[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 49 # Kathakagrihyasutra 49: atha ṣaṭtriṃśī kāṇḍikā Kāṭhakagṛhyasūtrabhāṣya 49 - **Language:** Sanskrit ### atha ṣaṭtriṃśī kāṇḍikā ### [49.1](https://indike.org/pramana/in.vedanga.kalpa.grhya.kathaka!devapala.49.1) daśamyāṃ vyatītāyāmaśaucaśuddhāvekādaśe'hani, dvādaśe'hani vā tatra nakṣatrādivaiguṇye dināntare nāmadheyaṃ daśamyāṃ dvādaśyāṃ vāpi kārayet - 'puṇye'hani muhūrte vā nakṣatre vā guṇānvite|' iti smaraṇāt| audayikyā ca vyavasthayā trayodaśī tithirgṛhyate, natvanvāyyādutthānādanyāyāñca saṃveśanādanadyatanakāla ityādikayā, 'rātriśeṣe dvābhyāṃ prabhāte tisṛbhiḥ' iti vibhātāyāmapi rajanyāmudayāt prāgaśaucānuvṛttidarśanāt| tasminneva sūtikāgārasthe sūtakāgnau payasi sthālīpākaṃ śrapayitvā sarvauṣadhiprabhṛtibhiḥ sugandhidravyaviśeṣairuparivinihitamaṅgalārthajātīpūgaphalaviśeṣaiḥ saśiraskaṃ snāpayitvā, puṃliṅganirdeśāt striyaṃ varjayati, anupabhuktena vastreṇa saṃcchādya tasya sthālīpākasya sambandhibhiravadānairvyatyayena sthālīpākena juhoti, 'kayā naścitre'ti pañcāhutīḥ | ### [49.2](https://indike.org/pramana/in.vedanga.kalpa.grhya.kathaka!devapala.49.2) agnerāyurasītyādikamāyuṣeṣṭyā tulyamityatideśaḥ| avadhimāha ā lalāṭābhimarśanāt| tasya lalāṭamabhimṛśyāśvinoḥ prāṇa iti japati (10) iti vakṣyati| tadanantaramāyuṣeṣṭyā samānamityarthaḥ | ### [49.3](https://indike.org/pramana/in.vedanga.kalpa.grhya.kathaka!devapala.49.3) atrānuvāke asāvityasya sthāne tadeva nāma dhīyate yattu jātakarmaṇi kṛtaṃ, nānyat | ### [49.4](https://indike.org/pramana/in.vedanga.kalpa.grhya.kathaka!devapala.49.4) eke punarāhuranyadvidhīyate| dve hi nāmnī brāhmaṇasya kartavye| tatra yadrahasyaṃ jātakarmaṇyuktaṃ 'putre jāte nāma dhīyate' (34.1) iti, tasya prayojanaṃ parairabhicāre kriyamāṇe'nuccāraṇādi, prakaṭaṃ tvekādaśāhādau vyāvahārikam| tathāca śrutiḥ 'tasmādbrahmaṇo dvināmā' iti| ### [49.5](https://indike.org/pramana/in.vedanga.kalpa.grhya.kathaka!devapala.49.5) sviṣṭakṛtaḥ pūrvaṃ pūtamājyaṃ kāṃsyapātre āsicya prakṣipya, tatra ca hiraṇyaṃ prakṣipya agrerāyurasītyādinā mantreṇa| kīdṛśaṃ suvarṇam| ābandhanīyaṃ bālakasya kaṇṭhādau bandhanārham| tasyājyasya juhoti indrasya prāṇa ityādibhiḥ pañcabhirmantraiḥ ### [49.6](https://indike.org/pramana/in.vedanga.kalpa.grhya.kathaka!devapala.49.6) saṃsthitayajurhomātpūrvaṃ brahmā ghṛte hiraṇyamavapadyate avaṣṭabhnāti yattadbālagalādibandhanārthaṃ ghṛte nihitaṃ sarve ca ṛtvijastadavaṣṭabhnānti yadasarpa ityādimantraiḥ ### [49.7](https://indike.org/pramana/in.vedanga.kalpa.grhya.kathaka!devapala.49.7) ājyātsuvarṇaṃ pāvamānenetyuddhṛtya yajamānāya prayacchati devā āyuṣmanta ityādimantraiḥ|| ### [49.8](https://indike.org/pramana/in.vedanga.kalpa.grhya.kathaka!devapala.49.8) tat suvarṇaniḥsrāvamājyaṃ bālakaḥ pibati| tacca niḥśeṣeṇāvadhayet pibet|| ### [49.9](https://indike.org/pramana/in.vedanga.kalpa.grhya.kathaka!devapala.49.9) hiraṇyalagnaṃ ghṛtaṃ prakṣālya taddhiraṇyaṃ badhnāti bālakasya galādau imamagna ityādinā | ### [49.10](https://indike.org/pramana/in.vedanga.kalpa.grhya.kathaka!devapala.49.10) lalāṭataṭaṃ hastena spṛṣṭvā japati aśvinoḥ prāṇa ityādikam | ### [49.11](https://indike.org/pramana/in.vedanga.kalpa.grhya.kathaka!devapala.49.11) aṅgādaṅgādityādinā bālasya mūrdhani śiṅghanaṃ kṛtvā svastyayanaṃ vakti| kvacinnighrāpyeti pāṭhaḥ, tatra svārthe ṇic| pitrasannidhau vā mātaraṃ prayujyeti kecit| ṛtvigvā pituḥ prayojako vivakṣitaḥ| ### [49.12](https://indike.org/pramana/in.vedanga.kalpa.grhya.kathaka!devapala.49.12) ato nāmakaraṇādūrdhvaṃ yadā pravāsādāyāti pitā, tadānenaiva prakāreṇa mūrdhanyabhighrāṇaṃ kuryāt| ### [49.13](https://indike.org/pramana/in.vedanga.kalpa.grhya.kathaka!devapala.49.13) evameva pratimāsaṃ janmadine sthālīpākena jātakarmavividhavadājyeneṣṭvā nighrāṇaṃ mūrdhanikuryāt| ### [49.14](https://indike.org/pramana/in.vedanga.kalpa.grhya.kathaka!devapala.49.14) pratimāsamimāṃ kartavyatāṃ saṃvatsaraṃ yāvatkuryāt| ### [49.15](https://indike.org/pramana/in.vedanga.kalpa.grhya.kathaka!devapala.49.15) māṃsaṃ tu bālakasya mātā pitā ca saṃvatsaraṃ yāvannāśrīyāt| ### [49.16](https://indike.org/pramana/in.vedanga.kalpa.grhya.kathaka!devapala.49.16) prathame saṃvatsare samāpte ajenāgnimavinā dhanvantaramiṣṭvā vāśabdādājyena sthālīpākena vā sarpiṣā pracureṇa yuktamanyena ca pavitreṇa dadhiprabhṛtinā annaṃ brāhmaṇān bhojayet| taiḥ suprītaiḥ svastyayanāśīḥ prabhṛtibhirabhinandedenam| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.36.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.49](https://indike.org/pramana/in.vedanga.kalpa.grhya.kathaka!devapala.49) · Pramāṇa