[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 20 # Kathakagrihyasutra 20 Kāṭhakagṛhyasūtrabhāṣya 20 - **Language:** Sanskrit ### [20.1](https://indike.org/pramana/in.vedanga.kalpa.grhya.kathaka!devapala.20.1) sahadharmacāriṇyā sārdhaṃ yo gṛhapraveśaḥ, tadanantaraṃ pākayajñāḥ kartavyāstadanuṣṭhānāvasaralābhāt| pākanirvartyā yajñāḥ pākayajñāsteṣāmāsūtraṇamātramiha kriyate, vistareṇa te vakṣyante | ### [20.2](https://indike.org/pramana/in.vedanga.kalpa.grhya.kathaka!devapala.20.2) bahuvacanenopakrāntānāmihaikavacanaṃ yajñatvasāmānyāpekṣayā ekasyaiva cāturvidhyaṃ pratyakṣasyeva cākṣuṣādibhedeneti darśanāya| caturṇāmevāvāntarabhedāḥ ṣaṭ| yānāha gautamaḥ - 'aṣṭakāḥ pārvaṇaśrāddhaṃ śrāvaṇyāgrahāyaṇī caitrī āśvayujī ca|' iti 'ṣaṭpākayajñasaṃsthāśca' iti| tatra huto havananirvartyo vaiśvadevādiḥ| ahutastvahavanasādhyo balyupahārādiḥ| yasya tu prārambhe havanaṃ, sa prahuto'nvaṣṭakādiḥ| prakṛṣṭenāśanena nirvartyate yo'tithibrāhmaṇabhojanādiḥ, sa prāśitaḥ| sarvaścāyaṃ yāgo devatoddeśena dravyasaṅkalpanāt | ### [20.3](https://indike.org/pramana/in.vedanga.kalpa.grhya.kathaka!devapala.20.3) prakṛtiriti śeṣaḥ| ihatyānāṃ hutānāṃ vaidiko homaḥ prakṛtirityarthaḥ| yataḥ itikartavyatopajīvyate, sā prakṛtiḥ| yopajīvati, sā vikṛtiḥ| tathāca vaiśvadeve prākṛtāḥ samūhanaryukṣaṇaparistaraṇasvāhākārānnaprakṣepādayaḥ kriyāḥ kriyante | ### [20.4](https://indike.org/pramana/in.vedanga.kalpa.grhya.kathaka!devapala.20.4) vaidika upahāro'tratyānāmupahārāṇāṃ prakṛtiḥ| atropāgni viṣṭaramāstīryāvāhanaṃ kṛtvā srajo gandhāṃścopahṛtya dhūpaṃ pradāya balyupakalpanamiti itikartavyatā || ### [20.5](https://indike.org/pramana/in.vedanga.kalpa.grhya.kathaka!devapala.20.5) vaidikaḥ piṇḍapitṛyajño'tratyānāṃ prahutānāṃ prakṛtiḥ| vaiśvadevaśeṣapiṇḍapratipattitvāttadīyapiṇḍamantragrāsāsanadānādayaśca taddharmā bhavantyatideśāt| ### [20.6](https://indike.org/pramana/in.vedanga.kalpa.grhya.kathaka!devapala.20.6) prāśitā dvividhā atithibhojanadānātmāno brāhmaṇabhojanavitaraṇātmānaśca | tatrātithibhojanādāvasyātithye vaidiko yo madhuparkaḥ, sa prakṛtiḥ| tatra ca śrotriyāṇāṃ pādyārghyamadhuparkapūrvaṃ māṃsapradhānaṃ bhojanamityādirvidhyantaḥ | devatāviśeṣoddeśena tu brāhmaṇabhojanadāne ādhānavihito brahmaudanaḥ prakṛtiḥ, tatrāpi barhiryukteṣvāsaneṣu upaveśanam arghyadānādikaṃ saghṛtamannaṃ devatāyai saṅkalpya, ‘prāśnantu bhavantaḥ’ ityanujñānapūrvakaṃ cāśanamityādiritthaṃbhāvaḥ| ### [20.7](https://indike.org/pramana/in.vedanga.kalpa.grhya.kathaka!devapala.20.7) sādhāraṇetikartavyatātideśo'yam| asādhāraṇāstu pūrvamitikartavyatā nidarśitāḥ | darśapūrṇamāsike vidhyante aviśeṣeṇa prāpte kvacidapavādamāha - ### [20.8](https://indike.org/pramana/in.vedanga.kalpa.grhya.kathaka!devapala.20.8) āvṛt kriyā| upacāro'nuṣṭhānam| tūṣṇīṃ nirvāpāvaghātādikriyānuṣṭhānamamantrakamityarthaḥ || ### [20.9](https://indike.org/pramana/in.vedanga.kalpa.grhya.kathaka!devapala.20.9) yaluptārthaṃ niṣprayojanaṃ, tatprakṛtau dṛṣṭamapi na kartavyaṃ vikṛtāvamantrakamapi| yathā peṣaṇakapālopadhānādi sthālīpāke niṣprayojanam| evaṃ sāmidhenīnāṃ luptatvāt samidādhānaṃ luptārthatvānna kartavyaṃ prayājābhāvāccopabhṛt| sāmidhenyādyabhāvastu vakṣyamāṇātparisaṃkhyānāt| nacaitāvatā darvihomagṛhamedhīyādivadapūrvatvaṃ pākayajñānāṃ kiṃ darśapūrṇamāsaprakṛtitvābhidhāneneti vācyaṃ juhūhomādidharmopajīvanāt | ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.12.2) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.20](https://indike.org/pramana/in.vedanga.kalpa.grhya.kathaka!devapala.20) · Pramāṇa