[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 42 # Kathakagrihyasutra 42: atha ekonatriṃśī kāṇḍikā Kāṭhakagṛhyasūtrabhāṣya 42 - **Language:** Sanskrit ### atha ekonatriṃśī kāṇḍikā ### [42.1](https://indike.org/pramana/in.vedanga.kalpa.grhya.kathaka!devapala.42.1) tūṣṇīmeva yatropacāro nirvāpādistaṃ caruṃ svarasasiddhatvādudakena śrapayitvā tasyāṃśenāgniṃ prajāpatiṃ ceṣṭvā nāmnaiva tūṣṇīṃgrahaṇāt hutaśeṣaṃ prāśnītaḥ vadhūvarāvekatra pātre saha| gṛhyāntareṣu hi samaśanamiti saṃjñā| sahāśanaṃ ca samaśanamiti prasiddham| saṃvananamiti ca mantraliṅgam| anye tvatrāpi caikapātre na saha bhojanamicchanti| yathāhi yajamānapañcamā irāṃ prāśnanti sapatnīkā bhuñjata ityataḥ pañcasaṃkhyāsahaśravaṇe'pi iḷāyā gṛhamedhīyayoḥ pṛthagevāśanaṃ, tadvadihāpi bhavitavyam| pākayajñapratiṣedhārthaṃ punastūṣṇīmupacaritagrahaṇam| uktaṃ hyetat 'teṣvāvṛdupacārastūṣṇīm' (13.7) iti| bhakṣaṇaṃ tu annameva vivananamityādibhiścatasṛbhiranuṣṭubbhiḥ, mantroccāraṇaṃ carukarmakam| 'vana-ṣaṇa-sambhaktau' annameva vivananaṃ vibhajanam, annameva saṃvananaṃ smṛtaṃ saha bhujyamānaṃ saṃśleṣaṇamityarthaḥ| annaṃ paśūnāṃ prāṇaḥ tena hi jīvanti| annameva jyeṣṭhaṃ praśastatamaṃ bhiṣagbheṣajaṃ smṛtam| tena hi bubhukṣādikṛtā vyādhayo nivartyante| varo brūte he vadhu tavāhaṃ hṛdayaṃ ca manaśca sinomi 'ṣiñ-bandhane' badhnāmi| mananaṃ mano jñānaṃ manyate'nena manaḥ bāhyendriyapañcakaṃ, hṛdayaṃ cittam| kena| satyagranthinā satyaṃ nirvyājacaritameva granthistena, pṛśninā śuklena śucinā dharmarūpeṇetyarthaḥ| annaṃ maṇiriva, prāṇaḥ sūtramiva hārādyalaṃkārarūpametat| he vadhu tava ca mama ca vācā saha mano'stu yādṛśaṃ vacanaṃ tādṛśaṃ nirvyājaṃ cittamastu, natu daurjanyenānyaccetasi anyadvāci| evamāvayościttaṃ caitanyaṃ samānamastu, vrataṃ ca saphalaṃ vihitaṃ karma| tava mano māmevānvetu cakramivānaḍuhaḥ padaṃ, yathā śakaṭacakraṃ śakaṭakarṣakasya vṛṣabhasya padamanugacchati| māmeva sūryameva ca paśya| anyeṣu puruṣeṣu mano mā kṛthāḥ| mama cāmuṣyāśca vadhvāścākravākamiva saṃvananaṃ bhūyāt| yathā cakravākapakṣīmithunaṃ yathāprāptamatisnehāt vṛṣṭyādikaṃ saṃvibhajya bhuṃkte tadvadāvāṃ, tadvadatiprītirāvayorastvityarthaḥ| iti śrījālandharīyabhaṭṭopendrasūnuharipālaputradevapālaviracite samantracārāyaṇīyagṛhyabhāṣye vivāhaḥ paripūrṇaḥ|| ityekonatriṃśī kāṇḍikā| 29 || ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.29.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.42](https://indike.org/pramana/in.vedanga.kalpa.grhya.kathaka!devapala.42) · Pramāṇa