[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 21 # Kathakagrihyasutra 21: atha caturdaśī kāṇḍikā Kāṭhakagṛhyasūtrabhāṣya 21 - **Language:** Sanskrit ### atha caturdaśī kāṇḍikā ### [21.1](https://indike.org/pramana/in.vedanga.kalpa.grhya.kathaka!devapala.21.1) 'snātvā bhāryāmadhigacchet' iti snānānantaraṃ bhāryānveṣaṇakālaḥ| bharaṇamarhatīti bhāryā| 'arhe kṛtyatṛcaśca' (3.3.169) iti ṇyat| vindeta labheta paśyedityarthaḥ| udagayane ādityasya dakṣiṇadigbhāgāduttaradigbhāgābhimukhagamane sati uttarāyaṇa ityarthaḥ| ### [21.2](https://indike.org/pramana/in.vedanga.kalpa.grhya.kathaka!devapala.21.2) kṛttikā ca svātiśca pūrvāṇi ca tairvarayet kañcitprayuñjīta, na tu svayaṃ vṛṇuyādityaucityaṃ ṇiṃcā darśayati | ### [21.3](https://indike.org/pramana/in.vedanga.kalpa.grhya.kathaka!devapala.21.3) hastādilakṣaṇavedinā lakṣaṇāni śubhasūcakāni parīkṣayet| pāṭhakramādarthakramasya balīyastvādyathārthaṃ kramo jñeyaḥ - lakṣaṇaparīkṣaṇapūrvakaṃ varaṇamiti | lakṣaṇālābhe parīkṣāyāḥ karaṇāntaramāha - ### [21.4](https://indike.org/pramana/in.vedanga.kalpa.grhya.kathaka!devapala.21.4) apiśabda upāyāntarābhyupagame| vāśabdo vikalpe| piṇḍairvā bhāgyāni parīkṣayet, bhartaryanukūlatvāpādanāni pūrvoktālābha ityarthaḥ | ### [21.5](https://indike.org/pramana/in.vedanga.kalpa.grhya.kathaka!devapala.21.5) yajñārthā vediḥ prasiddhā| sītā halotkhātā bhūmiḥ| aśoṣyaḥ padmādyākaro jalāśayo hradaḥ| goṣṭhaṃ gavāśrayo gokulādiḥ| ādīvyantyasminnādevanaṃ kitavasthānam| ādahyante'sminnityādahanaṃ śmaśānam| svastikākāreṇa sambadhyamānaṃ mārgadvayaṃ catuṣpathaḥ| iriṇam ūṣarapradeśaḥ| etebhyaḥ pratyekaikaṃ piṇḍaṃ gṛhṇīyāt| sambhāryaṃ ca navamam, aṣṭabhyo'pi vedyādibhyo leśaṃ leśaṃ mṛdaḥ sambhṛtya, navamaṃ kuryādityarthaḥ| vedyādibhya uddhṛtānāṃ piṇḍānāmanumantraṇe mantramāha, ‘ṛtameve’ti| itiśabdaḥ sarvapratīkārthaḥ| parameṣṭhī prajāpatiḥ| ṛtaṃ satyaṃ nātyeti nātivartate kimapi| ataḥ so'tra sannihito bhūtvā satyaṃ dyotayatu| iyamapi vedyādirūpā pṛthivī ṛte āśritā| asāvityukte nāma pratīyāt| kanyā ucyate asau śobhāhatyādisaṃjñitā| iyaṃ pratyakṣatvena vartamānatvāt| idaṃ bhūyaḥ satyaprakāśayoḥ| ### [21.6](https://indike.org/pramana/in.vedanga.kalpa.grhya.kathaka!devapala.21.6) vedisautāhradagoṣṭhoddhṛtānāmanyatamaṃ gṛhṇīyāccettadodvahedenām, itaragrāhiṇīṃ tu varjayet| ‘vedipiṇḍe hi vedārthakriyāsāhāyyamāvahet| prajāvatīti sītāyāṃ goṣṭhapiṇḍe gavādikam|| hradapiṇḍe hradodbhūtakusumābharaṇocitā| tṛptidā caityahetuśca bhartṛjīvanakāriṇī|| śmaśāne vidhavāvaśyaṃ dyūtabhūmau kalipriyā| iriṇe nityasantaptā'vakīrṇā ca catuṣpathe||' ### [21.7](https://indike.org/pramana/in.vedanga.kalpa.grhya.kathaka!devapala.21.7) manyante ityadhyāhāraḥ| gṛhṇatīmupayacchedityanuṣaṅgaḥ| ### [21.8](https://indike.org/pramana/in.vedanga.kalpa.grhya.kathaka!devapala.21.8) upayamaḥ svīkāraḥ, tatraivānukūlāni nakṣatrāṇi etānītyarthaḥ|| ### [21.9](https://indike.org/pramana/in.vedanga.kalpa.grhya.kathaka!devapala.21.9) puṇyoktaṃ jyotiḥśāstroktaṃ yathāsambhavamanusartavyamityarthaḥ|| || iti caturdaśī kāṇḍikā| 14|| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.14.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.21](https://indike.org/pramana/in.vedanga.kalpa.grhya.kathaka!devapala.21) · Pramāṇa