<!-- Pramāṇa, a library of Indian primary sources · https://indike.org/pramana/in.vedanga.kalpa.grhya.krsnayajur.kathaka!devapala.26 -->

[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Gṛhyasūtras of the Black Yajurveda](https://indike.org/pramana/in.vedanga.kalpa.grhya.krsnayajur) › [Kāṭhakagṛhyasūtra](https://indike.org/pramana/in.vedanga.kalpa.grhya.krsnayajur.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.krsnayajur.kathaka!devapala) › 26

# Kathakagrihyasutra 26: atha aṣṭādaśī kāṇḍikā

Kāṭhakagṛhyasūtrabhāṣya 26

- **Language:** Sanskrit

### atha aṣṭādaśī kāṇḍikā

### [26.1](https://indike.org/pramana/in.vedanga.kalpa.grhya.krsnayajur.kathaka!devapala.26.1)

yajñamarhati yajñiyaḥ| 'yajñartvigbhyāṃ ghakhañau' (5.1.71) iti ghaḥ, yajñārhāṇāṃ vṛkṣāṇāṃ vaṭādīnāmanyatamasya sambandhinīṃ śākhāṃ sakṛdācchinnāṃ sūtratantunā prācyāṃ diśyāyatāṃ prasṛtāṃ sakṛdekenaiva prahāreṇa chinnāmekasāreṇa sūtratantunā pracchādya kanyāyai prayacchati 'devasya tvā' ityādinā 'tāṃ prayacchāmi' iti śabdāntena| gururgṛhītaśākhāṃ kanyāmanumantrayate 'yā te' ityādinā|  
he kanye yā te tava kācidalakṣmīralakṣaṇaṃ mātṛmayī pitṛmayī vā mātuḥ piturvā sakāśātsaṃkrāntā bījādidoṣāt anyato vā kutaścit saṃkrāntā, tāmahamanena mantreṇa nirbhajāmi tvāṃ prati nirbhāgāṃ karomi| kimekakaḥ| netyāha tiṣyeṇa devatayā sahakṛtaḥ, tathā nirṇudāmi niḥśeṣeṇa nudāmi apasārayāmi| sā cāpasāritā satī dviṣantaṃ tava śatruṃ gacchatu| alakṣaṇāpasāre codyatasya mama vighnāpasāraṇāya tiṣyabṛhaspatibhyāṃ namaskāro'stu| anye tu 'tiṣyabṛhaspatibhyāṃ namo namaḥ' ityetaṃ yajurekadeśamācchidya śākhotsarge'pi prayuñjate||

### [26.2](https://indike.org/pramana/in.vedanga.kalpa.grhya.krsnayajur.kathaka!devapala.26.2)

sthāvarodakaṃ taḍāgādi| tatra tasyāḥ śākhāyā utsargaḥ pratipattikarma śucau devagṛhe| devagṛhaṃ madyopahāraśoṇitādinā apavitramapi sambhāvyeta, tadarthaṃ śucigrahaṇam||  
|| iti aṣṭādaśī kāṇḍikā |

## Linked texts (1)

- [Kāṭhakagṛhyasūtra](https://indike.org/pramana/in.vedanga.kalpa.grhya.krsnayajur.kathaka.18.1) — Laugākṣi, Sanskrit

---
Source: [https://indike.org/pramana/in.vedanga.kalpa.grhya.krsnayajur.kathaka!devapala.26](https://indike.org/pramana/in.vedanga.kalpa.grhya.krsnayajur.kathaka!devapala.26) · Pramāṇa
