[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Ekagnikanda](https://indike.org/pramana/in.vedanga.kalpa.grhya.ekagnikanda) › 2.22001 # Ekagnikanda 2.22001 Ekāgnikāṇḍa 2.22001 - **Language:** Sanskrit ### [2.22001](https://indike.org/pramana/in.vedanga.kalpa.grhya.ekagnikanda.2.22001) pṛ̱thi̱vī te̱ pātra̱ṃ dyaura̍pi̱dhāna̱ṃ brahma̍ṇastvā̱ mukhe̍ juhomi brāhma̱ṇānā̎ntvā prāṇāpā̱nayo̎rjuho̱myakṣi̍tamasi̱ maiṣā̎ṃ kṣeṣṭhā a̱mutrā̱muṣmi̍llā̱ke | mā̱rjaya̍ntā̱ṃ mama̍ pi̱taro̍ mā̱rjaya̍ntā̱ṃ mama̍ pitāma̱hā mā̱rjaya̍ntā̱ṃ mama̍ prapitāma̱hāḥ | mā̱rjaya̍ntā̱ṃ mama̍ mā̱taro̍ mā̱rjaya̍ntā̱ṃ mama̍ pitāma̱hyo̍ mā̱rjaya̍ntā̱ṃ mama̍ prapitāma̱hya̍ḥ | e̱tatte̍ tatāsau̱ ye ca̱ tvāmanve̱tatte̍ pitāmahāsau̱ ye ca̱ tvāmanve̱tatte̎ prapitāmahāsau̱ ye ca̱ tvāmanu̍ | e̱tatte̍ mātarasau̱ yāśca̱ tvā manve̱tatte̍ pitāmahyasau̱ yāśca̱ tvāmanve̱tatte̎ prapitāmahyasau̱ yāśca̱ tvāmanu̍ | mā̱rjaya̍ntā̱ṃ mama̍ pi̱tara̱ itye̱te | ye ca̱ vo'tra̱ ye cā̱smāsvāśam̐̍sante̱ yāśca̱ vo'tra̱ yāścā̱smāsvāśam̐̍sante̱ te ca̍ vahantā̱ṃ tāśca̍ vahantā̱ṃ tṛpya̍ntu bhavanta̱stṛpya̍ntu bhavatya̱stṛpya̍ta̱ tṛpya̍ta̱ tṛpya̍ta | pu̱trānpautrā̍na̱bhi ta̱rpaya̍ntī̱rāpo̱ madhu̍matīri̱māḥ | sva̱dhāṃ pi̱tṛbhyo̍ a̱mṛta̱ṃ duhā̍nā̱ āpo̍ de̱vīru̱bhayām̐̍starpayantu | tṛpya̍ta̱ tṛpya̍ta̱ tṛpya̍ta | prā̱ṇe nivi̍ṣṭo̱'mṛta̍ṃ juhomi̱ brahma̍ṇi ma ā̱tmā'mṛ̍ta̱tvāya̍ | yāṃ janā̎ḥ prati̱nanda̍nti̱ rātri̍ṃ dhe̱numi̍vāya̱tīm | sa̱ṃva̱thsa̱rasya̱ yā patnī̱ sā no̍ astu suma̱lī svāhā̎ | vaha̍ va̱pāṃ jā̍tavedaḥ pi̱tṛbhyo̱ yatrai̱nān ve̎ttha̱ nihi̍tānparā̱ke | meda̍sa̱ḥ kūlyā̱ upa̱ tānkṣa̍rantu sa̱tyā e̍ṣāmā̱śiṣa̍ssantu̱ kāmai̱ssvāhā̎ | yāṃ janā̎ḥ pratinanda̱ntītye̱ṣā | i̱yame̱va sā yā pra̍tha̱mā vyauccha̱diti̍ ti̱sraḥ | e̱kā̱ṣṭa̱kāṃ pa̍śyata̱ doha̍mānā̱manna̍ṃ mā̱m̱̐sava̍dghṛ̱tava̍thsva̱dhāva̍t | tā̎hma̱ṇaira̍tipū̱tama̍na̱ntama̍kṣa̱yyama̱muṣmi̍llā̱ke sphīti̍ṃ gacchatu me pi̱tṛbhya̱ḥ svāhā̎ | au̱lū̱kha̱lā grāvā̍ṇo̱ ghoṣa̍makrata ha̱viḥ kṛ̱ṇvanta̍ḥ parivathsa̱rīṇa̎m | e̱kā̱ṣṭa̱kā tapa̍sā̱ tapya̍mānā saṃvathsa̱rasya̱ patnī̍ duduhe̱ prapī̍nā | taṃ doha̱mupa̍jīvātha pi̱tara̍ssa̱hasra̍dhārama̱muṣmi̍llā̱ke svāhā̎ || (20) - [Previous: 2.21900](https://indike.org/pramana/in.vedanga.kalpa.grhya.ekagnikanda.2.21900) - [Next: 2.22000](https://indike.org/pramana/in.vedanga.kalpa.grhya.ekagnikanda.2.22000) - [Up: 2](https://indike.org/pramana/in.vedanga.kalpa.grhya.ekagnikanda.2) ## Linked texts (5) - [Āgniveśyagṛhyasūtra](https://indike.org/pramana/in.vedanga.kalpa.grhya.agnivesya.3.2.6.1) — Agniveśa, Sanskrit - [Mādhyandina](https://indike.org/pramana/in.veda.samhita.suklayajur*vajasaneyi*madhyandina.35.20) — Sanskrit - [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.12.19.p1) — Sanskrit - [Hiraṇyakeśigṛhyasūtra](https://indike.org/pramana/in.vedanga.kalpa.grhya.hiranyakesi.2.5.15.9) — Hiraṇyakeśin, Sanskrit - [Bhāradvājagṛhyasūtra](https://indike.org/pramana/in.vedanga.kalpa.grhya.bharadvaja.2.13.3) — Sanskrit --- Source: [https://indike.org/pramana/in.vedanga.kalpa.grhya.ekagnikanda.2.22001](https://indike.org/pramana/in.vedanga.kalpa.grhya.ekagnikanda.2.22001) · Pramāṇa