[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 51.5 # Kathakagrihyasutra 51.5 Kāṭhakagṛhyasūtrabhāṣya 51.5 - **Language:** Sanskrit ### [51.5](https://indike.org/pramana/in.vedanga.kalpa.grhya.kathaka!devapala.51.5) prajāpaterārṣamuttaratrāpi| gāyatrī| sūryo devatā| he sūrya asi tvaṃ taraṇistārayati saṃsārasāgarāditi taraṇiḥ, tathā darśato draṣṭurviśvasya sarvasya jyotiṣkṛt prakāśakārī andhatamasasyāpasārakaḥ, viśvamābhāsi rocanaṃ yatkiṃcidrocanaṃ prakāśamānaṃ tadviśvaṃ samastaṃ tvamevābhāsi prajāpatirūpaḥ| ayamādityo dūre udeti dūraṃ gacchati ceṣṭate| kutaḥ| divaḥ antarikṣāt| rukmaḥ, ‘ruca-dīptau' dīptaḥ, suvarṇavarṇo vā| urucakṣā bṛhaddarśanaḥ| arthaḥ aryate prāpyate arthyate vā mokṣārthibhirityartho brahmā| taraṇirvyākhyātaḥ| bhrājamāno dīpyamānaḥ| jāyanta iti janāstrayo lokā nūnaṃ niścitaṃ kṛtvā sūryeṇa prasūtā janitā jagatāṃ prajāpativivartatvāt brahmapariṇāmatvādvā sūryasya ca brahmātmakatvāt| ayaṃ hi sūryaḥ apāṃsyannāni āviṣkurvan vṛṣṭidvāreṇa arthāṃśca yāgadānādīn vegenāryamāṇānayanpravartayan divasakaraṇadvāreṇa dṛśyate| ‘udu tyaṃ' 'citraṃ devānāṃ' 'mitro janāni'ti vyākhyātāḥ| he mitra āditya yo marto martyastava vratena vrataṃ karma śikṣate, sa prayasvān annavān prāstu prakarṣeṇa bhavatu| yaḥ tvotaḥ tvayā rakṣitaḥ, sa na kenaciddhanyate, na jīyate parābhūyate| nāpyenamaṃhaḥ pāpamaśnoti vyāpnoti antitaḥ antikāt, nāpi dūrāt| he pṛthivi yajñena payasā ca saha abhyāvartasva mama sāmmukhyena āgaccha, prasannā bhūtvā māṃ payasvantaṃ yājñikaṃ ca sampādaya| agniriṣitaḥ preṣitaḥ san te tava vapāṃ sāraṃ vedimarohat ārohatu| ghorāṇāmārṣam| ādityaḥ stūyate parabrahmarūpatvātsarvamayatvena| draṣṭā jīvātmā, upadraṣṭā antaryāmī| tasmai ubhayātmane namaḥ| vedādipramāṇeena dṛṣṭaṃ dharmādikamanu paścādyogābhyāsena sphuṭaṃ paśyatītyanudraṣṭā yogyātmā, tasmai namaḥ| khyātīti khyātā prakāśamānaḥ sarvo loko dharmirūpaḥ, upakhyātā dharmo rūpādiḥ, anukhyātā dharmādharmarūpādigataḥ| śiṣṭaṃ spaṣṭam| asya ādityasya ketavaḥ aśvā raśmayo vā adṛśran dṛśyante janānanu jāyamānām̐llakṣaṇīkṛtya| viraśmayo vigatamvo bandhanaśūnyā ityarthaḥ| bhrājanto dedīpyamānā agniprakhyāḥ| - [Previous: 51.4](https://indike.org/pramana/in.vedanga.kalpa.grhya.kathaka!devapala.51.4) - [Next: 52.1](https://indike.org/pramana/in.vedanga.kalpa.grhya.kathaka!devapala.52.1) - [Up: 51](https://indike.org/pramana/in.vedanga.kalpa.grhya.kathaka!devapala.51) ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.38.1) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.51.5](https://indike.org/pramana/in.vedanga.kalpa.grhya.kathaka!devapala.51.5) · Pramāṇa