[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 35 # Kathakagrihyasutra 35 Kāṭhakagṛhyasūtrabhāṣya 35 - **Language:** Sanskrit ### [35.2](https://indike.org/pramana/in.vedanga.kalpa.grhya.kathaka!devapala.35.2) agnirraṛṣiḥ duṣṭān pavamānaḥ punānaḥ, pañcajanā manuṣyāścatvāro varṇāḥ anulomajavargaḥ pañcamastebhyo hitaḥ, purohitaḥ, agnirvai devānāṃ purohitaḥ puro'gre paraloke vā hitaḥ karmasampādanadvāreṇa, taṃ vayam īmahe yācāmahe mahāgayaṃ mahāgṛham | ### [35.3](https://indike.org/pramana/in.vedanga.kalpa.grhya.kathaka!devapala.35.3) he agne asme asmān pavasva punīhi| apa iti karmanāma, śobhanānyapāṃsi yasya sa svapāḥ sukarmā agniḥ| kiṃ kurvan punīhi| varcastejaḥ śobhanaṃ ca vīryaṃ, tathā rayiṃ dhanaṃ poṣaṃ ca puṣṭiṃ dadhadvidadhānaḥ dadadvāsmabhyam| 15 || ### [35.16](https://indike.org/pramana/in.vedanga.kalpa.grhya.kathaka!devapala.35.16) yā ta ityādibhiśca tribhirmantrairhutvā hutvā kanyāyā mūrdhni sampātānavanayedityanuṣaṅgeṇa samāptiḥ| mantratrayārthastu - he kanye yā te tava patighnī tanūstāmapatighnīṃ karomi anena sampātāvanayena, tathā tava yā aputriyā putrebhyo'hitā tanūstāṃ putrebhyo hitāṃ putriyāṃ karomi, yāca apaśavyā paśubhyo'hitā tanūstāṃ paśavyāṃ paśubhyo hitāṃ karomi| atrāvasare pūrvanidarśitavidhānenākṣatasaktūn juhuyāt| pāṇigrahaṇamāha - ### [35.17](https://indike.org/pramana/in.vedanga.kalpa.grhya.kathaka!devapala.35.17) agnerudīcyāṃ diśi darbhāstīrṇe deśe prāṅmukhīṃ kanyāmavasthāpya gururdevasya ta ityādinā mantreṇa kanyāyāḥ sambandhinaṃ hastaṃ grāhayatītyadhāhartavyaṃ samānakartṛkatvārtham| kena prayujya grāhayatītyapekṣāyāmarthādvareṇopayantreti yojyam| sacopayantā guruṇānujñātastaṃ gṛhṇāti| kīdṛśo voḍhā gṛhṇāti| śuciḥ karagrahaṇe'dhikṛtaḥ dharmopayoginī mameyamiti śuddhasaṅkalpaḥ, pratyaṅmukhaḥ kanyāyāḥ purastādagre sthitaḥ san| 'prāṅmukhaḥ sarvakarmāṇi kurvīta' ityasyāpavādārthaṃ pratyaṅmukha iti| dakṣiṇaṃ lokaprasiddhaṃ, sāṅguṣṭhamaṅguṣṭhasahitamuttānaṃ nīcā dakṣiṇena nitāntamaśnāti ceṣṭāsu pragalbhate nyak dakṣiṇastena| yathoktaṃ dhanurvede 'pūrvaṃ vāmena śikṣeta pūrvasiddho hi dakṣiṇaḥ|' iti| nyañcatīti nyak tena nīcā nyagbhūtenetyāvṛttyā yojyam| ariktaṃ sābharaṇam, asambhave suvarṇakarṇikādi- yuktam, atidaurgatye puṣpaphalādisahitam | arikteneti tadvat| evaṃ savyena savyamiti samastasya mantrāderatideśaḥ| he kanye te tavāhaṃ hastaṃ gṛhṇāmi, devasyāntarātmanaḥ savituḥ vaidikakarmāṇi cikīrṣoḥ prasave'nujñāyāṃ vartamānaḥ ādityasya vā savituḥ prasave'nujñāyāṃ vartamāno'śvinorbāhubhyāṃ natvātmīyābhyāṃ carmamayābhyāṃ pūṣṇo hastābhyāṃ gṛhṇāmi| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.25.20) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.35](https://indike.org/pramana/in.vedanga.kalpa.grhya.kathaka!devapala.35) · Pramāṇa