Kathakagrihyasutra 81.11.3

81.11.3

āgneyī| jagatī| ātreyasyārṣam| cayane viniyukteyam| he agne ahaṃ tvāmupāgataḥ| kiṃ kurvan| janayan cayanamanthānābhyām| kīdṛśam| vṛṣabhaṃ kāmānāṃ varṣitāraṃ karmadvāreṇa| cekitānaṃ, ‘citī saṃjñāne’ ‘liṭaḥ kānajvā’ (3.2.106), jñānavantam| punaryuvānaṃ punaḥpunastaruṇaṃ nityanavamityarthaḥ| ato no'smān tigmena tīkṣṇena brahmaṇā brahmavarcasena samyak śiśāmi sampādaya vidyānuṣṭhānarūpabrahmavarcasayuktānasmān sampādayetyarthaḥ| asthūriṇo gārhapatyāni naḥ santu, gṛhapateryāni karmāṇi tāni gārhapatyāni asthūriṇaḥ asthūrīṇi santu| sthariśabdo vināśavacanaḥ tatpratiṣedhena asthūrīṇyavināśīni| aindrī| triṣṭup| aśvinorārṣam| indraṃ hvayāmi āhvayāmi parameśvaram| kīdṛśam| trātāraṃ rakṣakam, avitāraṃ gantāraṃ sarvagatamityarthaḥ| have have āhvāne āhvāne home home vā suhavaṃ sukāhvānaṃ sukhahavanaṃ vā| śūraṃ vikramayuktam| śakraṃ śaktam| puruhūtaṃ bahubhirāhūtaṃ hutaṃ vā| āhūtaścendro maghavāṃ dhanavān asmākaṃ svasti avināśaṃ dadātu| punarindraśabdo'nyatra nivṛttyatiśayadyotanārthaḥ| vaiśvadevī| jagatī| vāyorārṣam| aindrāgnaṃ yadvarma kavacaṃ, tanno'smākaṃ tanvastrāyatāṃ śarīrāṇi rakṣatu sarvasmāt| bahulaṃ vitataṃ, ugraṃ dṛḍhaṃ durbhedam| tathāca viśve sarve'pi devā atiśūrā api yat na vidhyanti na bhindanti, tatra kā kathānyeṣām| atastena varmaṇā karmarūpeṇa rakṣitāḥ santo mahatā dīrgheṇa āyuṣā yuktāḥ santo jarāṃ jarjaritatvamupagacchema prāpnuyāma| jīvāḥ praśastena kīrtiyuktena jīvanena yuktāḥ santaḥ| uśanasaḥ kāvyasyārṣam| supratha ityantā gāyatrī| he pṛthivi bhūme syonā