[Pramāṇa](https://indike.org/pramana/) › [Indian literature](https://indike.org/pramana/in) › [Auxiliary Sciences of the Veda](https://indike.org/pramana/in.vedanga) › [Ritual sūtras](https://indike.org/pramana/in.vedanga.kalpa) › [Manuals of the domestic ritual](https://indike.org/pramana/in.vedanga.kalpa.grhya) › [Gṛhyasūtras of the Black Yajurveda](https://indike.org/pramana/in.vedanga.kalpa.grhya.krsnayajur) › [Kāṭhakagṛhyasūtra](https://indike.org/pramana/in.vedanga.kalpa.grhya.krsnayajur.kathaka) › [Kathakagrihyasutrabhashya](https://indike.org/pramana/in.vedanga.kalpa.grhya.krsnayajur.kathaka!devapala) › 78 # Kathakagrihyasutra 78: atha aṣṭapañcāśī kāṇḍikā Kāṭhakagṛhyasūtrabhāṣya 78 - **Language:** Sanskrit ### atha aṣṭapañcāśī kāṇḍikā ### [78.p1](https://indike.org/pramana/in.vedanga.kalpa.grhya.krsnayajur.kathaka!devapala.78.p1) asyāmevāśvayujyāṃ gomatāṃ svastyayanamāha - ### [78.1](https://indike.org/pramana/in.vedanga.kalpa.grhya.krsnayajur.kathaka!devapala.78.1) ‘upasṛṣṭā gāvo vasanti’ (7) iti liṅgāt sarvametatkarma gosvāmināmupadiśyate || ### [78.2](https://indike.org/pramana/in.vedanga.kalpa.grhya.krsnayajur.kathaka!devapala.78.2) pṛṣātakaṃ pṛṣadājyaṃ tatpunardadhimiśramājyamataśca sānnāyyadharmakam| ājyabhāgāntaṃ copasamādhānaṃ kṛtvā, viṣṇormanaseti pavitraṃ kṛtvā, agnijihveti pṛṣātakamutpūya, pradhānayāgo'yaṃ kartavyaḥ| māntravarṇikyaśca devatāḥ| mantrāstu ‘iha prajā’ ityādibhiḥ pratīkaiścatvāro viniyuktāḥ| taiścaturbhiścatasra āhutayaḥ | ### [78.4](https://indike.org/pramana/in.vedanga.kalpa.grhya.krsnayajur.kathaka!devapala.78.4) mṛḍā no rudra iti tisṛbhī raudrībhirjuhuyāt | ### [78.5](https://indike.org/pramana/in.vedanga.kalpa.grhya.krsnayajur.kathaka!devapala.78.5) juhuyādityanuṣaṅgaḥ nityāḥ punaḥ ṛca iha gāvaḥ, ayaṃ yajñaḥ, ā naḥ prajāmiti tisra eva smaryante bahupradhānasambandhāt | ### [78.6](https://indike.org/pramana/in.vedanga.kalpa.grhya.krsnayajur.kathaka!devapala.78.6) ‘dadhikrāvṇa’ iti mantreṇa pṛṣātakasya śeṣaṃ prāśnāti | ### [78.7](https://indike.org/pramana/in.vedanga.kalpa.grhya.krsnayajur.kathaka!devapala.78.7) vatsairyuktā gāvastāṃ rātriṃ vasanti | triṣṭup, gāvo devatā, brahmaṇa ārṣam| iha asmadgṛhe prajā gavāmapatyāni ramantāṃ krīḍantu, viśvarūpāḥ sarvā asmin goṣṭhe gavāṃ sthāne| viśvabhṛtaḥ sarvasya poṣikā yajñavṛṣṭyādidvāreṇa, janitrīḥ janitryaḥ avantyaḥ, agniṃ kulāyaṃ paścāspadaṃ samyagvasānā ācchādayantyaḥ 'agniḥ paśūnāṃ kulāyaḥ' ityanuśravaḥ| asmānavantu rakṣantu āgacchantu prīṇayantu tarpayantu praviśantu| kena| ghṛtena, payasā ca| anuṣṭup, ṛṣidevate pūrvavat| asmingoṣṭhe vartamānāstāḥ payasvatīḥ kṣīrānvitāḥ asmānavantu| vayovṛdhaḥ, vayo dhanaṃ vardhayantīti vayovṛdhaḥ| kāstāḥ| yāsāmūdho dugdhādhāraścaturbilaṃ stanacatuṣṭayayuktaṃ madhormadhunā madhurasena kṣīreṇa, ghṛtena ca pūrṇam| vaiśvadevī, jagatī, śiśuśaiśavayorārṣam| marutaḥ sūryaraśmayaścātra viśvedevāḥ| iha yajñe viśve sarve devā āgacchantu avasā annena dhanena ca saha| pṛṣadaśvā marutaḥ mitarāviṇaḥ| pṛśniḥ pṛthivī dyaurvāgvā mātā yeṣāṃ te pṛśnimātaraḥ| śubhaṃyāvāno śubhasyotkṛṣṭasya phalasya prāpayitāraḥ| vidatheṣu yajñeṣu jagmayo gantāraḥ| agninaiva haviḥ svādayantītyagnijihvāḥ| manavo mantāraḥ| sūrya iva dṛśyante sūracakṣasaḥ| āgneyī, triṣṭup| he deva agne ghṛtaṃ piban tvaṃ yaja pūjaya devān| harito'śvāstvāmāvahantu, raśmayo vā haritaḥ| tristhāno hyatrāgniḥ| kīdṛśā raśmayaḥ| ghṛtapruṣaḥ| agniḥ kīdṛśaḥ| ghṛtapratīkaḥ, ghṛtamabhimukhīkṛṛtya kāyati prakāśayatīti ghṛtapratīkaḥ, ghṛtena hi prajvalito bhaumo'gniḥ prakāśate| ghṛtapṛṣṭhaḥ, vāḍavo'gnirvaidyuto vā| ghṛtamāhūyate'sminniti ghṛtāhavanaḥ| ghṛtamudakamasya bāḍabādyagnerdhāma sthānam| gāva ucyante - yūyamambhaḥ pānīyaṃ stha bhavatha, yajñadvāreṇa vṛṣṭisambhavahetutvāt| ato yuṣmākaṃ sambandhi ambho'haṃ bhakṣīya, kṣīramapyatrāmbhaḥ | mahaḥ stha ojorūpā yūyaṃ bhavatha, tato maho bhakṣīya prāpnuyām| ūrjamannāni payodvāreṇa bhavatha, tataḥ ūrjaṃ bhakṣīya| rāyo dhanasya poṣaḥ puṣṭirbhavatha yūyamato'haṃ yauṣmākaṃ dhanapoṣamaśnuyām| revatī ramadhvaṃ 'paśavo vai revatī' iti śruteḥ revatyo yūyaṃ ramadhvamiha gṛhe krīḍata| asmindyonau yajamāne arjanahetau, atra goṣṭhe gavāṃ sthāne ayaṃ yajamāno gopatirbandhuḥ poṣakatvāt| ata ito yajamānāt māpagāta anyatra mā guḥ, māṃ mā hāsiṣṭa mā tyākṣuḥ, bahvyaśca me bhavatha| saṃhitā viśvarūpā gauriti trīṇi gonāmāni, vyatyayenaikavacanam| samyagdhitāḥ, viśvarūpāśca sarvasyotpādakatvena, gāvo gantrya āgantrya iha martyaloke yajñādyartham| ataḥ ā morjā viśa, ūrjā annena balena ca saha māmāviśata vyāpnuta| gaupatyena ca gopatitvena saha āviśata| vo yuṣmākaṃ rāyo dhanāni mayi śrayantāṃ samāśrayantu| sahasrapoṣaṃ vaḥ puṣeyaṃ, yuṣmatsambandhinyā sahasrasaṅkhyayā puṣṭaḥ syāṃ gosahasrāṇāmadhipatiḥ syāmityarthaḥ| amumapi prayuñjate iti aviniyukto'pi vyākhyātaḥ| vayo'pi ca poṣayantyanena mantradvayena| ## Linked texts (1) - [Kāṭhakagṛhyasūtra](https://indike.org/pramana/in.vedanga.kalpa.grhya.krsnayajur.kathaka.57.9) — Laugākṣi, Sanskrit --- Source: [https://indike.org/pramana/in.vedanga.kalpa.grhya.krsnayajur.kathaka!devapala.78](https://indike.org/pramana/in.vedanga.kalpa.grhya.krsnayajur.kathaka!devapala.78) · Pramāṇa