[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 29 # Kathakagrihyasutra 29: atha dvāviṃśī kāṇḍikā Kāṭhakagṛhyasūtrabhāṣya 29 - **Language:** Sanskrit ### atha dvāviṃśī kāṇḍikā ### [29.1](https://indike.org/pramana/in.vedanga.kalpa.grhya.kathaka!devapala.29.1) avidhavā jīvadbhartṛkāḥ| śākamiśrāḥ piṇḍyaḥ śākapiṇḍyaḥ, ‘bhakṣyeṇa miśrīkaraṇam' (2.1.35) iti tatpuruṣaḥ| catasro'ṣṭāviti ca prathamāntastrīpadasamānādhikaraṇam| catasro'ṣṭau veti yathāsambhavaṃ vikalpaḥ| samasaṃkhyāniyamārthametat| caturaṣṭāṣṭatvaniyamārthamiti tu kecit| tenāyamanvayaḥ anyūnāścatasṛbhyo'vidhavāḥ striyaḥ samasaṃkhyāḥ ṣaṭkavarjyāḥ śākapiṇḍībhiranyaiśca yathāsambhavadbhirbhojanaviśeṣairbrāhmaṇānbhojayitvā vīṇayā vādyamānayā saha ye gāyanti tacchīlāstaiḥ saha sambhūtā bhūtvā maṅgalagānaṃ gāyeyuḥ| brāhmaṇabhojanānantaraṃ maṅgalagānāvasaro'tra vivakṣito, natu samānakartṛttve'tīvādaraḥ, tena te brāhmaṇānbhojayeyuranye vā, sarvathā brāhmaṇabhojanānantaraṃ maṅgalagānaṃ kartavyam| apivā caturo nartanaṃ kuryāt caturo nartanapravīṇo nartanaṃ kuryāt yadi sauśīlyādiguṇayukto bhavet, viparyaye tu na tābhiḥ saha nartanaṃ kuryādityanenābhiprāyeṇāpivāśabdaḥ| anuṣṭhānaṃ tvāryāvarte yathā dṛśyate, tathā brūmaḥ - kanyāyā mātṛprabhṛtayo'ṣṭau catasro vāvidhavā yathāvibhavaṃ bhojayitvā brāhmaṇāṃścāvidhavābhiḥ saha vīṇāgāthibhiśca gāyanti nṛtyanti sotsāham| tadanusāreṇāyamarthaḥ - catasro'ṣṭau vā striyaḥ karmabhūtā brāhmaṇāṃśca śākapiṇḍībhiranyena ca bhojyaprakāreṇa bhojayitvā vīṇāgāthibhiḥ sahāvidhavābhiśca saṅgāyeyuḥ| ke| arthāt kanyāmātrādayaḥ| apiveti samuccaye| sakalo'sau strīgaṇaścaturaḥ sotsāho bhūtvā nartanaṃ kuryāt|| ‘krīḍaṃ vaḥ' ityanayā gāyantyānumantrayate| vyākhyātā ceyaṃ kṛcchreṣu| ### [29.2](https://indike.org/pramana/in.vedanga.kalpa.grhya.kathaka!devapala.29.2) akṣatānāmanavahatānāṃ yavānāṃ saktubhiragniṃ puṣṭipatiṃ yajeta ‘agninā rayim' ityetayarcā| tathā prajāpatiṃ 'prajāpate' ityādimantreṇa| etāvājyabhāgānte yāgau|| ### [29.3](https://indike.org/pramana/in.vedanga.kalpa.grhya.kathaka!devapala.29.3) yatra nāmnā mantravarṇairvā devatānirrdiṣṭā vivāhaprakaraṇokte karmaṇi, tatrāgniṃ puṣṭipatiṃ prajāpatiṃ ca yajeta prakṛtatvādakṣatasaktubhiḥ| ājyabhāgānte bhaviṣyatsu prāsthānikādiṣvetadboddhavyam| pūrvokteṣu tu kvacinnāmnā kvacinmantravarṇebhyo devatā sarveṣu pratītā || agninā ijyamānenāhaṃ rayiṃ dhanamaśnavat 'aśū vyāptau' vyāpnuyām vyāptasya ca prāptasya poṣaṃ puṣṭiṃ dine dine aśnuyām| kīdṛśaṃ rayim| yaśasaṃ yaśaskaraṃ, vīravattamaṃ vīrapuruṣayuktaṃ, vīrairvā putrairatiśayena yuktam| 'prajāpate nahi' iti jātakarmaṇi vyākhyāsyate| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.22.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.29](https://indike.org/pramana/in.vedanga.kalpa.grhya.kathaka!devapala.29) · Pramāṇa