Kathakagrihyasutra 27: atha ekonaviṃśī kāṇḍikā
Kāṭhakagṛhyasūtrabhāṣya 27
- Language
- Sanskrit
atha ekonaviṃśī kāṇḍikā
27.1
haviṣyakalpa iti pāribhāṣikī karmaviśeṣasya saṃjñā |
27.2
varṣadaśakādūrdhvaṃ kumārī na sthāpayitavyā pitrā, agatyā vā dvādaśa varṣāṇi nātikramaṇīyāni |
27.3
brahmacaryāvasāne vivāhātpūrvaṃ gandharve nirnimittajalasrāviṇi deśe, devatāyatane vā laukikau dvāvagnī prajvālya, dvau paśū cchāgau kanyāsaṃskārārthamupākuryātpaśukalpavat, ekamaryamṇe dakṣiṇabhāgavartinyagnau, dvitīyaṃ prajāpataye uttaradigbhāgavartinyagnau| itikartavyatāṃ samantravyākhyānāṃ paśukalpe eva vyākhyāsyāmaḥ |
27.4
pracurārthādyabhāve eka eva dvidaivataḥ paśurūpākartavyaḥ| adānāni ca hṛdayādibhyo medo'ntebhyo dvādaśebhyo dvirdvirgṛhītavyāni| ‘aryamaprajāpatibhyāṃ svāhā’ iti cohaḥ| eka eva ca yogaḥ saṃhatayorekadeśatvadharmasamavāyāt| ata evaca kecit hṛdayādibhyo dviguṇāni avadānāni necchanti |
27.5
dhanadaurgatye sati ahiṃsāniyame vā taṇḍulairvā kuryāt| taṇḍulagrahaṇaṃ piṣṭakārtham ||
27.6
yatraiva sthāne ājyabhāgābhyāṃ pūrvo mukhyapaśuḥ, tatraiva piṣṭakapaśuḥ, avadānānyapi hṛdayādibhyastadvat| teṣāṃ ca śrapaṇahomau sarvadānyāpītikartavyatā raśanābandhayūpaniyojanopāyena viśasanādiḥ| luptārthavarjaṃ haviḥ paśupuroḍāśasthāne sthālīpākastadapi yathāsthānaṃ paśupuroḍāśakrame, vapāhomasthāne tvājyahomaḥ |
27.7
sugandhacandanaghanasāradidravyayutenājyenāhutayo gandhāhūtayaḥ, tābhiragnyādikāḥ saptadaśa devatā yajeta| vātsīputra iti devatānāma yataḥ śabdaikasamadhigamyā devatā| vibhaktivipariṇāmena caturthyantaiḥ svāhākārayuktaiḥ śabdairuddiśyāgnyādidevatā yaṣṭavyāḥ, 'agnaye svāhā' ityādikaiḥ |
Linked texts (1)
- Kāṭhakagṛhyasūtra — Laugākṣi, Sanskrit