[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 43 # Kathakagrihyasutra 43: atha triṃśī kāṇḍikā Kāṭhakagṛhyasūtrabhāṣya 43 - **Language:** Sanskrit ### atha triṃśī kāṇḍikā ### [43.1](https://indike.org/pramana/in.vedanga.kalpa.grhya.kathaka!devapala.43.1) brahmacaryamamaithunaṃ caritvā garbhādhānaṃ kāryamiti | tatpūrṇimāyāmamāvasyāyāṃ na maithunaṃ kartavyamiti ca saṃkalpaḥ| ekaikakartṛkamatra vratam| saṃvatsaraṃ prathamaḥ kalpaḥ| yauvanamadasyātiśayāttvanukalpenāpatkalpo vikalpaḥ - dvādaśa rātrīḥ ṣaṭ tisra ekāṃ veti | ### [43.2](https://indike.org/pramana/in.vedanga.kalpa.grhya.kathaka!devapala.43.2) tau vadhūvarāvekasmin śayane bhavataḥ| vivāhottarakālaprathamaśayane ādhāne ca samānametadvidhānamanantaramantracatuṣṭayajapasahitam | ### [43.3](https://indike.org/pramana/in.vedanga.kalpa.grhya.kathaka!devapala.43.3) etāstriṣṭubhaḥ prathamasaṃveśane garbhādhāne ca vadhūvarau japataḥ stryādivyatyāsaṃ kṛtvā, prathamāṃ strī, dvitīyāṃ varaḥ, tṛtīyāṃ strī, caturthīṃ varaḥ| vyatyāso viparyayaḥ| puruṣo hi pradhānam | tasya pūrvaṃ kriyāyogo'nyatra, iha tu viparyayaḥ | strī ādiryatra vyatyāse, sa stryādivyatyāsaḥ| vadhūrvadati - he putrakāma tvāmahamapaśyaṃ paśyāmi, cekitānaṃ dedīpyamānaṃ brahmavarcasādinā atiśayena dīptimantam | kena paśyāmi| manasā, natu cakṣuṣā| kīdṛśam | tapaso jātaṃ tapa iti prajāpateḥ satkarmaṇaśca nāma, prajāpaterbrahmaṇaḥ sakāśājjātaṃ, tapasaścāvirbhūtaṃ vṛddhiṃ gatam | iha prajāṃ mayi putrarūpāṃ rayiṃ ca dhanaṃ rarāṇa ādadat prajayā prajāyasva prajāmutpādayetyarthaḥ | vara āha - paśyāmi tvāṃ he putrakāme dīdhyānāṃ dīptimatīṃ manasā| kīdṛśīm| nādhamānāṃ 'nāthṛ nāthṛ yācñopatāpaiśvaryāśīḥṣu' prajāṃ yācamānām| kutra| svāyāṃ tanū svasyāṃ tanvām| kimartham| ṛddhyai samṛddhayau lokadvayābhyudayāya| māmupa mama samīpe vartamānā tvamudgā mahatī pūjyatamā satputrādiyogāt yuvatistaruṇī satī babhūyāḥ atiśayena bhūyāḥ| prajayā prajāyasva ātmā vai putranāmeti vacanāt prajārūpeṇa prajāyasva putravatī bhava| vadhūrāha bhartari prajāpatitvamadhyāropya - he prajāpate mama tanvaṃ tanūṃ śarīraṃ juṣasva| he tvaṣṭaḥ he prajāpate tvaṃ indraḥ san sahasā balena devairviśvaiśca devairanupatitaḥ san no'smākaṃ saṃvidānaḥ samyak jānānaḥ| yajñiyairyajñāhairiti devaviśeṣaṇam| vayaṃ ca bahūnāṃ puṃsāṃ putrāṇāṃ mātaro nirmātryaḥ syāma| vara āha - oṣadhīṣu phalapākāntāsu ahameva garbhaṃ phalajananasāmarthyamādadhāmādadhe| jīvātmanāṃ paramātmano bhedābhāvādevamabhidhānam| ata evāha viśveṣu sarveṣu bhūteṣu ahamevāntastiṣṭhāmi antaryāmitayā, pṛthivyāmahameva prajāmanavadyāmajanayaṃ janayiṣyāmi ca| ahameva janibhyo jananīnāṃ strīṇāmavarīṣu jaṭharābhyantaravartinīṣu garbhagrahaṇīṣu putrān janayāmi bījamādadhāmi| ### [43.4](https://indike.org/pramana/in.vedanga.kalpa.grhya.kathaka!devapala.43.4) gatārtham | ### [43.5](https://indike.org/pramana/in.vedanga.kalpa.grhya.kathaka!devapala.43.5) karaditi yajuṣā bhasadaṃ strīcihnaṃ varo'bhimṛśati| karat kurvāṇaṃ prajāṃ, bhavedityarthaḥ | ### [43.6](https://indike.org/pramana/in.vedanga.kalpa.grhya.kathaka!devapala.43.6) puṃcihnaṃ bhasaditi yajuṣā abhimṛśati strī| he puṃjanana tvaṃ bhasaddīvyamānaṃ satkāryajananasamarthaṃ bhavedityarthaḥ | ### [43.7](https://indike.org/pramana/in.vedanga.kalpa.grhya.kathaka!devapala.43.7) bṛhadityanena jātaṃ vīryaṃ prakṣipati| bṛhadvistīrṇaṃ putrajananasamarthaṃ bhavedityarthaḥ || || iti triṃśī kāṇḍikā | 30 || ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.30.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.43](https://indike.org/pramana/in.vedanga.kalpa.grhya.kathaka!devapala.43) · Pramāṇa