Kathakagrihyasutra 100: atha dvāsaptatitamī kāṇḍikā
Kāṭhakagṛhyasūtrabhāṣya 100
- Language
- Sanskrit
atha dvāsaptatitamī kāṇḍikā
100.1
samyagupaghātaṃḥ samupahataṃ vyādhidurbhikṣaśatrūdyādistasmin sati, adbhute vā adbhutamakālotthamulkādhūmaketugaganāṅgaṇapaṭaharavākarṇanaduḥkhapnādyaniṣṭasūcakaṃ tasmiṃśca sati, śāntyai śāntyarthaṃ śamyādīni ṣoḍaśa dravyāṇi adbhiḥ saha saṃsṛjati miśrayatītyarthaḥ vānaspatyānyantarbhāvayatītyarthaḥ | pūrvamevoddhṛtya prokṣaṇakūrcaṃ kuryāt sadācārāt| sītā halavilikhitā bhūmistasyā loṣṭo mṛtpiṇḍaḥ | sammiśraṇaṃ tu, saṃ vaḥ sṛjāmīti dvābhyāṃ mantrābhyām | ājyabhāgānte cāyaṃ saṃsarga iṣṭaḥ |
100.2
yā oṣadhaya ityādinā anuvākena saṃyojyāloḍayatītyarthaḥ |
100.3
apāsmadityādibhiścatasṛbhiścagbhirājyabhāgānte samprokṣaṇaṃ tāvadekaṃ kuryāt| atha kasyedaṃ samprokṣaṇam | aśvebhājapuruṣarathagṛhakṣetraprabhṛteḥ, tathā sadācārāt -
pāramparyavaśāyāta ācāro vedapūrvakaḥ | pramāṇaṃ vedasaṃyogabhājāmācamanādivat |
100.4
devādbhuteṣu devāśrayeṣu candrādidoṣeṣu bhayanimitteṣu satsu yanno bhayamityaṣṭābhiḥ ṛgbhiḥ sthālīpākena aṣṭa āhutīrjuhuyāt |
100.5
tadanantaraṃ yaddevā ityādibhistisṛbhistisra āhutīranyāḥ sthālīpākasya juhuyāt |
100.6
catasra anyā āhutīḥ sthālīpākasya juhuyāt |
100.7
asminnevāvasare pūrvoktameva apāsmadetviti catasṛbhiḥ samprokṣaṇaṃ dvitīyaṃ kuryāt |
100.8
sthālīpākānantaramṛtutithyādayaḥ prāguktanayena sviṣṭakṛdaṅgabhūtāḥ kartavyāḥ | tato dhura upadhuraścānyā āhutayaḥ kāryāḥ | tataḥ sviṣṭakṛdāditantraṃ samāpanīyam | tatastṛtīyaṃ prokṣaṇaṃ kartavyamiti tātparyato jñeyam |
anuṣṭabhau | vedhaso vaiṣṇavasyārṣam | vaḥ yuṣmākaṃ śamīprabhṛtīnāṃ hṛdayaṃ sāraṃ saṃsṛjāmi saṃyojayāmi parasparaṃ sambaddhaṃ karomi yadvā sītādīnāṃ adhiṣṭhātryo devatāḥ saṃsṛjyante, tāsāṃ ca hṛdayādisambhavaḥ yajamānenāspadādisambandhanirūpeṇa, adharmāpasāraṇāya hṛdayādīnāmadbhiḥ saṃsarga āśāsyate | saṃsṛṣṭaṃ sambaddhamekakāryasampādanakṣamaṃ yuṣmākaṃ mano astu madīyaṃ yuṣmanmanobhiryuṣmadīyaṃ ca parasparam | evaṃ tanvastanavaḥ saṃsṛṣṭā yuṣmākaṃ santu | prāṇo jīvaḥ saṃsṛṣṭo bhavatu |
yā vo yuṣmākaṃ tanavastāḥ priyāḥ, tathā hṛdayāni cittāni priyāḥ priyāṇi sukhakārīṇi saṃsantu samyak bhavantu | madīyā api śarīrādayaḥ śāntikarmaṇi karaṇīye śreyaskarāḥ santu ityarthaḥ |
yā oṣadhaya ityādiranuvākaḥ | anuṣṭup chandaḥ | ātharvaṇasya bhiṣaja ārṣam | prādhānyādoṣadhīstutiḥ | taṃ krameṇa vyākhyāsyāmaḥ -
Linked texts (1)
- Kāṭhakagṛhyasūtra — Laugākṣi, Sanskrit