[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Commentary of Devapala](https://indike.org/pramana/in.vedanga.kalpa.grhya.kathaka!devapala-commentary) › 5 # Kathakagrihyasutra 5 Commentary of Devapāla 5 - **Language:** Sanskrit ### [5.1](https://indike.org/pramana/in.vedanga.kalpa.grhya.kathaka!devapala-commentary.5.1) vratasamāptyanantaramadhītavedena snātvā vivāhaḥ karttavyaḥ | kṛtavivāhasya pākayajñā āmnātāḥ | te cāgnau kriyante | jīvatpitṛkasya vaivāhāgnau vikalpaḥ | yo jīvatpitṛko yadā na dhārayate, tadā tenāgnyantaramutpādanīyamavaśyam, pitṛpramaye'gnyantarārjanaṃ ca paitṛkāgnyupaśamapūrvakamityupaśamanamāha | pitari prete eka evāsahāyaḥ śiṣyate paitṛko'gniḥ | tasyaikāgneḥ samādhānaṃ pratipattikarma karttavyaṃ putreṇaiva na tu purohitaprabhṛtibhiḥ | aparā vyākhyā-eka evāgniḥ paitṛko yasyāsti natu vaivāhanaḥ svayaṃ vṛttataḥ sa ekāgnirgṛhasthaḥ pramītapitṛkaḥ | samādhānaśabdastantreṇa dvayamāha-pūrvāgnestyāgamāvasathāgnerāharaṇam | yataḥ samyagādhānamarjanamapi anekārthatvāddhāttunipātānām | etadeva sphuṭayitumāha parameṣṭhī svāmī pitā | tasya pramaye putreṇaivāgneḥ samādhānaṃ śamanaṃ kartavyamityuktārtham | ### [5.3](https://indike.org/pramana/in.vedanga.kalpa.grhya.kathaka!devapala-commentary.5.3) ṛtvigbandhūnsarvān upa samīpe'gnervāsayet ### [5.4](https://indike.org/pramana/in.vedanga.kalpa.grhya.kathaka!devapala-commentary.5.4) uṣā rātriḥ vigatā uṣā yatra sa vyuṣaḥ sa prabhātakālaḥ | tasya samīpamupavyuṣamādityodayakālaṃ yāvat taṃ prakṛtamekāgniṃ jvālayet sandīpayet | yāvadyuṣā rātristāvat agniṃ prajvālayediti bhāvaḥ | ### [5.5](https://indike.org/pramana/in.vedanga.kalpa.grhya.kathaka!devapala-commentary.5.5) udakamiśramāṣacūrṇasaṃpāditena manthena audumbarakaṃsapātranikṣiptena tamagniṃ śamayet || virāṭpaṃktyau | brahmaṇa ārṣam | ṛgarthastuhavāmahe juhumaḥ devān hvayāmo vā | kān | savitāraṃ hiraṇyapāṇiṃ tathā vāyuṃ, indraṃ, prajāpatiṃ, aṅgirasaśca | kimartham | kravyādaṃ śamayantvagnim | ### [5.6](https://indike.org/pramana/in.vedanga.kalpa.grhya.kathaka!devapala-commentary.5.6) kāśānāṃ tṛṇaviśeṣāṇāṃ sambandhini ūte grathite kaṭe samāropya tat praśamitaikāgnibhasma sthāpayet gamayet kravyādamagnimiti triṣṭubhā | kāśānāṃ mūḍhakaṭa iti vā pāṭhaḥ | tatrāsamaasamūlāgratṛṇanirmitākāro mūḍhakaṭaḥ | ṛgarthastu-kravyādamāmamāṃsabhakṣakamagniṃ yajamānāddūraṃ prahiṇomi prakṣipāmi | yamarājñaḥ sambandhī yo'ripravāhaḥ pāvanicayasya voḍhā, so'nenaivāgninā saha dūraṃ gacchatu | itaraḥ punaryamāhariṣyāmi, ayamihaiva sthāne devebhyo havyaṃ vahatu prakarṣeṇa jānan | kīdṛśaḥ | jātavedā jātadhano jātajñāno vā | asmānmantraliṅgādakṛtavivāhasyāpi parameṣṭhipramaye'gmyantaraparigrahamicchanti | ### [5.7](https://indike.org/pramana/in.vedanga.kalpa.grhya.kathaka!devapala-commentary.5.7) nirdagdhamiti mantreṇa dakṣiṇāparasyāṃ diśi nairṛtyāṃ diśi yāmyapaścimadigantarāle yaścatuṣpathastatra nidhāya sthāpayitvā kāśakaṭanihitaṃ bhasma, upadhānaśabdavācyaṃ ca yat jīvataḥ pituḥ śiro'vaṣṭambhanaṃ gaḍukādikamāsīt | ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.45.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala-commentary.5](https://indike.org/pramana/in.vedanga.kalpa.grhya.kathaka!devapala-commentary.5) · Pramāṇa