Kathakagrihyasutra 77: atha saptapañcāśī kāṇḍikā
Kāṭhakagṛhyasūtrabhāṣya 77
- Language
- Sanskrit
atha saptapañcāśī kāṇḍikā
77.1
aśvayujā nakṣatreṇa yuktā paurṇamāsī āśvayujī, tasyāṃ nṛpatiprabhṛtīnāmaśvādyadhipatīnāmaśvādikhastyayanamidaṃ kartavyamucyate| aśvānmahayanti pūjayanti, snānānulepanālaṅkāraprabhṛtibhiḥ śṛṅgārayanti, sarvāṇi ca karikarabhakharaprabhṛtīni vāhanāni yathāsaṃbhavaṃ mahayanti |
77.2
grāmasya yā uttarā dik, tatreṣṭivikāratvādiṣṭivedisadṛśīṃ caturasrāṃ vediṃ kṛtvā, tāṃ ca śākhābhirahataiśca vāsobhiḥ parivārya, sarvarasairmadhurādibhirikṣurasaprabhṛtibhirghaṭān pūrayitvā pūrvādiṣu catasṛṣu dikṣu nidadhyāt sthāpayet, sarvaiśca vrīhyādibījaiḥ pātrāṇi pūrayitvā vidikṣu pūrvottarādiṣu nidadhyāt |
77.3
tasya racitopacārasyāparabhāge yathoktamājyabhāgāntaṃ hutvā jayaprabhṛtibhiśca rāṣṭrabhṛdantairhutvā tisro devatā yajeta nāmadheyena taddevatayā vā ṛcā| kāstāstisraḥ agniṃ varuṇamaśvināviti| āśvayujīṃ ca caturthīṃ, tāṃ tu nāmadheyenaiva āśvayujyai svāheti talliṅgamantrābhāvāt| ājyamatra haviḥ |
77.4
yāge kriyamāṇe'śvādīnyojayanti paryāṇālaṅkārādinā |
77.5
devayajanaṃ yāgasthānaṃ vedistasyāḥ parihitakavacāḥ karituragaprabhṛtayaḥ pradakṣiṇaṃ bhramaṇatrayaṃ kurvanti |
77.6
prahṛṣṭāḥ santo ghātādikaṃ kurvanti |
77.7
iṣṭe yāge nirvartite sati yathārthaṃ yathāprayojanaṃ samyak prahṛṣṭāḥ yānti| yo yatrādhikṛtaḥ, sa taṃ sthānaviśeṣamanusaratītyarthaḥ |
77.8
samastaṃ ca gavādi dakṣiṇā |
77.9
dakṣiṇetyanuṣajyate| rasā ye ghaṭeṣu kalpitāḥ, bījāni ca pātreṣu, vāsāṃsi vedivaraṇāni, tāni sarvāṇyeva dakṣiṇā| upayuktānāṃ dakṣiṇayā pratipattiḥ kartavyetyarthaḥ ||
Linked texts (1)
- Kāṭhakagṛhyasūtra — Laugākṣi, Sanskrit