2) - [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.12.16.p1) — Sanskrit - [Bhāradvājagṛhyasūtra](https://indike.org/pramana/in.vedanga.kalpa.grhya.bharadvaja.2.1.2) — Sanskrit --- Source: [https://indike.org/pramana/in.vedanga.kalpa.grhya.ekagnikanda.2.21701](https://indike.org/pramana/in.vedanga.kalpa.grhya.ekagnikanda.2.21701) · Pramāṇa