[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Kāṭhakagṛhyasūtra](https://indike.org/pramana/in.vedanga.kalpa.grhya.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.kathaka!devapala) › 55.14 # Kathakagrihyasutra 55.14 Kāṭhakagṛhyasūtrabhāṣya 55.14 - **Language:** Sanskrit ### [55.14](https://indike.org/pramana/in.vedanga.kalpa.grhya.kathaka!devapala.55.14) brahmacārī vakti| tamācāryo vācayati brahmacaryamityādi svarityantam| kiṃ kṛtvā dadhikrāvṇa ityādinā trirdadhi bhakṣayitvā bhakṣaṇe brahmacāriṇaṃ prayujya| khāditvā ācānto brahmacaryamityādi brahmacārī paṭhati, gurupāṭhitaḥ sanniti tātparyam| dadhikrāvṇo akāriṣaṃ jiṣṇoraśvasya vājinaḥ| surabhi no mukhā karatapra ṇa āyūṃṣi tāriṣat || eṣā vyākhyātā| brahmacaryamityādi brahmacārī bravīti he guro ahaṃ brahmacaryamāgām, brahmaṇo vedasya caraṇamāgāmāgataḥ prāptaḥ| brahmacaryaṃ mayā avaśyakartavyatayā saṅkalpitam| ata upanayasva māṃ saṃskurvityarthaḥ| adhyeṣaṇe loṭ| he upanetastavāpyācāryakasiddhiḥ phalaṃ bhaviṣyati māṃ saṃskurvata ityātmanepadena bodhayati| ādityadarśanastu vyākhyātavān - gururidamāha - brahmā prajāpatistasya caraṇaṃ brahmabhāvamahamāgāmāgataḥ, ato māmupanayasva brahmasamīpaṃ prāpaya| he brahmacārinnityādi| etat vicintyam| 'omiti brahmaṇo'bhidhānamomiti brahma khaṃ brahme'ti śruteḥ| bhūriti bhūlokasthā devatā agnirūpocyate| bhuvarityantarikṣadevatā pūrvavattātsthyāt, sa ca vāyuḥ| svariti svarlokasthā devatā ādityātmikoktā | iyaṃ duruktādityādikāstriṣṭubho vācayannācāryo mekhalāmābadhnīte| brahmacārī vakti| gururvācayati| iyaṃ mekhalā duruktādduṣṭādasatyabhāṣaṇādikāduktādvācanātparibādhamānā vārayantī tasyāṃ baddhāyāṃ vākpāṇipādacāpalavāraṇānniyamacodanādvarṇaṃ brāhmaṇādijātitrayaṃ punatī pāvayantī adhyayanādiyogyatā''pādanadvāreṇa, rūpādikaṃ vā varṇaṃ punatī, svabhāvapavitraṃ pāvanayogyaṃ vā| sā me mamāgādāgatā prāṇāpānābhyāṃ balamābhajantī dadatī svādhyāyādidvāreṇa| ‘bhañjo-āmardane’ ityasya, varṇātmakaṃ rūpamābhajantī vināśayantī tasyāṃ hi satyām adhyayanaṃ kriyate| tacca kriyamāṇaṃ prāṇāpānau niruddhya kriyata iti prāṇāpānabalamapahataṃ tayā bhavati| sakhā samānakhyānā| devī dyotanādiguṇayuktā| subhagā hṛdyā navakomalamuñjasaṅgatā| ṛtasya satyasya goptrī pālayitrī tasyāṃ satyāṃ yatheṣṭavācitvanivāraṇāt, ṛtasya yajñasya vā rakṣikā baddhamekhalena vedatīrthādigamanāt| tapaso vrataniyamasahitasya vedādhyayanasya tarutrī tārayitrī pāraṃ nayatrī| ghnatī rakṣaḥ, yātudhānānnāśayantī, vajro vai mekhaleti śruteḥ| sahamānā arātiṃ, śatrumadānaṃ vā prasahamānā abhibhavantī kārpaṇyaṃ śatrūṃśca nivārayantītyarthaḥ| sā no'smākaṃ samantaṃ samantādanuparehi āgaccha bhadrayā vṛttā| he mekhale tava bhartāro dhārayitāraḥ santo vayaṃ mā riṣāma| riṣirhiṃsākarmā| tvāṃ dhārayatāmasmākaṃ hiṃsā mā bhūt| śraddhāyā āstikyasya duhitā śraddhā'sya mātā| tapaso'dhijātā, tapo'syāḥ pitā| mantrakṛtāṃ samyagjñānavidāmṛṣīṇāṃ svasā bhaginī babhūva bhūtā| he mekhale saivaṃbhūtā tvaṃ māṃ parirerihasva ‘liha-āsvādane’ chāndaso varṇavyatyayaḥ māṃ samāśliṣya, mayi tapo niyamayuktādhyayanaṃ dhehi nidhehi, indriyaṃ ca me indriyaṣaṭkapāṭavaṃ ca dehi| - [Previous: 55.12.47](https://indike.org/pramana/in.vedanga.kalpa.grhya.kathaka!devapala.55.12.47) - [Next: 55.16](https://indike.org/pramana/in.vedanga.kalpa.grhya.kathaka!devapala.55.16) - [Up: 55](https://indike.org/pramana/in.vedanga.kalpa.grhya.kathaka!devapala.55) ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.kathaka.41.10) — Laugākṣi, Sanskrit --- Source: [https://indike.org/pramana/in.vedanga.kalpa.grhya.kathaka!devapala.55.14](https://indike.org/pramana/in.vedanga.kalpa.grhya.kathaka!devapala.55.14) · Pramāṇa