[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 41 # Kathakagrihyasutra 41: atha aṣṭāviṃśī kāṇḍikā Kāṭhakagṛhyasūtrabhāṣya 41 - **Language:** Sanskrit ### atha aṣṭāviṃśī kāṇḍikā ### [41.1](https://indike.org/pramana/in.vedanga.kalpa.grhya.kathaka!devapala.41.1) ulapo vīraṇaḥ, prasūnā dīrghadarbhā iti tu prasiddhihīnaṃ vaco madhyadeśādau vīraṇānāmeva tathā prasiddheḥ| ṛtvik vīraṇapaṃktiṃ stṛṇāti racayati rathāvataraṇasthānādārabhya vadhūśayanagṛhaviśeṣaṃ yāvat| he vāstoṣpate asmān pravivikṣūn pratijānīhi, abhimukhyenānukūlyena paśya, tataśca svāveśaḥ supraveśo rogarahito'smākaṃ, bhava| yat tvā īmahe yācāmahe, tannaḥ pratijuṣasva tena yācitānāsmān prīṇīhītyarthaḥ| tasmādasmākaṃ dvipade mānuṣarūpe, catuṣpade gavādhike śaṃ bhava sukharūpo bhava| agniraitu iti vaiśvadevyaścatasrastriṣṭubhaḥ| viśveṣu deveṣvāgacchatsu sarvadevatānāṃ prathamo'gre'grirā etu etu āgacchatu| so'griḥ sarvadevapuraḥsaro'syā vadhvāḥ prajāṃ nayatu prāpayatu, tāṃ ca prajāṃ sarvamāyuḥ nayatu prāpayatu| dvikarmakaḥ ajāṃ nayati grāmamitivat| taccāyuragrinā prāpyamāṇaṃ varuṇo rājānumanyatāṃ tatrānumatiṃ dadātvevamastviti| rājagrahaṇaṃ tenānumatena tadanucaratvātsarve devā anumanyante ityāśayena| yathāca iyaṃ strī vadhūḥ putrasyedaṃ pautramaghaṃ pāpaṃ nirundhyāt putraśokaṃ nānubhavettathā tena prakāreṇa varuṇo rājā anumanyatām| ### [41.2](https://indike.org/pramana/in.vedanga.kalpa.grhya.kathaka!devapala.41.2) tayā rājyā praviśati gṛhaṃ rathādavatīrya vadhūsahito varaḥ| imāṃ vadhūmagnirāvasathyastrāyatāṃ rakṣatu| iyaṃ vadhūrariktopasthā astu, upastha utsaṅgo bālakasutaiḥ krameṇa jāyamānairasyā utsaṅgo'rikto'śūnyo'stvityarthaḥ| tatheyaṃ jīvatāṃ cirāyuṣāṃ putrāṇāṃ mātā bhavatu| putrāṇāmayaṃ pautrastaṃ cānandaṃ sukhamiyamabhimukhyena viśeṣeṇa budhyatām| ### [41.3](https://indike.org/pramana/in.vedanga.kalpa.grhya.kathaka!devapala.41.3) adhyāhitaḥ sthāpito vivāhāgniryatra taṃ, tathā sodakamudakumbhabhūṣitaṃ, sauṣadhaṃ vrīhyādyoṣadhisanātham, āvasathaṃ gṛhaviśeṣaṃ pratipadyate praviśati| ata ūrdhvaṃ hi pākayajñeṣvadhikriyate| vāstuhomānantaraṃ caiṣa praveśa iṣyate| uktaṃ hi sūtram - ‘amīvahā vāstoṣpata iti catasṛbhirvāstoṣpatīyasya sthālīpākasyeṣṭvātha vāstvrāviśet’ (12.1) iti| ādyā gāyatrī| tisrastriṣṭubhaḥ| brahmaṇa ārṣam| he vāstoṣpate mādhyamikadevatāviśeṣa vāyurūpa no'smākam anamīva edhi, ‘ama roge’ rogaśūnyo bhava asmānnirogānkurvityarthaḥ| amīvānaṃ vyādhiṃ hantīti amīvahā vyādhipradhvaṃsakārī, anamīvastu rogaprāgabhāvasyaiva sthairyaheturityapaunaruktyam, tathā suśevaḥ sukhasevyo bhava| kiṃ kurvan| viśvā rūpāṇyāviśan nānārūpāṇi dhārayan, aśvādīni nānārūpāṇi vā āviśan praveśayan samṛddhaṃ gṛhaṃ kurvannityarthaḥ| he vāstoṣpate asmākaṃ prataraṇo bhava durgamasthānebhyo'smān pratārayetyarthaḥ| he indo mādhyamikatvasāmānyāt candra asmākaṃ gobhiraśvaiśca gaye gṛhe sphānaḥ sphīto bhava| tena tava sakhye vartamānā vayaṃ ajarāsaḥ ajīrṇāḥ syāma| tvaṃ cāsmān pratijuṣasva prīṇīhi| ka iva kān| piteva putrān| he vāstoṣpate te tava sambandhinyā saṃsadā vegādisampadā śagmayā sukharūpayā vayaṃ sakṣīma saṅgacchema| hiraṇvayā suvarṇādikayā, gātumatyā yajñādikarmavatyā yajñādyupayoginyetyarthaḥ| varamutkṛṣṭaṃ kṛtvā no'smān alabdhalābhātmake yoge, prāptaparirakṣaṇātmake ca kṣeme vartamānaḥ pāhi rakṣa| yūyaṃ tvaṃ vyatyayena pāta pāhi svastibhiravināśaiḥ sarvakālam| he vadhu te tava gṛhe niśi divā ghoro rodanādiśabdo mā utthāt rodanādiśabdo duṣṭastvadgṛhe mā bhūtkadācidityarthaḥ| rudatyo rodanaṃ kurvatyastvattava sakāśādanyatra saṃviśantu anyatra tava dūravartini deśe tiṣṭhanvityarthaḥ| tvaṃ patiloke patikule viśeṣeṇa rāja śobhasva jīvaputrā dīrghāyurbahuputrā satī, tathā sumanasyamānāṃ sukhinīṃ prajāṃ putrādikāṃ paśyantī satī| ### [41.4](https://indike.org/pramana/in.vedanga.kalpa.grhya.kathaka!devapala.41.4) rohiṇyā mūlena vā nakṣatreṇa yukte candramasīti jñeyam| yadvā puṇyoktaṃ jyotiḥ śāstre puṇyarūpaṃ śreyaskaraṃ yaddinamuktaṃ, tatra vā| apareṇāgniṃ prakṛtatvādāvasathyam, anaḍuha idamānaḍuhaṃ vārṣabhaṃ tatra, rohite carmaṇyupaveśya vadhūṃ varaḥ svayaṃ copaviśya, kevaleṣu vā darbheṣu vadhūmrupaveśya svayaṃ copaviśya jayahomaprabhṛtikamājyabhāgāntamājyasādhanatvādārthādājyadharmayuktamupasamādhānādipūrvakaṃ hutvā, agniraitu prathama ityādibhiśca karmāntarāṇi kuryāt| kāni tāni| pākayajñā arthāt|| tava kumāro bālakaḥ stanandhayaḥ stanapaḥ mā pramāyi mā mṛta| mā ca tvaṃ vikeśī muṇḍā satī uro vakṣa āvadhiṣṭhāḥ bhartṛvirahakṛtamurastāḍanaṃ tava mā bhūdityarthaḥ| tava stanandhayaṃ savitā abhirakṣatu bṛhaspatiśca abhirakṣatu ā vāsasaḥ paridhānāt paridhānavastraparyantaṃ yāvat rakṣatu, viśve devāśca nityamabhirakṣantu| prāyaścittaṃ pāpanivāraṇaṃ dharmajananaṃ ca karmocyate| tatkāraṇatvādagniḥ prāyaścittiḥ| he agne prāyaścitte tvaṃ devānāṃ prāyaścittirdoṣāpasāre śubhajanane ca nimittamato'syāṃ vadhvāṃ yā bhṛśā apavitrā atiśayena bījavaśena bālabhāvakṛtakuceṣṭāvaśena ca tanū- stāmasyā vadhvā nāśaya tadgatamaśubhaṃ nāśaya| varasya hi gārbhabaijikadoṣā jātakamīdibhirnāśitāḥ, vadhvāstu tāni prāyeṇa na kṛtāni - gārbhairhomairjātakarmacauḍamauñjīnibandhanaiḥ| baijikaṃ gārbhikaṃ caino dvijānāṃ pratihanyate|| (manuḥ 2.27) iti smṛteḥ| enaḥ pāpamaśuddhiḥ|| etāni sānuṣaṅgāṇi parāṇi pañca yajūṃṣi apakrameṇa| tenargbhiścatasṛbhiścatasro, yajurbhiśca daśabhirdaśeti caturdaśāhutayaḥ sampannāḥ, tryāyuṣamityanena pañcadaśī, - ityādityadarśanaḥ| sa ājyaikadeśe yo'nena yajuṣā vakṣyamāṇa āsekastāmevāhutiṃ manyate mantrāvṛttiṃ vā| ### [41.5](https://indike.org/pramana/in.vedanga.kalpa.grhya.kathaka!devapala.41.5) svayaṃkartṛkatvādāsāṃ sruveṇa pūrvoktā ghṛtāhutīrhutvā tryāyuṣamityādiyajuṣā pṛthakpātroddhṛte ghṛte ghṛtaikadeśe dadhyāsicya dadhikrāvṇaḥ ityanayā trīnvārān vadhūṃ dadhi bhakṣayitvā varo māṇavakāya vadhvā utsaṅge nihitāya phalāni pradadāti 'irāmagre' iti mantreṇa| maṇibhirmantrairoṣadhibhistribhirupāyaiḥ sādhyamānatvāt trya yuṣaṃ bālayuvavṛddhāvasthātrayabhāvitvāt yāgadānahomasādhyatvāttadārambhakatvādva vā tryāyuṣaṃ yat jamadagneḥ tryāyuṣaṃ, yacca kaśyapasya, yacca devānāṃ, tatsa5 stviti vara āśāste| dadhikrāvṇo akāriṣaṃ jiṣṇoraśvar vājinaḥ| surabhi no mukhā karatpra ṇa āyūṃṣi tāriṣat|| āgneyī| anuṣṭup| indrasyārṣam| dadhi krāmatīti dadhikrāvā 'anyeṣyo'pidṛśyate' (3.2.75) iti kvanip| agnirvāśvānara ucyate| sa hi sarvaṃ bhakṣitaṃ jarayati jaṭhare sthito dadhyādikam| tasya dadhikrāvṇo'grerjāṭharasyāhamakāriṣaṃ karomi santarpaṇamarthāt| kīdṛśasya| jiṣṇorjayanśīlasya, aśvasya aśanasya vyāpino vā, vājino'nnapateḥ| no'smākaṃ surabhi sugandhi vidyādyudgārabhūṣitamarthānmukhaṃ dadhi bhakṣyamāṇamākarat karotu| loḍarthe leṭ| no'smākamāyūṃṣi pratāriṣat prataratu dadhātu| pūrvavat paṃcamo lakāraḥ| irāmagra itīyaṃ vyākhyātā| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.27.3) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.41](https://indike.org/pramana/in.vedanga.kalpa.grhya.kathaka!devapala.41) · Pramāṇa